Miamun 44

1 Gubuê gada nam sib da Yosef ini da gan garaman mpada tayangê arangan ungaran ibiani, “Wafarangê nam gadan i garam ani bekan nasangê fungêan da watip wafarangê ribarangan silva gan ragun gin. 2 Da wafarangê dzi kapangê tipa i silva naruê ribarangan rainggan isiê bekan nampruê da arangan silva gan suba wit gin ugu.” Da arangan inang isangê Yosef nidan. 3 Da pisa maratait da Yosef garam guman itangin arangan rain rusan da dongki gan ifan. 4 Rain ruas itangin gamp igi rai da wafa guntiê u da Yosef ini da garam guman ibiani, “Warunt sung angu watsungê garam tuas aru naga. Da gubuê u waêa da ribarangan da wani wabiani rutin, ‘Ibianungê da dzi garam tsiraê gangê inang bini i agam da agam inang maisan rutin? 5 Wain idzuwai da agam iwap dzi garam tsiraê gangê kapan silva? Nigi kap dzi garam tsiraê gangê numa wain gin da rima nam fain gin i kupisa nam maradzigin wasi. Agam inang asub tsiraê bingan.’" 6 Ibinigi da Yosef garam guman irunt yatsungê da ifawaê da ribarangan da ini Yosef nifunggan rutin. 7 Da bitsintaê ribarangan ini i nifunggan mungaê, “O garam tsiraê, ibianungê da u ni nan bida nigi iyab i agai? U garam gumam agai wasangê nanga nam bida nigi u. 8 U sruê gin sib wa, gubuê aga tanginda intap Kanan rai i tipa badan, da aga yu silva aga tsanganda mingêa aga bekangê wit nifun itip iba da agu. Da wain idzuwai da aga wapa silva ma gol mingêa u garam tsiraê gam ungaran? 9 Garam tsiraê! Bida u tsanganda aga gangê bits udan, da wais arangan funub. Da aga santan aruani nasu u garam gumam utaê angu." 10 Da arangan ini, “Isangê. Dzi bungê atsungê nan nabi agam nidan, da bitsintaê bida dzi waêa rutin i agamam bits udan da arangan angu bungê asu dzi garam gumangê utaê angu. Da nan bungê amaê i agam santan." 11 Ibinigi da sung angu ribarangan santan itangin bek witan iruê intap da ikiraê bek nifun santan. 12 Da Yosef garam guman isau nam igi i bek santan, imingê rain tsiraê gin ibafan isangê waêa rain isiê igi gin. Da itsangan kap silva igi mingêa Benyamin bek witan. 13 Gubuê ribarangan tsangandan da wangun ibarabin nidzun angu da igari gan ngarukui gan, da itip itsara bek witan iyab dongki gan ruga rugan da itip iba gamp tsiraê igi. 14 Gubuê Yuda ruta rain rusan tipa bada Yosef ungaran da arangan rumpai. Da ribarangan ifa tatapuangê iruê Yosef maran. 15 Da Yosef ini da ribarangan ini binaê, “Agam inang uwayant idzuwai gan ani? Agam madasruê gin i garam tsiraê bida dzi ani isangê i nanga nam i tsanganda nam mingêa maradzigin." 16 Da Yuda ini, “Garam tsiraê. Aga bunida nan bida anungê i nida u nanggam mungaê? Aga wasangê tsarifa ruangê bida aga wanang asub mangan u, imaê. Anutu ikupis wasi gam garam gumam agai ani asubangê. Aga santan bungê asu u garam gumam utaê angu nampruê da aru garam gum tsanganda kap mingêa i gan bek witan ugu." 17 Da bitsintaê Yosef ini binaê, “Imaê. Dzi wasangê i nanga sanab bida nigi u. Garam aru uda kap silva angu bungê asu dzi garam gumangê utaê. Da nan imaê i agam. Agam santan bungê afan da ramanggam ruta nan nufan." 18 Yuda ifa uts da Yosef da ini binaê, “O garam tsiraê! Dzi gaib runggangê da agu i u ringanta i garam gumam dzi nanggangê. U garam tsiraê bingan isangê King Farau, da u nugum anungê ruaêa i garam gumam dzi u. 19 Garam tsiraê, mungê aga badan ugu da u gut i garam gumam agai ibiani, ‘Agam ramanggam ma rainggam rumpai ma imaê?’ 20 Da aga ni da agu sib ugu ini binaê, ‘Hai, aga ramanggangê fufi rurut aga rainggangê isiê aga ramanggangê fufida sib da riman ugu rumpai. Arangan rainggan imamp sib, da arangan runtaê angu, i rinanggan irim rib iruê igi. Ibinigi da raman maran yari nidzun angu gin.’ 21 Da u ni da agai u garam gumam ibiani, ‘Wau arangan waruê ba da dzi da dzi runggangê natsangan.’ 22 Da aga ni sib da agu, aga garam tsiraê gangê, ibiani, ‘Mamaê isiê arigi wasangê i tanginda ramanggan rai u. Bida arangan tanginda ramanggan rai da raman bungê amamp.’ 23 Da bitsintaê u ni da garam gumam agai ibiani, ‘Agam mamida ruta rainggam isiê igi badan da dzi anungê tipa tsanganda agam u.’ 24 “Da gubuê aga tipa fadan da aga fis i nan sib angu aga garam tsiraê gangê agu nidan da agai da aga ramanggangê, u garam gumam. 25 Raiyi da aga ramanggangê ini binaê, ‘Agam watip wafan da wayu nam gadan isiê pas i agi.’ 26 Da aga ni da ramanggangê ibiani, ‘Aga wasangê mangan i ruêan u. Bida aga ruta rainggangê isiê igi fadan, da isangê. Garam tsiraê igi wasangê i tipa tsanganda agai bida aga rainggangê isiê igi mamida i ruta aga fadan.’ 27 Da u garam gumam dzi ramanggangê ini da agai ibiani, ‘Agam isruê gin sib wa. Dzi fininggangê Retsel irim dzi narungê rusangê marub iruêrun. 28 Dzi narunggangê mangan itangin dzi rai. Dzi ni binaê, “Mani apu buman mangan igara arangan fafarab sib.” Da dzi watsangan arangan maran ibasangê aruani u. 29 Da bida agam tipa uda manga aruani sinungê dzi fadan da barabin waêa rutin, da barabin igi bungê ais dzi funub, i dzi fufi sib.’ 30 “Aruani da bida aga tipa fadan, da u garam gumam dzi ramanggangê mamida i tsanganda aga rainggangê isiê igi, da nugu barabin bungê ais arangan funub, i wain ibi arangan ifufi sib da aga rainggangê isiê igi ibi arangan nugunggan marafain. Da u garam gumam agai bungê asu wain i aga ramanggangê nanggan mampan igi. 32 Dzi tsaf ruangê sib da ramanggangê i mpada tayangê rainggangê isiê igi bini. Da dzi ni binaê, ‘Bida dzi mamida tipa uda rainggangê isiê igi badan da agu, da dzi angu bungê asu wain i barabin igi santan namingê u maranggam nanting.’ 33 Ibinigi da garam tsiraê, dzi gaib runggangê da agu i u garam gumam dzi uda rainggangê isiê igi mumai gan da suda u garam gumam utaê angu, da watangin arangan da narut rain rusan natip nafan. 34 Dzi butipa fadan da ramanggangê bida anungê bida mamaê igi mamida ruta dzi fadan? Imaê! Dzi bugin i tsanganda ramanggangê buaringêa barabin igi."