Dzems 2

1 Raingê ruas, agam isu garam muarutsa Nifutsarif Yisu Kristus, Garam dzidziwandan. Nabinigi da anungê tsarifa garam mangan da buginda mangan yaba i garam gar nanggan tsangandan angu u. 2 Bida agam mpruêa ruam, da garam atsufa ring gol da ngarukui gan bini mangan badan, da garam sauda runggan ngarukui gan gagarida ruan badan mpruêan, 3 da bida agam uda garam atsufa ngarukui bini igi yaban da nida rutin bida ani, “Waba ani. Wampa waruê bintip bini ani,” da agam nidan da garam sauda runggan igi bida ani, “Wamunti wafa naga,” ma, “Wampa waruê intap igi," 4 bida nigi da agam itsarif mangan da ibugin mangan, da iraru garam iyab i gam uwayantam maisan angu. 5 O, dzi raingê ruasi, agam waringantin: Anutu ipiriang garam sauda runggan mingêa intap ani i suda garam fungêa i nam muarutsan da ruta Arangan mpadan da mpada tayangê i nanggan mpada tayangê gan garaman, aru Arangan ragada mungê ugu i riman da rib maran arida i Arangan. 6 Da bitsintaê agam irim ub i garam sauda runggan. Da mangan igi inang da irasu agam da idzur nan da agam maiê maiê imingê kiap ruas maranggan i raruda agam? Garam nam bunump angu! 7 Da ribigi irim ub da iwaya Yisu binganggan bini faringêa yaba i agam ugu isu mais! 8 Bida agam tipa agi Nifutsarifangê Anutu nanggan faidagin tsiraê mingêa nan akaran ugu nida bida ani, “Maram wari i garam mangan nasangê u maram arida i runggam,” agam nanga bida nigi da agam yatsungê sanampun ngarubini. 9 Da bitsintaê bida agam maram arida i mangan da buginda mangan, da agam inang asub, da Nan Faidagin bungê asantingê nabi agam garam atupa sib i Nan Faidagin. 10 Bida manga atsungêa Nan Faidagin santan bini da atupa sib i bitsintaê angu, da iwaê asub i atupa sib i Nan Faidagin santan ugu. 11 I Anutu ini ibiani, “U ma araraê maê,” da Arangan runi mangan ibiani, “U mais garam funub maê.” Bida u mamida i araraêan, da bitsintaê u isa garam funub, da u su garam atupa sib i Nan Faidagin. 12 Nam santan agam nidan da nangan da maram wafur i Anutu bungê araru agam nayab i nan faidagin piraêa agi rai sinungê nam maisan nampanggan, 13 i wain ibiani, Anutu bungê araru agi, da maran wasangê i ntuêa i garam aru maran mamida i ntuêa garam fain u. Da bitsintaê bida garam maran ntuêa i rib fain, da Anutu maran bungê antuê i arangan da gubuê raruda garam gar. 14 Raingê ruas, bida manga faringêa runggan garam muarutsan da bitsintaê guman bini nangan maêan, da bini idzuwai rumingê? Nam muarutsan bida nigi isangê i rima arangan ganunggan sib? Imaê! 15 Bida agam rainggam ma nafunggam mangan bida sauda runggan i ngarukui ma nam gadan, 16 da agam manga nida rutin, “Wafan da nugum nufan da wampa bini da waga nanggam wasuf,” da bitsintaê mamida i rima sib i nam fain, da nan bida nigi sangê i rima garam arigi riniuriatsan sib? Imaê! 17 I sanab bida nigi, da bida garam muarutsan da guman bini nangan maêan, da nanggan muarutsan igi isu badzab. 18 Da bitsintaê manga bungê ani nabiani, “Garam mangan imuaruts, da garam mangan inang gum bini bini.” Da dzi ni nida nan igi mungaê gan bida ani: U sangê i santingêa dzi i nanggam muarutsan ruta guman bini nangan maêan, ma? Anungê isangê u! Da bitsintaê dzi bungê asantingê agu i nanggangê muarutsan nayab i dzi gumangê bini dzi nangan. 19 U muaruts ibi Anutu bitsintaê angu? Ngarubini! Marapayam maisan imuaruts ibinigi â da irat da iratarat. 20 U garam brabruêan, u ni sruêa gin, nam muarutsan angu da guman bini nangan maêan da nigi nam utaê santan, a? Ariê, dzi bungê asantingê agu i nan nabiani. 21 Agi tafanggangê Abraham isu garam rururungan imingê Anutu maranggan iyab i nanggan rima narunggan Isak yaba mumai tsarada nam in suda dangki fada rutin. 22 Wasruê gin i Abraham nanggan muarutsan da guman nangan impruê ruan, da gan nanggan muarutsan ikupis ruan isu nidzun iyab i guman nangan. 23 Ibinigi da nan akaran ani isu nidzun, ini ibiani, “Abraham imuaruts Anutu da Anutu itsangan arangan garam rururungan iyab i nanggan muarutsan.” Da Anutu ifaringê arangan ibiani, “Dzi rinunggangê nidzun Abraham." 24 Ibinigi da agam watsangan, garam isu garam rururungan i Anutu maranggan iyab i guman nangan, anungê nam muarutsan utaê angu u. 25 I sanab bida nigi da sagat maramais Rehab isu sagat rururungan i Anutu maranggan iyab i nanggan isa yaring i garam Israil atangêa i tsuara gamp tsiraê Dzeriko ugu da tanginda fada sanab mangan. 26 Nan ugu wainggan ibiani, riniuriats utaê da ganun maêan, da nigi isu badzab sib; bida muarutsan angu da guman bini nangan maêan, da isu badzab ibinigi angu.