Hipɨlu 4

1 Anɨtu kako nakumo hungkuno ole nalɨmentisoso weho. Ole nalohi, Sekwo nje usijoêno humayo yahino somo fosyohumamno. Ose nelalofoho. Osoêno hwe fihwo kako nakwoênji humaso sohwo kako Anɨtuye honɨngkanomneêno usijoêno humayo yahinoso kako motɨpɨhwonyoênjo umo lɨhwasi nakwo iyoho wonanono. 2 Nakwo Anɨtuye hungkuno wopɨngo upoênantaneso aêamu Isɨlaelɨso upaênɨmotofo oso paênyoênwoho. I osoêno hofɨko hungkuno wopɨngo ko upoênɨngkahonɨngkofi hungkuno hiso mufoêmaêmmentisofoho. Hwapɨngoso hofɨko ko upaênontɨfi hungkuno homo somo hofɨko sɨmeho hiêntnnono muyɨmmentohofofoho. 3 Hohonta Anɨtu kako hwahoênji ahwomoênji yoêmayo soênji moiêwo mtɨêmokonto kako usijoêno humamentisofoho. Nohumanto aêamu kakoe hungkunomo hwotoho fɨfijo somneêno ole lɨmentono, Oseso ngko nje sɨmeho tohino nɨmnɨngkahonɨngki hungkuno yokumpohnênyo ole lɨmentoho, Nje usijoêno humayo yahinoso hofɨko motɨpemapitnnehofo. Nɨhuêno awonoho. Ose lɨmentisofoho. I osoêno nakwo Anɨtumo sɨmeho hiêntnnono uyɨwoênɨngkuhwone hnênwi nakwo Anɨtuye usijoêno humayo yahino somo humalohwono. 4 Anɨtuye hungkuno mtɨêmokumentohofo somo hwe fihwo sɨkuno iyoho humayo somneêno ole mtɨêmokumento, Anɨtu kako yoêmayo mtɨêmokumentiso syoho moiêwo esojwaofonto sɨkuno aho fehohnjo hopiênonohino nomêne mtaêni hufaêuyo somo usijoêno humamentisofoho. 5 Olo hungkuno losoêno apaêno ole mtɨêmokumento, Hofɨko nje usijoêno humayo yahinoso nɨhuêno motɨpemapitnnefoho. Ose mtɨêmokumentisofoho. 6 Aêamu sɨmoêmo Anɨtuye hungkuno upaênɨmentohofoso hungkuno homo somo sɨmeho hiêntnnono muyɨmmentohofo soêno Anɨtuye usijoêno humayo yahino somo motɨpemaêmentohofofoho. I osoêno aêamu nomêneso Anɨtumo sɨmeho hiêntnnono uyɨmentohofo soêno hofɨko Anɨtuye usijoêno humayo yahinoso wotɨpemantɨfeho. Oso hungkunoso neêno weho. 7 Oseso Anɨtu kako nomêne sɨkuno hoênahumentisofoho. Oso sɨkuno hoênahumentiso hisoêno ole lɨmento, Olohontanoho. Oso sɨkuno hoênahumentisoso soswo piênɨngo uyokolofahonɨngki oso hungkuno nto seloheso Anɨtu Ntefitɨmo uyahonɨngki ole mtɨêmokumento, Olohonta sekwo nje hungkunomo haloho upaênɨfijoêmanji sekwo hahnênyo ikutoho. Ntefit ose mtɨêmokumentisofoho. 8 Jousyɨwa kako Mousesɨye pijohinomo maêmentiso sohwo kako aêamu Isɨlael somo hwaho Kenan sopo ipemotawomentisofoho. Oso hwaho hopo sopo Anɨtu aêamu Isɨlael somo olopo nɨhuênahone usijoêno fosyohumamno ulontentesi Anɨtu kako hwangku noêmo nomêne sɨkuno usijoêno humayoêneso mohoênasyɨhwonesohilo. 