Yowanis 5

1 Raiyi da garam Yuda gubuê gan mararam tsiraê mangan iwaê, da Yisu iyab gamp tsiraê Yerusalem. 2 Da mingêa Yerusalem igi, mingêa uts da muantsi tsiraê faringêa bida Dumpa Muantsi Gan, da mpui fuê bits imingê igi, faringêa mingêa nifu nan Hibru nida Betesda. Da ungar tsaparangê 5 itsuafiê sib. 3 Da mingêa ungar tsaparangê tuas arigi da garam gingêa rinin utup tsiraê bingan igingê igi ibafan, maran gampaman da urun gruêa ruan da fagan mampan. 5 Da garam bits gingêa mpui fuê Betesda ringampa igi igingê rinin isangê udzuf 38 sib. 6 Gubuê Yisu tsanganda arangan rungê gingêan da sruêa gin bida rinin gingêan igi uda arangan gubuê guntiê bingan da igutin ini binaê, “U maram yari i u rininggam dauman?" 7 Garam gingêa rinin igi ini binaê, “Garam tsiraê, dzi gangê mangan wampai i raêa i dzi da tanginda dzi ruêa mpui fuêan ani da gubuê mpui suda dzaradziriang u, imaê. Dzi runggangê yintsaê i raêa i ruangê fada sung, da bitsintaê garam mangan isu miamun i ruan i ruêa mpui mungê." 8 Ida Yisu ini da arangan, “Wauriê wayab! Da wau rabiê gam da wayung!" 9 Sung bingan angu da garam igi rinin idaum da iyu rabiê gan da iyung. Nam igi iwaê da gubuê Sabat rururungan. 10 Ibinigi da garam Yuda gudzun rusan ini da garam rinin dauman igi ini binaê, “Gubuê aruani gubuê Sabat! Da Nan faidagin idzur nan sib i u anungê apingêa rabiê gam yungan u." 11 Da bitsintaê garam igi ini ribigi nifunggan mungaê ibiani, “Garam nanga dzi rininggangê dauman ugu ini da dzi ibiani, ‘Wau rabiê gam da wayung!’" 12 Da ribigi igut i arangan ini binaê, “Garam idzuwai arigi ini da agu i u yuda rabiê gam da yungan?" 13 Da bitsintaê garam rinin dauman igi busau runggan angu i Yisu igi wai, i gubuê aru Yisu tipa arangan da waêa bini sib ugu da garam utup tsiraê bingan imunti isisungê nigi sib da Yisu iwaê sinungê da ifan. 14 Raiyi da Yisu itip iwaê da garam arangan imingê Ungar Mararam ntiangê gan wasaê da ini rutin, “U tsangan! Agu rininggam idaum wa. Anungê tipa nanga nam maisan u, i barabin tsiraê yusan mawaê da agu i." 15 Da garam arangan ifan da ini da garam Yuda gudzun rusan i Yisu angu inang da arangan rinin idaum. 16 Ibinigi da garam Yuda gudzun rusan irim ipiap i Yisu i isa funub, i wain Arangan inang da itip garam rinin idaum da gubuê Sabat. 17 Da bitsintaê Yisu ini da ribarangan ibiani, “Dzi Ramanggangê runang gan guman ibi arigi angu da gubuê santan isangê bawaêan da aruani, da dzi binigi inang gumangê ibi arigi angu." 18 Nan wain Yisu nidan igi inang ribigi nugun iruaê nidzun angu da rungê isau sanab i isa Arangan funub. Yisu anungê yis sanab Sabat udziê angu u, da bitsintaê ini Ramanggan wain Anutu, i nanga runggan sangêa Anutu. 19 Ibinigi da Yisu ini ibiani, “Dzi nani nan nidzun bingan da agam! Narun anungê isangê nanga nam mangan i rugan maranggan furan u, imaê. Arangan isangê i nanga nam tsanganda mingêa nam Ramanggan nangan angu, i nam idzuwai Raman nangan, da Narun inang ibi arigi. 20 I Raman maran yari i Narun da isantingê nam sib angu runggan musa nangan rutin. Da Arangan bungê asantingê Narun i nam tsiraê bingan nayus nam tuas aru agam tsangandan igi, da agam bungê arunt fafun da nagara bangim gin. 21 I sangêa Raman raêa i rib mampan da rima nam maran taêan rutin, da Narun nabinigi bungê arim nam maran taêan da rib idzuwai arangan maran fura i rima rutin. 22 I Raman runggan anungê iraru garam mangan u, imaê. Itangin gum raruda garam santan igi sib ifa Narunggan banginggan. 