Lukas 24

1 Gubuê miamun Suntaê tataê maratait, da sagat sagat iyu nam rini gaunt tipa ruan gin sib ifa tauf bampun. 2 Ribarangan itsangan ibi tauf tsiraê tsunginda tauf bampun gin ugu anungê rumingê u. Irimpingê gin sib iwaê manaê. 3 Da gubuê ribarangan atangêa fadan da isau Nifutsarif Yisu riniuriatsan. 4 Da ribarangan maran rung fura nan yusa yaba i nam igi, da sung angu garam iruê ngarukui gan dzadzaniangan imunti impruê da ribarangan. 5 Da sagat igi irat da itauf maran iruê intap. Da garam iruê igi ini da ribarangan ibiani, “Ibianungê da agam isau garam marantaêan imingê garam mampan gampan? 6 Arangan anungê impai ani u; Arangan imunti marataê sib! Agam maram wafur nan Arangan nidan da agam, da gubuê rungê ruta agam mpada mingêa Galili ugu: 7 ‘Bungê atangin Garam Narunggan nafa garam asub banginggan, da nais Arangan nayab gai mpara i ruan, da gubuê suda iruê da bits da bungê atip namunti marataê.’" 8 Ida ribarangan maran ifur Yisu nanggan nidan. 9 Gubuê ribarangan tipa bada sinungê tauf bampun, da ifis i nam santan waêa mingêa nigi da rib 11 ugu impruê da rib fain. 10 Sagat ruas nida nan da aposel ruas igi ibiani: Maria Magadala, Yowana, da Maria Dzems rinanggan, da sagat fain ruta ribarangan. 11 Da bitsintaê ribigi itsanga nan sagat sagat nidan igi ibi nan brabruêan, da anungê imuaruts ribarangan u. 12 Da bitsintaê Petrus yuriê iyab da irunt ifa tauf bampun. Da idzuangê iruê da yarangê yatangê da itsanga bruê maragamp utaê runggan rungê ufuma ruan. Da arangan itip ifa gan arun ruta maran furan ampi bingan i nam waêan igi. 13 Gubuê arigi da Yisu garaman atsungêa gin iruê iyung ifa gamp nida Imaus imingê rungê guntiê i Yerusalem isangê 7 mail. 14 Tuasarangan ini nan da ruan ifa iba i nam santan waêan mingêa nigi. 15 Gubuê rungê nida nan da ruan, da Yisu runggan ibawaê da iyung impruê da tuasarangan. 16 Da bitsintaê Anutu inang da ribarangan wafaringê Arangan u. 17 Da Arangan igut i ribarangan, “Agam ifis i nan idzuwai igi da yudzungê da ruam iyus in imingê sanab?” Da tuasarangan imunti untras ruta maran gagaingêan. 18 Ribarangan mangan nida Kerofas in igut i Arangan, “Mani u runtaê angu imingê wasaê i rib bada Yerusalem da agu anungê isruê i nam idzuwai waêan da gubuê iruê fada sib ugu?" 19 Da Yisu ini, “Nam idzuwai igi?” Da ribarangan ini, “Nam idzuwai waêan da Yisu, garam Nasaret, Arangan profet da ini nan da inang nam maran mangan ruta nampang imingê Anutu da garam gar santan maranggan. 20 Da aga rim marangê i Arangan aru nigi iba i uda garam Israil sinungê gabman Rom banginggan. Da bitsintaê garam pumuêa Anutu wain gudzun rusan da aga garam gudzunggangê impung Arangan, da itangin ifa gabman Rom banginggan da ini Arangan mampan da yis iyab gai mpara i ruan. Da gubuê iruê da bits ifa sib i nam igi. 22 Da nan fain ibiani, aga sagat rusangê fain inang aga runt fafun ibiani, tataê maratait aruani da ifa tauf bampun 23 da isau Aranga riniuriatsan, da itip iba da ini da agai i ribarangan itsanga angira iruêrun, da angira ini, ‘Arangan imunti marataê sib.’ 24 Da aga gangê fain ifa tauf bampun da itsanga nam ibi sagat ruas nidan, da anungê itsanga Arangan u." 25 Ida Yisu ini da ribarangan, “Agam uwayantam imaê da agam wangum ibabampaf da anungê imuaruts nan profet nidan ugu! 26 Ibianungê? Mani agam wasruê gin ibi Kristus, Garam Anutu Ragadan, nayu barabin ani sib raiyi da namus fada mumai gan tsarifan da uda bingan tsiraê gin?" 27 Da Yisu idziwar i ribarangan i nan miamun santan Moses da profet ruas akara yaba i Arangan ugu. 28 Gubuê ribarangan fa suda uts gamp fada gin igi da Yisu irib inang ibi rungê fadan. 