9 I osoêno Anɨtu kako nomêne sɨkuno usijoêno humayoêne hoênahumentiso soêno nakwo huno ole nayohi, Usijoêno humayo yahinoso Anɨtuye aêamumneêno weho. Anɨtu kako sɨkuno aho fehohnjo hopiênono nomêne mtaêni hufaêuyo somo usijoêno humamentiso paênyoso weho. 10 Hwe fihwo kako Anɨtuye usijoêno humayo yahino somo wohumamo loso sohwo kako yoêmayo syoho yonteso kakoe yokumpohnênyoênji miyonehoho. Oêo, yoêmayo syoho yonteso Anɨtuye yokumpohnênyoênji iwoênɨngkiso hweho. Osoêno kako Anɨtuye usijoêno humayo yahino somo humaho 11 Nakwo nakwoe sɨmano sopo yoêmayoso nopujonaofɨhwosoêno yokumpohnênyo elɨfotɨêmesɨhwasi Anɨtu kakoe usijoêno humayo yahino somo wohumano. I hohonta aêamu Isɨlaelɨso hofɨko Anɨtuye hungkunomneêno hahnênyo imentohofo paênyoso nakwo oso hopa yasoso nakwo Anɨtuye usijoêno humayo yahinoso nakwo motɨpemanehwono. 12 Anɨtu kakoe hungkunoso neêno nowentanɨngki hungkuno hiso ipisayo ne intoênalofoho. Nakwo huno moiêwonoho. Sɨhu sɨhumampoênyo yohosi yohohnjoso yahwopaho mɨkufo yokino osomo kujomotasyɨwoênɨngkiso oso hopa Anɨtuye hungkunoso nakwoe sɨmeho somo oso hopa nelohofalofoho. Hungkuno hiso nakwoe sɨmehomo yoêmayo mnaweso nakwoe hunomo yoêmayo mnaweso netɨhwawoênɨngkisofoho. Hiyaso momokosyohumanehwono. Osoêno Anɨtuye hungkunoso oso sɨhu sɨhumampoênyo yohosi yohoênjo somo yakoloênnyofoho. 13 Yoêmayo Anɨtu mtɨêmokumentisoso Anɨtuneêno hiyaso mawenehoho. Yoêmayo hopiênonohino somo utɨhwaênyopo wentanɨngki Anɨtu kako uhwonalofoho. Yoêmayo yahino iwoênɨngkuhwone soêno tɨfi noêmo Anɨtu nonalohononefoho. 14 Nakwoênji Anɨtumo ufohiênyoêne sohwo Anɨtuye Hwomu Jisasɨyoho. Kako ahwomo ne somo Anɨtuênji humaho. Osohumo sɨmeho hiêntnnono uyalokuhwone soêno aêamu nomane somo ulɨwoênɨngkuhwono. Osoêno nakwo oso sɨmeho hiêntnnono uyo somo aho yokumpohnênyo wokemokosyohumano. 15 Jisas nakwoe hwaho lopo nohumentanɨngki yoêmayo honɨngkano wonyomneêno nakumo impoênonetɨmawoênɨngkiso hopaso Jisasɨmo impoênɨtɨmaneso kako honɨngkano wonyo nɨhuêno miyoênjo hweho. Osoêno yoêmayo wonyoso nakumo umpoênonetɨmaêmto ihwosoêno Jisas kako nakumneêno hitoho ulofɨhwosoêno kako wonefoêmaêmontonoho. 16 Osoêno nakwo iyoho miyoênjo ihwasi kanɨngkwohwo Anɨtu osohumo yoêmayo soêno jomo ulano. Kako nakumneêno hitoho ulofoso hwapɨngo hweho. Oseso yoêmayo tango neêmaso sohonta nakwo Anɨtumo jomo ulɨhwasi kako nakumo nefoêmahwosi wopɨngo wonalohoêmontonoho.