Lukas 9

1 Gubuê Yisu nuêa riban 12 igi mpruêan, da Arangan irim nampang rutin da itangin ribarangan ifa ruta nan ragadan i daruda marapayam maisan rai i garam da nanga rini gingêan mara maran dauman da fisa i sisingê bini Anutu nanggan mpada tayangê gan garaman. 3 Da Yisu ini da ribarangan, “Gubuê agam nida yunga fadan, da anungê uda nam fain u â itip yunga gin, ma tayap farangêa nam in, ma nam gadan, ma moni, ma anungê uda ngarukui iruê u. 4 Ungar idzuwai agam fawaêa gin da mpada gin, da wampai arigi nasangê agam tanginda gamp igi rai. 5 Da bida garam santan mamida uda agam yaban, da gubuê agam tanginda gamp igi rai da watias faga ngaruntsuafam igi rai, i santingêa Anutu nugu tsakia gan." 6 Ibinigi da ribarangan ifa gamp gamp da ifis i sisingê bini da inang garam rinin gingêan idaum. 7 Da Herot, garam gudzun Galili, iringanti i nam santan waêan igi sisingê gan da arangan iyu uwayant ampi bingan gin. I rib fain ini ibiani, “Yowanis Ruruba Garam mampan ugu itip yuriê," 8 da garam fain ini, “Profet Eliya ibawaê,” da faingê ini, “Mani profet ruas ratar ugu mangan itip imunti marataê." 9 Da Herot ini, “Dzi saf Yowanis wan utap da bitsintaê garam idzuwai igi aru dzi ringanta i nanggan ani?” Da arangan intsaê i waêan da Arangan. 10 Gubuê aposel ruas batipa waêa sib, da ifis i nam ribarangan nangan ugu santan da Yisu. Ida Yisu iyu ribarangan angu da impruê ruan fada gamp manga nida Betsaida gin. 11 Da bitsintaê ampi tsiraê isruê i Yisu gan fada gin igi sib da yatsungê Arangan. Da Yisu yis yaring gin, da ifis i Anutu nanggan mpada tayangê gan garaman da ribarangan, da itip garam rinin gingêan iwaê bini. 12 Nam inuf sib da aposel 12 igi iba da Yisu da ini da Arangan, “Wani da ampi ani nadzarang nafa gamp uts uts mingêa ani i sauda nam gadan da mumai gan gingêa gin. I agi mpa nam manaê nam gadan maêa gin." 13 Da Yisu ini nan mungaê, “Agam runggam warim nam gadan rutin.” Da ribarangan itip ini, “Aga yu bret isiê 5 da yafas iruê angu, da bida agai nida rima nam gadan da ribani, da agai nafa baim nam asangê ampi tsiraê bingan ani!" 14 (I garam ampi igi garam runggan isangê 5,000.) Da Yisu ini da riban atsungêa gin, “Wani da ribarangan 50 nampruê ruan nampai nasangê utup utup." 15 Yisu riban atsungêa gin inang ibinigi da garam santan impai iruê. 16 Da Yisu iyu bret 5 da yafas iruê igi, da idantang iyab gunungun da yugin i nam igi da ibrang. Ida Arangan irim da riban atsungêa gin i faban da garam santan. 17 Da ribarangan igan da isuf wasi, da nam gadan pupumuts fain rumingêan, da intsungê da ifarangê basket 12 da ifungê. 18 Gubuê mangan da Yisu irut riban atsungêa gin angu impai da Arangan runtaê yugin, da Arangan igut i ribarangan, “Amaê, ampan santan ugu ini dzi mangan?" 19 Da ribarangan ini, “Rib fain ini Yowanis Ruruba Garam, da rib fain ini Eliya, da fain rungê ini, ‘Mani profet ratar ugu mangan igi itip imunti marataê.’ “ 20 Da Yisu igut i ribarangan, “Da agam? Agam ibuni manga i dzi?” Da Petrus ini, “Agu Garam Anutu Ragada mungê i rima garaman sib." 21 Da Yisu ifai nan i ribarangan i anungê nida nan igi wasi da rib fain u. 22 Da Arangan rungê ini, “Garam Narunggan bungê awaê da barabin ampi bingan namingê garam banginggan. Garam gudzun Israil, da garam pumuêa Anutu wain gudzun gan, da garam gudzupuê i Nan Faidagin bungê asiat Arangan rai da bungê ais funub, da gubuê suda iruê da bits da Arangan bungê amunti marataê." 23 Da Yisu ini da garam santan, “Bida manga nida atsungêa dzi da narim barun da wangunggan da maranggan furan, da gubuê sib angu da nabuaringê gai mpara i ruan gan da natsungê dzi. 24 I garam maran fura i rima runggan sib i nanggan mpada bini mingêa intap ani, da bungê arim ganunggan rai, da bitsintaê garam rima runggan rai i dzi, da bungê arim ganunggan sib. 25 I bida garam ufuma nam bunump santan intap ani, da rima ganunggan rai, da nigi naburim arangan sib nabianungê? 26 Da bida manga rinin miaêa i dzi da nanggangê, da dzi riningê bungê amiaê gin da gubuê dzi, Garam Narunggan, tipa badan da santingêa dzi da Ramangê da angira mararam nanggangê puatsadan wasi. 27 Dzi ni nan nidzun bingan da agam, rib fain rungê muntida aruani bungê atsanga Anutu nanggan mpada tayangê gan garaman sib raiyi, ida namus mampan." 28 Gubuê bida 8 fada sib i nan Yisu nidan igi, da Arangan iyu Petrus, Yowanis, da Dzems iyab mamai i udagin. 29 Da gubuê Arangan rungê udagin da Arangan maran iwaê maran mangan, da ngarukui gan iningining ibi tsuarip. 30 Da sung angu garam iruê, Moses da Eliya, iwaê da irut Yisu ini nan. 31 Rib iruê igi imunti ruta nam puatsadan, da ini nan i Yisu nanggan mampan bungê awaê uts angu namingê Yerusalem i sangêa Anutu nanggan ragada sib. 32 Petrus da rib ruta arangan igingê marampruê, da bitsintaê gubuê ribarangan maran taêan da itsanga Yisu nanggan puatsadan da rib iruê muntidan mpruêan. 33 Da gubuê Moses da Eliya nanga i tanginda Yisu rai, da Petrus ini da Yisu, “Tsiraê, bini angu i aga ruta agam mpada ani; aga naraf marayawaê iruê da bits nasangê agam â agu, da Moses, da Eliya.” (Petrus anungê isruê i nanggan nidan igi u.) 34 Gubuê arangan rungê nida nan da maraum iwaê da ibuafir ribarangan sib, da gubuê maraum nanga i buafiran da ribarangan irat. 35 Da nifun mangan iwaê imingê maraum wasaê da ini, “Nani dzi Narunggangê aru dzi ragadan ugu; waringant i Arangan." 36 Gubuê nifun nan igi waêa sib, da ribarangan itsanga Yisu runtaê angu rungê muntidan. Da ribarangan anungê ifis i nam tsangandan igi wasi da rib fain isangê gubuê guntiê bingan. 37 Da maiê mangan da ribarangan iruê mamai iba, da ampi tsiraê iwaê da Yisu. 38 Da garam manga mingêa wasaê i ampi tsiraê igi inuê, “Kidungwaga tsiraê, dzi gampun runggangê da agu i u tsanganda dzi narunggangê marub. I dzi narunggangê bitsintaê arangan igi. 39 Marapayam maisan inang da iyantsang arangan da sung angu arangan iyaiê tsiraê. Da yuntsiang i arangan da nifu fufuat iwaê i nifun. Maiê maiê da marapayam maisan igi yis arangan da iwaya nidzun angu da gubuê ampi bingan da wasangê i tirida arangan rai. 40 Dzi gampun runggangê da u ribam atsungêa i agu i daruda marapayam maisan igi rai, da bitsintaê ribarangan anungê isangê u." 41 Da Yisu ini nan mungaê, “Agam yangin gubuê aruani, agam garam nanggam muarutsan maêan da mamida atsungêa sanab rururungan! Dzi rut agam impai gubuê guntiê bingan, da gubuê idzuwai da agam muarutsan? Wayu narunggam igi naba." 42 Gubuê mamaê igi yunga fadan da Yisu, da marapayam maisan itapu arangan iruê intap da yuntsiang i arangan. Da bitsintaê Yisu impiê marapayam maisan i tirida mamaê igi rai da rinin dauman, da itip itangin arangan ifa da ramanggan. 