Miamun 35

1 Da Anutu ini da Yakop ibiani, “Wauriê da watip wafa gamp Betel da wampai nigi da warim mumai mararam tsarada nam in da dzi Anutu aru waêan da agu da gubuê u runta sinungê rainggam Isau badan ugu." 2 Yakop iringant i Anutu nanggan igi da ini da utupan da riban ruta mpadan ibiani, “Agam santan watiri gam mugus maraganun gam udan ugu rai da wayiê mpui da watip runggam bini da watsuf ngarukui gam sapan. 3 Ida agi bungê ayab gamp Betel, da dzi bungê arim mumai mararam tsarada nam in da Anutu aru nanga dzi nanggangê udagin suda nidzun. Arangan irim dzi sib da gubuê dzi waêan da barabin ugu, da impa tayangê dzi i sanab santan aru dzi fada gin ugu." 4 Ibinigi da ribarangan santan itapu mugus maraganun santan impruê da nam arida i ringan da irim da Yakop. Da Yakop iraf ntsuf in imingê gai tsiraê wain mingêa Sekem da idzufungê sib. 5 Da Yakop irut ampan gan itumuangê nanggan santan da ifan. Da Anutu itangin nam ratan tsiraê ibuafir gamp santan mingêa uts da ribarangan fadan da manga wadaru u. 6 Yakop da ampan gan santan igi ibawaê gamp Luts mingêa intap Kanan. Luts igi gamp Betel binganggan ratar. 7 Mingêan nigi da arangan yantungê tauf isu mumai mararam tsarada nam in da ifaringê mumai arigi bingan ibi El Betel (wainggan ibi ‘Anutu Mpada Betel’), i Anutu iwaê da Yakop imingê arigi da gubuê arangan runta sinungê rainggan badan. 8 Gubuê aru ribarangan mpadan nigi da Debora, Rebeka sagatan mpada tayangê gin, imamp da ribarangan irim arangan imingê gai tsiraê wain imingê Betel. Ibinigi da ifaringê gai igi binganggan “Gai Singisiang." 9 Da Yakop tanginda Mesopotemia rai da tipa fada intap Kanan sib, da Anutu itip iwaê da arangan imingê nigi da ifinti arangan. 10 Da ini da arangan ibiani, “U binganggam Yakop. Da aruani da wasangê i rungê tipa faringêa u binganggam Yakop u; bungê afaringê u binganggam faê Israil.” Ibinigi da Anutu ifaringê arangan binganggan Israil. 11 Da Anutu ini da arangan, “Dzi Anutu Nampang Wain ini da agu ibiani, warim narum ruas nautus i ruan nawaê nasisungê nabinigi. Mingêa agu da garam wain wain da king ruas bungê awaê nabinigi. 12 Da intap dzi riman da u rumpunggam Abraham da ramanggan Isak aruani isu agu gam. Hai, aruani da dzi rima da agu, da bungê asu u tafanggam taptap yangin rusan nanggan." 13 Da Anutu itangin arangan rai i mumai aru Anutu ruta arangan nidan nan da ruan gin ugu da ifan. 14 Yakop yantungê tauf guntiê mangan imingê mumai Anutu nida nan da arangan gin ugu da iyats wain da madamin ragun gin isu ampap santingêa mumai mararam tsarifa Anutu gin. 15 Da Yakop ifaringê mumai Anutu ruta nida nan da ruan gin igi binganggan Betelâ Anutu ungaran. 16 Yakop irut utupan itangin Betel rai da iyung ifan i waêa gamp Efrata. Rungê yunga fadan da Retsel gubuê gan nanga i apingêan iwaê da ipriê da nam tsakia tsiraê bingan iyus. 17 Da arangan rima narun ruta nam tsakia tsiraê da gan sagatan rima sib ini da arangan ini binaê, “U anungê ratan u, i u rim marub mangan." 18 Da gubuê Retsel ntafa gin i mampan da ifaringê mamaê mitan igi binganggan Benoni (wainggan ibi ‘mamaê uda tsakia gin’). Da bitsintaê ramanggan Yakop ifaringê i binganggan Benyamin (wainggan ibi ‘mamaê gifa gamp’). 19 Ibinigi da Retsel imamp da irim i sanab fada Efrata (gamp Betlehem binganggan ratar). 20 Mingêa Retsel ntsufan rima gin da Yakop iraê i tauf guntiê mangan da intang iruê isu ampap i santingêa Retsel ntsufan gingêa gin. Da tauf igi rungê imunti da aruani. 21 Israil yuriê da ifan da iyus ungar guntiê tsanganda dumpa sib nida Eder gin ba da yari ungaran iruê. 22 Gubuê Israil rungê mpada mingêa nigi da Ruben yatangê da irut ramanggan sagat guman Bilha igingê da Israil iringantin. Yakop narun rusan marub 12 rima da finin rusan ugu ibiani: 23 Lia sagat miamun irim: Yakop narunggan miamun Ruben, Simion, Liwai, Yuda, Isakar, da Tsebulun. 24 Retsel irim: Yosef da Benyamin. 25 Bilha, Retsel sagat guman, irim: Dan da Naftali. 26 Tsilpa, Lia sagat guman, irim: Gat da Aser. Nigi Yakop narun rusan mpada Mesopotemia da riman ugu igi. 27 Yakop ibawaê da ramanggan Isak i gamp Mamri, mingêa uts da gamp Kiriat Arba (bingan mangan Hibron) aru Abraham da Isak mpada gin ugu. 28 Isak impai udzufan isangê 180, 29 da ifufi nidzun bingan angu da arangan imamp. Da narun rusan Isau da Yakop irim arangan.