Koulousi 1

1 Ngko Poulɨêni Kɨlais Jisasɨye hungkuno aêamumo uyohojɨkuêmofo (apousel) syohoênjo hwoênyoho. Anɨtu olo syoho losoêno kakoe huno mtaêni nɨhwosopoêmentisofoho. Ngkoênji nenɨngkwaêwehwo Timoutiênji nekwo nohumentai olo iyoswo loso sekwo aêamu Koulousi sokuneêno mtɨêmokalokuhwayo. Sekwo Anɨtuye aêamu soku Kɨlaisɨmo sɨmeho hiêntnnono uyontɨfi kakineêno yokumpohnênyo lohokwofo. Osoêno emoênɨngkohoho. Nanɨngkwohwo Anɨtu kako sekumo yoêmayo wopɨngo selohofɨhwosi sekwoe sɨmeho pompenjiyo wosejapmmontonoho. Osoêno emoênɨngkohoho. 3 Nekwo jomo ujoso engolopohamo nekwo sekuneêno isamoyoka nakwoe Hwe Engo Jisas Kɨlaisɨye Mpohuneêno isamoyoka ulalokuhwoyo. 4 Hwapɨngoso sekumneêno hungkuno ole upoênalokuhwayo. Hohonta sɨmoêmo neêmo Anɨtuye hungkuno wopɨngo seêmaêmentiso sohonta sekwo haloho poêmentohofofoho. Yoêmayo wopɨngo Anɨtu sekumneêno selohofone soêno ahwomomo womantɨfeho. Osoêno sekwo Kɨlais Jisasɨmo sɨmeho hiêntnnono nehopi uyontɨfi Anɨtuye hwe moyaêmi hopiênonohino soku sekwo sɨmeho afa inalokwofo. Anɨtuye hungkuno wopɨngoso seêmaêmentiso hopaso ango yawojoêmeemo uêmalofoho. Hungkuno wopɨngo loso upaênontɨfi yahino wopɨngo yalokwofo. Sekwo oso hungkuno sɨmoêmo upaênɨmentohofo sohonta Anɨtu sekumo sefoêmayoêne soêno huno seyahonɨngki oso yahino wopɨngo somo emaêmentohofofoho. 7 Epeefɨlos sohwo kako Anɨtuye hungkuno wopɨngo hiso losetɨhwamentiso soêno sekwo kakineêno huno seyohoho. Osohumo nekwo kakineêno sɨmeho afa uyalokuhwoyo. Kako Kɨlaisɨye syoho ulohofiyo wopɨngo hweho. Kako nekwoênji syoho afaênonohino hweho. Kako hofiyo efoêmawoênɨngkiso sohwo Kɨlaisɨye syoho somo wopɨngo mokosyohumawoênɨngkohoho. 8 Anɨtuye Towahuno Wopɨngo kako sekumo sɨmeho afa inyo yahino wonyoangkafo sejapmmentiso soêno Epeefɨlos kako elɨmentisofoho. 9 Oso hungkuno homo somo sɨmoêmo upoênontai nekwo oso homo somo Anɨtumo sekumneêno jomo ulomawoênɨngkuhwoyo. Olo soêno jomo ulalokuhwayo, Anɨtu sekwo yoêmayo ifitnneêento lɨmentisoso sekwoe hunomo womehuêmeesesyono. Anɨtuye Towahuno Wopɨngo sohwo kako nosefoêmahonɨngkuhwosi sekwo Anɨtuye yahino wopɨngo soêno huno wopɨngo tɨpemafɨkuji Anɨtuye hunomneêno huno waseyɨmontonoho. Osoêno jomo ulalokuhwoyo. 10 Oseso yoêmayo yahino wopɨngo nakwoe Hwe Engo hi umoênone somo sekwo inɨngkafijoso sekwoe yahino humayoso kakoe sɨmeho wopɨngo umokantɨfeho. Yoêmayo syoho sekwo ifijoso ne umoênɨmontonoho. U sekwo Anɨtumneêno huno seyososo oso hunoso engo umoênɨmontonoho. 11 Olo soênji sekumneêno jomo ulalokuhwoyo. Nakwoe Hwe Engo sohwoe yokumpohnênyo wonyoangkafoso kako yokumpohnênyo setofɨhwosoêno sekwo yokumpohnênyo lohofɨkuji yoêmayo tango seêmahwosoêno sekwo sɨmeho wopɨngoênji wohumantɨfeho. 