CARMEN DE PASSIONE DOMINI (LATIN) Latin text from the Open Greek and Latin project (CC BY-SA 4.0) · SermonIndex Lactantius · c. AD 250–325 Source: Open Greek and Latin project, stoa0171.stoa004.opp-lat1.xml. Licence CC BY-SA 4.0. CARMEN DE PASSIONE DOMINI LACTANTI] CARMEN DE PASSIONE DOMINI [1–8] Quisquis ades mediique subis in limina templi, Siste parum insontemque tuo pro crimine passum Respice me, me conde animo, me pectore serua. Ille ego qui casus hominum miseratus acerbos, Huc ueni pacis promissae interpres et ampla Communis culpae uenia: hic clarissima ab alto Reddita lux terris, hic alma salutis imago, Hic tibi sum requies, uia recta, redemptio uera, [9–16] Vexillumque dei signum et memorabile fati. Te propter uitamque tuam sum uirginis aluum Ingressus, sum factus homo atque horrentia passus Funera, nec requiem terrarum in finibus usquam Inueni, sed ubique minas et ubique labores. Horrida prima mihi in terris magalia Iudae Hospitia in partu sociaeque fuere parenti: Hic mihi fusa dedit bruta inter inertia primum [17–24] Arida in angustis praesepibus herba cubile. In Phariis primos uixi regionibus annos Herodis regno profugus reliquosque reuersus Iudaeam, semper ieiunia, semper et ipsam Pauperiem extremam et rerum inferiora secutus, Semper agens monitis humana salubribus almae Ingenia ad studium probitatis, aperta salubri Plurima doctrinae iniungens miracula. quare [25–32] Impia Hierusalem, rabidis exercita curis Inuidiae saeuisque odiis et caeca furore Insonti est poenis letalibus ausa cruentam In cruce terribili mortem mihi quaerere. quae si Latius ipse uelim distinguere sique per omnes Ire iuuet gemitus mecum et sentire dolores, Collige consilia insidiasue meique nefandum Sanguinis innocui pretium et simulata clientis. [33–40] Oscula et insultus et saeuae iurgia turbae. Verbera praeterea et promptas ad crimina linguas Fige animo et testes et caeci infanda Pilati Iudicia ingentemque humeros et fessa prementem - Terga crucem atque graues horrenda ad funera gressus. Nunc me, nunc uero desertum extrema secutum Supplicia et dulci procul a genetrice leuatum- Vertice ad usque pedes me lustra: en aspice crines [41–48] Sanguine concretos et sanguinolenta sub ipsis Colla comis spinisque caput crudelibus haustum, Undique diua pluens uiuum super ora cruorem. Compressos speculare oculos et luce carentes 45 Afflictasque genas, arentem suspice linguam Fello uenenatam et pallentes funere uultus. Cerne manus clauis fixas tractosque lacertos Atque ingens lateris uulnus, cerne inde fluorem [49–56] Sanguineum fossosque pedes artusque cruentos. Flecte genu lignumque crucis uenerabile adora Flebilis, innocuo terramque cruore madentem Ore petens humili lacrimis suffunde subortis Et me nonnumquam deuoto in corde meosque Fer monitus. sectare meae uestigia uitae Ipsaque supplicia inspiciens mortemque seueram. Corporis innumeros memorans animique dolores. [57–64] Disce aduersa pati et propriae inuigilare saluti. Haec monumenta tibi si quando in mente iuuabit Voluere, si qua fides animo tibi forte meorum, Debita si pietas et gratia digna laborum Surget, erunt uerae stimuli uirtutis eruntque Hostis in insidias clipei, quibus acer in omni Tutus eris uictorque feres certamine palmam. Haec monumenta tuos si labilis orbis amicos [65–72] Auertent sensus fugiente decoris ab umbra Mundani, efficient ne spe captatus inani Mobilis occiduis fortunae fidere rebus Auseris aut uitae sperare fugacibus annis. Sed te nimirum sic ista caduca uidentem Saecula et exutum patriae melioris amore Orbis opes rerumque usus et uota priorum Moribus extollent sacris uitaeque beatae [73–80] Spe duras inter poenas te rore fouebunt Caelesti pactique boni dulcedine pascent, Purpuream donec post ultima fata relicto Corpore sublimes animam reuocabit ad auras Gratia magna dei. tunc omnem exuta laborem, Angelicos tunc laeta choros aciesque beatas Sanctorum inspiciens aeternae pacis amoena Perpetuo felix mecum regnabit in aula. ------------------------------------------------------------ https://www.sermonindex.net/fathers/lactantius-carmen-de-passione-domini-latin/