Yowanis 12
PNG1 Gubuê 6 rumingê i waêa gubuê mararam tsiraê Angira Atupa Sib da Yisu ifa gamp Betani, Ladzarus gampan, garam mampan aru Yisu isa i marataê ugu. 2 Tuasarangan isu nam gadan i Yisu imingê nigi. Da Ladzarus da ampi fain irut Arangan impruê maran impai, da Mata irim nam gadan da ribarangan. 3 Ida Maria ifa yu madamin gaunt bini tipa i gai mangan binganggan nard gurun gan. Barabin gan isangê 300 gram da nam ntsuman gan tsiraê bingan. Da iba yats i Yisu fagan da itias i gan gudzu yafanggan. Da madamin igi gauntan bini idasangê ungar wasaê igi santan. 4 Da bitsintaê arangan garaman bits atsungêa gin nida Yudas Iskariot â uts pas angu da bungê arim Yisu nafa garam ipiap banginggan â ini binaê, 5 “Ibianungê da imami rima nam gaunt bini aga i garam suba i nam ntsuman da agi faban da garam sauda runggan? Agi sangê i uda nam ntsuman gin sangêa nam ntsuman garam mangan nanga gum in da udzuf bitsintaê!" 6 Arangan maran wafur garam sauda runggan da ini ibinigi u, da bitsintaê arangan garam wapa nam, da impa tayangê ribarangan moni gan da inang da iwap. 7 Yisu ini arangan nifunggan mungaê ibiani, “Watiri Maria rai! Arangan ingif madamin igi isu nam tipa ruan i dzi gubuê gangê mampan da rima dzi. 8 Garam sauda runggan rubungê arut agam nampai nabinigi angu, da dzi wasangê i rungê ruta agam mpada bida nigi u, imaê." 9 Da ampi tsiraê Yuda iringant i Yisu mpada nigi da iba, da anungê iba i tsanganda Yisu angu u, imaê. Ini tsanganda Ladzarus aru Yisu isa i marataê ugu mpruêan. 10 Ibinigi da garam pumuêa Anutu wain gudzun rusan itip nan i isa Ladzarus funub mpruêan bida nigi, 11 i arangan nanggan mampan da Yisu isa arangan marataê angu da rib Yuda ampi bingan itiri ribarangan rai da imuaruts Yisu. 12 Maiê mangan igi da ampi tsiraê bawaêa Yerusalem i gubuê mararam tsiraê Angira Atupa Sib igi iringant i sisingê Yisu bada Yerusalem. 13 Da iyu figiamp yafan da ifa i waêan da Arangan. Da iti inuê nifun tsiraê bingan ini binaê, “Aga tsarif Agu, Garam rima agai sib! Nifutsarif Anutu ifinti Arangan aru bada i Anutu binganggan! Hai, Anutu ifinti Israil King gan!" 14 Yisu iyu dongki naru faê mangan da impa iyab gin ibi profet nanggan kakaran nidan, 15 “O Saion narun finam , watangin ratan. Watsangan! U King gam impa dongki naru faê barun wagungê iba." 16 Gubuê arigi da riban atsungêa gin anungê isruê i nam waêan da Yisu igi wainggan u. Da bitsintaê gubuê Yisu uda bingan tsiraê sib da ribarangan uwayantan ipuê da maran ifur nan kakaran ugu ini iyab i Yisu da isu nidzun i nam ampan nanga i Arangan. 17 Garam ampi bingan ruta Yisu da tsanganda Arangan nuêa Ladzarus sinungê tauf bampun i isa arangan marataê ugu, ifisin wasi da ampan. 18 I wain igi da garam ampi bingan iyung ifa i tsanganda Yisu i nam maran mangan ribarangan ringanta gin igi. 19 Ibinigi da garam Farisai ini da ruan, “Aitsangan! Agi gumangê nangan bini gan mangan wawaê u. Garam intap santan ifa sib da yatsung arangan!" 20 Garam Grik fain ifa impruê i tsanganda gubuê mararam tsiraê Angira Atupa Sib da pumuêa Anutu mingêa Yerusalem. 21 Ribarangan iba da Filip, aru gampan Betsaida mingêa Galili ugu, da igutin ini binaê, “Garam tsiraê, aga ni tsanganda Yisu." 22 Ibinigi da Filip ifani da Andru da iruê igi impruê ruan ifani da Yisu. 23 Yisu ini ribarangan nifunggan mungaê ibiani, “Gubuê maran ibawaê sib wa da aruani i Garam Narunggan uda bingan tsiraê. 24 Dzi nani nan nidzun bingan da agam, bida dzangkum nidzun mangan mamida i ruaêa intap da mampan, da rubungê amingê nidzun bitsintaê angu. Da bitsintaê bida mampan da bungê akap nidzun ampi bingan. 25 Garam maran arida i nanggan mpada marataê yusan, da bungê arim ganunggan rai. Da garam nida mais i nanggan mpada marataê mingêa intap ani, da bungê ayu nam mpada maran taêan ntingan angu. 26 Manga nanga gum i dzi da natsungê dzi, da gamp dzi mpada gin da arangan bungê ampa gin nabinigi. Da Ramangê bungê arim bingan tsiraê da garam nanga dzi gumangê. 