43 Da garam santan irunt fafun gin da maran ifur nan i Anutu nampanggan tsiraê igi. Yisu Itip Ini i Nanggan Mampan (Matiu 17:22-23; Markus 9:30-32) Gubuê rib santan maran rufura nan i nam Yisu nangan da gubuê santan, da Arangan ini da riban atsungêa gin ibiani, 44 “Agam warim ringam bini angu i nan dzi nidan da agam ani! Garam mangan bungê arim Garam Narunggan nafa garam ipiap banginggan." 45 Da bitsintaê nan igi imingê isu marapatiê da ribarangan i anungê sruêa i nan igi wainggan, da ribarangan irat i guta i Arangan. 46 Yisu riban atsungêa gin yudzungê i nan da ruan i manga suda miamun i ribarangan. 47 Da Yisu isruê i ribigi wangunggan rima udzungê da ruan gin igi, da iyu mamaê narun isiê mangan iba munti isarimp Arangan. 48 Da Yisu ini da ribarangan, “Manga isa yaringê i mamaê narun mangan bida ani i atsungêa dzi, da yis yaringê i dzi. Da manga isa yaringê i dzi, da yis yaringê i aru tanginda dzi badan ugu. I manga aru rasuda runggan wasaê i agam santan da nigi isu miamun." 49 Da Yowanis ini, “Tsiraê, aga tsanga garam mangan isiat marapayam maisan i u binganggam, da aga ni da arangan i tanginda rai, i arangan anungê irut agai yatsungê agu u." 50 Da Yisu ini, “Anungê muntida sib in u, i garam mamida rima ipiap i agam da nigi su agamam mangan." 51 Gubuê uda Yisu fada gunungun ibasu uts da Yisu irim uwayantan santan i fada Yerusalem. 52 Da Arangan itangin garam sisingê imungê da yatangê Samaria gampan mangan i rima sisingê i tipa ruan i Arangan. 53 Da bitsintaê garam gamp mingêa nigi anungê yis yaring i Arangan u, i wain, Arangan ini fada Yerusalem. 54 Gubuê garaman atsungêa gin iruê Dzems da Yowanis tsanganda nam igi da igut in, “Nifutsarif, u maram ifur i agai nuêa dzaf mingêa gunungun ruêa ba da gada rib arani?" 55 Da bitsintaê Yisu itaningê da impiê ribarangan, 56 da ribarangan ifa gamp mangan. 57 Gubuê rungê yunga sanab fadan, da garam mangan ini da Yisu, “Dzi bungê atsungê agu i sanabam idzuwai u yunga gin." 58 Da Yisu ini nan mungaê, “Iyam buman igingê bampun gan, da apu dzufa maranguntung wagungê irim gitan. Da bitsintaê Garam Narunggan ungaran gingêa isa gudzunggan gin imaê." 59 Da Arangan itip ini ifa da garam mangan, “Watsungê dzi.” Da bitsintaê garam igi itip ini nan mungaê, “Nifutsarif, watangin dzi da dzi nampai nasangê dzi dzufungêa ramanggangê sib raiyi." 60 Da Yisu ini da arangan, “Wanang da rib mampan narim garaman mampan, da bitsintaê wafan da wafis i sisingê Anutu nanggan mpada tayangê gan garaman." 61 Da garam mangan rungê ini, “Nifutsarif, dzi bungê atsungê i agu, da bitsintaê wanang da dzi natip afan da nasu nam pas da narata utupangê bangin raiyi." 62 Da Yisu ini, “Garam gifa nam makau dzungêa gin da safa intap da tida taningêa fada barun wadaum i nanga gum i Anutu nanggan mpada tayangê gan garaman u."