29 Da bitsintaê ribarangan igaib runggan da irim udzungê rutin, da ini, “Nam inuf wasi da gubuê maran intsup, da warut aga nampai.” Ibinigi da Arangan yatangê ifan i ruta ribarangan mpadan. 30 Gubuê Arangan ruta ribarangan mpada i gada nam, da Arangan iyu bret da ifinti da ibrang da irim da ribarangan. 31 Ida rib iruê igi maran intap ruan da isruê i Arangan, da Yisu intsup utaê angu imingê ribarangan maran. 32 Tuasarangan ini nan da ruan ibiani, “Agi wangunggangê iparatat i nan da gubuê aru Arangan ruta agi nida nan da dziwara i nan akaran da agi mingêa sanab ugu!" 33 Da gubuê maran arigi da tuasaranga yuriê sung angu da itip ifa Yerusalem da iwaê da rib 11 ruta rib fain mpruêa ruan igi. 34 Da ribigi ini da rib iruê igi, “Nigi nan nidzun bingan, Nifutsarif imunti marataê sib da iwaê da Petrus." 35 Ida rib iruê igi ifis i nam idzuwai waêan da ribarangan mingêa sanab, da sruêa i Yisu da gubuê aru Arangan branga bret. 36 Gubuê ribarangan rungê nidan nan igi da ruan, da Yisu runggan iwaê imunti wasaê i ribarangan, da ini, “Nan nufan narut agam." 37 Ribarangan santan irunt fafun da irat, i maran ifur ibi itsanga garam ganun. 38 Da Arangan ini da ribarangan, “Ibianungê da agam irat da uwayant isu iruê i nam agam tsangandan? 39 Watsangan dzi bangingê da dzi fagangê, i dzi arangan ani! Warim bangim i dzi da watsangan. Garam ganun anungê isu nidzun da urungun ibi dzi aru agam tsangandan ani u." 40 Gubuê Arangan nida nan igi da isantingê bangin da fagan da ribarangan. 41 Da ribarangan ruwamuaruts i wain nam nugun tsiaêan da maran fura nan isisungê ribarangan, da Arangan igut in, “Agam nam gadan gam fain rumingê i gadan?" 42 Da ribarangan irim yafas taidan mangan da Arangan, 43 da Arangan iyu da igan imingê ribarangan maranggan. 44 Da Arangan ini da ribarangan, “Gubuê dzi ruta agam mpadan ugu da dzi ni nan sib da agam: Nan sib angu akara yaba i dzi mingêa Moses nanggan faidagin da profet ruas da Mint Tsarifa Anutu Gin ugu nasu nidzun." 45 Ida Arangan itus muantsi i ribarangan uwayantan i ribarangan sruêa i nan akaran wainggan. 46 Da ini da ribarangan, “Yakar nan ibiani, Kristus bungê awaê da nam tsakia da namamp, da gubuê suda iruê da bits, da namunti marataê. 47 Da garam bungê afis i Arangan binganggan nafan da garam utup santan, i garam parima i ruan, da Anutu siata i nanggan maisan rai. Bungê ais fagan gin namingê Yerusalem da nafan. 48 Agam wafis i nam santan agam tsangandan. 49 Waringantin, dzi bungê atangin Arangan aru Ramangê ragadan naba, da bitsintaê agam wampai Yerusalem ani nasangê nampang wagungê yantsanga agam." 50 Da Yisu imungê i riban atsungêa gin iwaê ifa Betani da iraê i bangin da ifinti ribarangan. 51 Gubuê rungê fintida ribarangan, da Anutu iyu Arangan sinungê ribigi iyab gunungun. 52 Da ribarangan idzaê fagan da itsarif Arangan da itip ifa Yerusalem ruta nugun tsiaêan tsiraê. 53 Da gubuê santan da ribarangan ifa Ungar Mararam da irim runggan santan i tsarifa Anutu.