12 Oseso sɨmeho wopɨngoênji nohumafɨkuji nanɨngkwohwo Anɨtumo isamoyoka ulantɨfeho. Hwapɨngoso kako kakoe mehomi somneêno yoêmayo wonyoangkafo ulohofoneso mapitnneêento imentisoso sekwo mayoso hoponoho. Oso hiso Anɨtuye aêamu hopiênonohino hnênwi pomponahopo humalohwone hnênwi nakwo womantanoho. 13 Hohonta mewoso sohwafe kanɨngkwohwo Seten kako sɨkwoêmjohoêmo yokumpohnênyo nemokosyohumamentisofoho. I olohonta Anɨtu kako kakoe Hwomu angaênohino sohumneêno umoênalokunjo sohwoe temtitofomo menehumajɨêmentiso hnênwi pomponahopo humalohwono. 14 Honɨngkano wonyoso nakumo nokiloêmokomokonesyohumentanɨngki Anɨtuye Hwomu Jisas kako nakwoe honɨngkano wonyoso wae enaofonto nakumo isɨhutofonemaêmentisofoho. 15 Nakwo Anɨtu sohumo muhwonyoênjo iwoênɨngkuhwone sohwo kakoe Hwomu Kɨlais aêamu uhwonɨmentohofo sohwo kako Anɨtuênji nɨhuêno afafoho. Anɨtu kako nakwoe hwaho yoêmayoso mamtɨêmokummentiso sohonta Jisas Kɨlais kako humamentisofoho. 16 I Anɨtu kakoe Hwomumo ulahonɨngki Kɨlais huhwo sohwo yoêmayo ahwomomjo hwahoponjo kako mtɨêmokumentisofoho. Yoêmayo uhwonɨwoênɨngkuhwone soênji yoêmayo muhwonyoênjo iwoênɨngkuhwone soênji kako mtɨêmokumentisofoho. Kako Setenênji kakoe towahuno wonyo sohwanji mtɨêmokumentisofoho. Kako aêamu ahwomomjo sohwamo mokosyohumayo sohwanji aêamu hwahoponjo sohwanji mtɨêmokumentisofoho. Yoêmayo hopiênonohino mtɨêmokumentisoso Anɨtu kako Kɨlais kakimo enjwaêmo hoênahumentisofoho. 17 Yoêmayo mtɨêmokumentisoso kako hwapɨngo hweho. Kakoe yokumpohnênyoênji yoêmayoso hulɨêmokomokosyohumawoênɨngkiso hweho. 18 Nakwo kakineêno inɨngkawoênɨngkuhwone soênwi kakoe aêapahoênwoho osoêno Jisas nakwoe hwe mnokino engoênjo hweho. Nakwoe songo humayoso kako hwapɨngo hweho. Kako poyo peênɨngkahonɨngki Anɨtu kakimo nɨhuêno sɨêmomo neêmo ulɨkaêmentiso soêno kako yoêmayo hopiênonohino somo uyakolofonto mokosyohumayo hweho. 19 Anɨtu kako kakoe Hwomu Jisasɨmo uhwosopoêmentisoso nje huno nje humayoso kako hopiênonohinoso womano lonto uyɨmentisofoho. Ose uyɨmentisoso Jisasɨênji kanɨngkwohwo Anɨtuênji sikoe humayo nɨhuêno afafoho. 20 Yoêmayo ahwomomjo soênji hwahoponjo soênji Anɨtuye mangohwa imoênɨmentɨhwoniênwoho. I osoêno nakwo Anɨtuye mango sohwanaênɨmneêno Anɨtu kako sɨmeho afa unano lahonɨngki Jisas kanɨngkwohwoe hunomo inɨngkowahonɨngki iyo hwojiyafɨkuênnyo somo aêamu sohwa Jisasɨmo fonjintoêofosyahonɨngkofi Jisas kakoe honɨyo usɨhumaêmentiso soêno Anɨtuye sɨmeho pompengo ifɨsyɨmoêmentisofoho. Osoêno Anɨtumo uêmayoêne honɨngkanoso nakumneêno hwosampoêmentisofoho. 