23 Raman inang ibinigi i wain Arangan ini garam gar sib angu natsarif Narun nabi tsarifa Raman. Da manga mamida i tsarifa Narun, da arangan anungê itsarif Raman aru tanginda Narun igi badan ugu u. 24 “Dzi nani nan nidzun bingan da agam! Garam ringanta i dzi nanggangê da muarutsa Aru tanginda dzi badan ugu iwaê da nam mpada ratar ntingan sib. Ribigi anungê isangê muntida nam rarudan wasaê u, imaê. Iwaê sinungê nam mampan sib da iwaê da nam mpada ratar wain. 25 “Nan nidzun bingan dzi ni nidan da agam! Gubuê mangan isu uts i waêan da ibawaê sib, da garam mampan bungê aringant i Anutu Narunggan nifun. Da rib ringanta gin bungê ampa maran taêan. 26 I sangêa Raman runggan suda wain i nam mpada maran taêan, da irim nampang da Narun ibinigi i runggan suda wain i nam mpada maran taêan. 27 Da irim nampang da Arangan i raruda garam gar, i Narun igi Garam Narunggan. 28 “Agam anungê runta fafun gin u! I gubuê mangan bungê abawaê da garam gingêa garam badzab gampan ugu sib angu bungê aringant i Narun igi nifunggan, 29 da nawaê sinungê ntsufan gingêa gin. Rib atsungêa sanab bini ugu bungê amunti marataê da nampa maran taêan, da rib atsungêa sanab maisan ugu bungê amunti marataê da namunti nam rarudan wasaê. 30 “Dzi runggangê anungê isangê nanga nam mangan utaê angu u; dzi raru nam isangê dzi ringantagin i dzi Ramanggangê gin angu. Da dzi nanggangê rarudan igi irururung angu, i dzi anungê yatsungê rugangê maranggangê furan; imaê, dzi yatsungê Ramangê aru tanginda dzi badan ugu maranggan furan." 31 “Bida dzi runggangê angu nida runggangê wasi, da ampan wasangê uda nan igi yaba bida nan nidzun. 32 Da bitsintaê manga rumpai, dzi Ramanggangê, da Arangan ibinigi ini dzi wainggangê wasi. Da dzi sruê i Arangan nanggan nida wasi igi nan nidzun bingan. 33 “Agam itangin garam faingê ifan da Yowanis, da arangan ini nan nidzun bingan wasi iyab i dzi. 34 Dzi wau garam gar nanggan nida dzi wasi iyab u, i nan igi wasangê i rima riniurun da dzi nanggangê nida runggangê wasi u. Da bitsintaê dzi ni nan igi iyab i Yowanis i Anutu uda agam sinungê nam maisan. 35 Yowanis isu dzaf bururungan da ipuatsa yari wasi, da agam nugum itsiaê i arangan nanggan puatsadan igi uts angu. 36 “Da nam bini bingan yusa Yowanis nanggan igi ini dzi wasi. Nigi da gum santan Ramangê tangindan i dzi nangan da ntsupan. Da gum santan dzi tida nangan igi isantingê wasi i Ramangê itangin dzi iba. 37 Da Ramangê aru tanginda dzi badan ugu runggan ini dzi wasi. Da bitsintaê agam anungê iringant i Arangan nifunggan ma itsanga Arangan maran u. 38 Da agam anungê iyu Arangan nanggan iruê wangunggam u, i agam anungê imuaruts garam aru Ramangê tanginda badan ugu. 39 “Agam ifaris Anutu nanggan kakaran igi nidzun angu da yarangê gin ubat, i agam maram ifur nan igi bungê arim nam mpada maran taêan ntingan angu da agam. Da Anutu nanggan kakaran igi ini dzi aruani wasi, 40 da bitsintaê agam ibugin i badan da dzi i uda nam mpada maran taêan. 41 “Dzi wau garam nanggan tsarifa dzi iyab u, imaê. 42 Da bitsintaê dzi sruê i agam, i agam maram anungê yari i Anutu imingê gam wangunggam wasaê u. 43 Dzi su Ramangê maran da dzi ba, da agam anungê iyu dzi iyab u. Da bitsintaê bida garam manga bada i rugan binganggan, da agam bungê ayu arangan nayab. 44 Agam inang da iyu nam tsarifan mingêa wasaê i runggam iyab, da bitsintaê agam anungê isau nam tsarifan bada mingêa Anutu wain bitsintaê angu gin. Ibinigi da agam nabumuaruts dzi nanggangê nabianungê? 45 “Agam anungê bunida dzi bungê asantingê agam asubam wasi i Ramangê maranggan u, imaê. Moses, agam garamam agam nida rima agam sib ugu, bungê asantingê agam asubam wasi. 46 Bida agam damuaruts Moses da agam madamuaruts dzi, i arangan ikakar nan i dzi. 47 Da bitsintaê agam anungê imuaruts nan arangan kakaran i dzi, da agam bungê abumuaruts dzi nanggangê nidan nabianungê?"