27 Gubuê aruani da dzi wangungê ibarabin nidzun angu. Da dzi nabuni nan nabianungê? Mani dzi nani, ‘Ramangê, warim dzi sib sinungê gubuê barabin nida waêan ani’? Imaê. Dzi nabuaringê barabin igi, i wain arigi angu da dzi ba. 28 Ramangê, warim bingan tsiraê da runggam!” Da nifun mangan iwaê imingê gunungun iba ini binaê, “Dzi nang binganggangê isu tsiraê sib da dzi rubungê anang nabinigi." 29 Garam ampi tsiraê muntida nigi iringant i nifun waêan igi da fain ini binaê, “Tsuarip ingkung iririring.” Da bitsintaê fain ini binaê, “Angira mangan ini nan da arangan." 30 Yisu ini da ampan tsiraê igi ibiani, “Nifun waêan ani anungê iwaê i rima dzi sib u, imaê. Iwaê i rima agam sib. 31 Aruani da Anutu gubuê gan raruda garam intap inang i waêan, da bungê asiat Sadang, garam suda wain i intap ani, nafa manaê. 32 Da gubuê garam raêa i dzi sinungê intap da dzi bungê auntap i garam santan naba da runggangê." 33 Arangan ini nan igi i santingêa Arangan bungê amamp nabianungê. 34 Da garam utup tsiraê igi ini Yisu nifun mungaê ibiani, “Aga ringant i nan mingêa Anutu Nanggan Faidagin nida Garam Anutu Ragadan bungê ampa ratar nanting, da ibianungê da agu ni naraê i Garam Narunggan? Da u ni Garam Narunggan idzuwai igi? Garam Anutu Ragadan, ma?" 35 Yisu ini da ribarangan ibiani, “Nam puatsadan bungê ari agam uts pas angu. Gubuê nam puatsadan rumingêan da agam wayung, i nam mimindan anungê waêan da agam u. Da manga yunga nam mimindan wasaê wasruê i gan fada gin u. 36 Wamuaruts nam puatsadan da gubuê aru rungê arida i agam, da agam bungê asu nam puatsadan narun rusan.” Gubuê Yisu nida nan igi sib da ifa sinungê ribigi da ikup. 37 Yisu inang nam maran mangan ampi bingan angu iwaê imingê ribigi maranggan sib, da bitsintaê ribigi anungê imuaruts u. 38 Nigi iwaê i nanga profet Aisaia nanggan nida mungê ugu suda nidzun, “Nifutsarif, mangan nigi muaruts aga nan gaê fisagin? Da mangan nigi itsanga Nifutsarif nampanggan?" 39 Ribigi anungê isangê i muarutsan u, i wainggan imingê nan mangan profet Aisaia kakaran bida ani, 40 “Anutu itsungin ribigi maran sib da inang ribigi wangun ibabampaf isu tauf. Arangan inang ibinigi i ribigi anungê raraba nam ma sruêa gin da mamida parima i ruan badan da dzi, da dzi nanga ribigi dauman." 41 Aisaia irarab Yisu nampanggan da binganggan tsiraê sib, ibinigi da ini nan igi iyab i Arangan. 42 Da bitsintaê garam ampi bingan mingêa wasaê i garam gudzu gudzun imuaruts Yisu, da anungê ini nanggan muarutsan wasi i ribarangan irat i rib Farisai bungê apaê ribarangan rai nawaê sinungê ungar mpruêa ruan gin. 43 I ribarangan ini uda bingan tsiraê mingêa garam gar gin yusa bingan tsiraê bada mingêa Anutu gin. 44 Yisu inuê nifun tsiraê ini binaê, “Garam mangan muarutsa dzi da anungê imuaruts dzi angu u, imaê; imuaruts Aru tanginda dzi badan ugu. 45 Gubuê garam mangan raraba dzi, da irarab Aru tanginda dzi badan ugu impruê ibinigi. 46 Dzi su nam puatsadan iba intap i bida mangan muarutsa dzi da anungê rungê mpada nam mimindan wasaê u. 47 Bida manga ringanta i dzi nanggangê da mamida i atsungêa gin, da dzi wasangê i raruda arangan u. Dzi anungê iba i raruda garam intap u; dzi ba i rima garam intap sib. 48 Garam rima barun da dzi da mamida uda dzi nanggangê, da nam rarudan rumingê. Nan dzi fisa gin igi bungê araru arangan da gubuê buntun. 49 I dzi wafis i nan i rugangê uwayantangê u, imaê. Ramangê aru tanginda dzi badan ugu ini da dzi i nan santan dzi nidan da fisa gin. 50 Dzi sruê i Ramangê nanggan irim nam mpada ratar ntingan. Ibinigi da nan sib angu dzi nidan, da dzi ni rururungan ibi Ramangê nidan da dzi angu."