21 U sekwo soku hohonta sekwo huno wonyoênji nohumantɨfi honɨngkano wonyo imotofo soêno Anɨtuye mango sohwasi Anɨtuênji mohumammotofo kuyoho. Oêo sekwo ikanopo humamotofo kuyoho. 22 I olohonta Anɨtuye hwomu sekumneêno poyo peênɨmentiso soêno Anɨtu kakoe aêamu ne kakoênji mokotɨkuênyoêne mesehumatɨêmentiso kuyoho. Osoêno Anɨtu sehwosopoêmentiso soku kakiyepono ipesemotasɨhwosi osopo sekwo honɨngkano wonyo aneênjo wohumantɨfeho. Sekwo Anɨtuye sɨmanopo lohofɨkuji wonɨmango masenonehoho. 23 I sekwo syoho ole fiyɨmno, Anɨtuye hungkuno ne somo sekwo sɨmeho hiêntnnono uyɨkuji kakoe honɨngkanomo yokumpohnênyo fɨkemokosyalohopmno. Yoêmayo hwahoponjoso honɨngkano hwasyomo ipesomotaweloho. Oêo, yoêmayo hungkuno wopɨngo upaênɨmentohofo somo nusɨkwajɨkutoho. Hungkuno hiloso aêamu hopiênonohino olo hwaho lopo humalofo sohwamo uêmayoênefoho. Ngko Poulɨêni olo hungkuno wopɨngo homo losomneêno syoho ulohofiyo hwoênyoho. 24 Ngko sekumo sefoêmayoêne tohino malokwe soêno sɨmonyo yalokweno. Hwapɨngoso sekwo Anɨtumo inɨngkawoênɨngkohofo soku sekwo Kɨlaisɨye aêapaho fehohnjo kuyoho. Kɨlais kakoe aêapaho hnênɨmo humaso soêno nakwo aêamumo ufoêmayone tohino malokuhwone soêno Kɨlais huhwo tohino malofoho. Oso tohino Kɨlais malokunjoso ngko moiêwo esojwaofoêneso ufoêmalokweno. 25 Anɨtu kakoe aêamu ne sokuneêno syoho esotɨhwayoêne nɨhwosopoêmentiso hwoênyoho. Osoêno sefoêmayo hisoêno kakoe hungkuno hopiênonohinoso wolosetɨhwamneêno yohono. 26 Hohonta olo hungkuno hiloso nɨhuêno hiyasoêmo woêmojo soêno aêamu sɨmoêmo neêmtaêango hopiênonohinoso mupaênɨmmentohofofoho. I olohonta Anɨtuye aêamu ne sohwamneêno olo hungkuno hiloso utɨhwaênyopo nto iêmofapohoho. 27 Olo hungkuno hiyasoêmo woêmojo loso olenoho. Kɨlais kako sekwoe sɨmehomo humaho. Osoêno hwangku sekwo Anɨtuênji wonyoangkafopo humayoêne sekwo hontohumalofo. Olo hungkuno wonyoangkafo loso aêamu Juta somneênohinɨêmaho. Oêo, aêamu temtitofo hopiênonohino soku upaênɨfitnneêento lonetɨhwamentisofoho. 28 Osoêno nakwo Jisas Kɨlaisɨmneêno aêamu hopiênonohino sokumo hungkuno yolohoênohini losetɨhwalokuhwono. I nakwo aêamu angaêno angaênohino olo hungkuno loso huno hofiyo ehohosasiyoêne soêno huno piênɨngo engo syafɨsyɨwoênɨngkuhwono. Hwapɨngoso nakwo ole namoênɨngkohoho. Aêamu nɨhuêno hopiênonohinoso hofɨko honɨngkano wonyomneêno iêwaho ikuji Kɨlaisɨmo inɨngkayo yahinoso engo imoênɨngkuhwosoêno hofɨko aêamu ne imoênɨngkuji Anɨtumo uêmapitnneêentani syoho engo yalokuhwono. 29 Olo syoho tohohmtnnoênjo yalokwe loso nje yokumpohnênyoênjɨêmaho. Oêo, Kɨlais Jisas kako kakoe yokumpohnênyo ntapmmentiso soênji yalokweno.