Luk 4
PNG1 Anɨtuye Towahuno Wopɨngo sohwo Jisasɨye sɨmehomo uhumahonɨngki Jisas kako oso Mijo Joutan nulɨkoêmahonɨngki Anɨtuye Towahuno Wopɨngo sohwo Jisasɨmo hwaho wonyo aêamu mohumunyo soponeêno ipemotawomentisofoho. 2 Oso hopo sopo Jisas kako neêno nohumentanɨngki Seten kako Jisasɨmo yamofo ulohofontanɨngki sɨkuno fouti (40) memjaoêmentisofoho. Oso hohosohonta Jisas kako wosopayo manyoênjo humamojo sohwo kako mijoho engo peênɨmojofoho. 3 Seten kako Jisasɨmo uêmanto ulɨmento, Kɨko Anɨtuye Hwomu Nehwosɨêmanji olo sojo lomo hungkuno ulohojoêno wopayo umoênono. 4 Ose ulahonɨngki Jisas ulɨmento, Anɨtuye hungkuno ole nalɨwoênɨngki, Aêamu wosopayoênohini nɨngkuhwoso sohwo kako itoêno mohumanehoho. 5 Ose ulahonɨngki Seten kako Jisasɨmo hwofɨkiênyo poneêno sɨhwojamentisofoho. Osopo ntaêni Seten kako hwaho hopiênonohino aêamu yofe engoênjo sohwa mokosyohumawoênɨngkohofoso Jisas uhwonono lonto nɨhuêno komoêno ujo ehontojwahumentisofoho. 6 Oseso Seten Jisasɨmo ulɨmento, Kɨko ngkineêno hwomtame ntohofohojoêno ngko oso hwaho hopiênonohino somo mokosyohumayoêne yokumpohnênyo soênji yofe engo soênji kikimo wokijapmmonneêno yohono. Yoêmayo uhwonɨngkohino loso njeênohinofoho. Ngko hwe fihumo uyɨmo lɨmeêmanji ngko huhwo sohumo uyɨmo lɨmeso hoponoho. Kɨko ngkineêno hwomtame wantohoêmonntaho. 8 Ose ulahonɨngki Jisas ulɨmento, Anɨtuye hungkuno ole nalɨwoênɨngki, Kɨko jɨje Hwe Engo Anɨtu kakineênohini hwomtame ulohofo. Kakineênohini syoho ulohofiyɨmno. Ose ulɨmentisofoho. 9 Osohonta Seten kako Jisasɨmo Jelusalemmjo Anɨtuye tajo ango engo yokintaho sopo sɨhumojawento ulɨmento, Kɨko Anɨtuye Hwomu hwosɨêmanji kɨko olopo ntaêni filɨkofamofo. 10 Ose ulɨkwato lohofonto ulɨmento, Anɨtuye hungkuno ole nalɨwoênɨngki, Anɨtu kako kakoe aêamu ahwomomjo somo uluhwosoêno hofɨko kikimo hofiyo wokufoêmantɨfeho. 11 Hofɨko jɨje ahomo aho kumakukuji jɨje sɨfemo sojo mentofomatnnohino. Tohinoso nɨhuêno momatnnohino. 12 Ose ulahonɨngki Jisas ulɨmento, Anɨtuye hungkuno ole woênnyofoho. Kɨko jɨje Hwe Engo Anɨtu sohumo yamofo nulohofohotoho. 13 Ose ulahonɨngki Seten kako Jisasɨmo yoêmayo yamofoso moiêwo ulohofonto kako nomêne sɨkunomo Jisasɨmo apaêno yamofo ulohoêmneêento uhwatɨêmoêmentisofoho. 14 Jisas kako hwaho Ngkalili soponeêno asomo umentisoso kako Anɨtuye Towahuno Wopɨngofe yokumpohnênyoso hiênjohwo umentisofoho. Oso hwaho Ngkalili hopo soponjo ango soêmeemneêno yoêmayo hungkuno Jisasɨneêno hoênɨngkamentisofoho. 15 Jisas kako tajo ango weêe somo humanto Anɨtuye hungkuno lutɨhwawoênɨngkahonɨngki hofɨko oso hungkuno homo somo upaênontɨfi kakoe yofe hoênomaêmentohofofoho. 16 Jisas kako weêe sohwo humamojo ango Nasalet sopo kako engo wento oso hopo sopo humamentisofoho. Jisas kako oso ango weêe sopo asomo wento kako sɨkuno iyoho humayo somo Anɨtuye tajo ango weêe somo syuwoênɨmojo somneêno humentisofoho. Oso ango homo somo aêamu humentohofo somneêno Anɨtuye hungkuno atofo ujoêne Jisas lɨkofa lohoêmentisofoho. 17 Nolohofahonɨngki hofɨko oso hungkuno Anɨtu Aisaiyamo uyahonɨngki iyoswomo mtɨêmokumentisoso Jisasɨmo uyɨmentohofofoho. Jisas kako iyoswo hiso nomanto fisakuêmentisoso kako hungkuno ole mtɨêmokinyoso tɨpemaêmento, 18 Anɨtuye Towahuno sohwo kako ngkimo nɨhumanto ngkimo Anɨtuye hungkuno wopɨngo aêamu yoêmayo somneêno umofonyo iwoênɨngkohofo somo ujoêne nɨhwosopoêmentisofoho. Olo kakoe hungkuno hiloso ujoêne nɨhwatɨmentiso hwoênyoho. Sekwo aêamu impoêangomo intoênawotofo soku sekumo impoêango somtaêni ngko isɨhutofosemahmêmeêno sekwo fohumpopmno. Sekwo aêamu tɨmpiênyo soku apaêno tɨmo fohonɨmno. Aêamu yoêmayo tango uêmantesomo ngko sekwoe syoho nohayo semokiyoêne lonɨhwatɨmentiso hwoênyoho. 19 Anɨtu kako kakoe aêamu ne somo asomo utɨmayoêne sɨkuno somneêno ujoêne lonɨhwatɨmentiso hwoênyoho. 20 Jisas ose ulonto kako iyoswo homo somo popojonto hwe iyoswo hiso mokosyohumawoênɨngkiso sohumo uyonto kako ampo humamentisofoho. Tajo ango weêe somjo aêamuso hofɨko Jisasɨmo tɨmo yokumpohnênyo humuhwontohumantohofofoho. 21 Oseso Jisas kako kakoe hungkuno lutɨhwayoso lomaêmentisofoho. Ole ulɨmento, Oso Anɨtuye hungkuno mtɨêmokinyo somjo seloheso sekwo nupaênɨngkohofoso ne imoênalofoho. 22 Jisasɨye hungkuno homo somo upaênontɨfi yomo yontɨfi hofɨko kakoe hungkuno wonyoangkafo somneêno huno piênɨngo syafɨsyontɨfi kakoe yofe hoênomantɨfi hnnɨmentohofi, Olo huno wopɨngo loso pipi tɨpemaêmasoto. Kako Jousepɨye hwomu hwolaho. 23 Ose hnnɨngkahonɨngkofi Jisas hofɨkimo ulɨmento, Ngko huno niyohoho. Sekwo olo hungkuno hohonta lɨmotofo loso ngkimo wontantɨfeho. Aêamu somo wopɨngo imokuhwajɨwoênɨngkino sohwosi kɨko kakwoêyohwo sohwosi wopɨngo hmmokinyo. Hungkuno yolohoso ole wontantɨfeho. Yoêmayo yahino wonyoangkafo kɨko ango Koponeyam humanji imotnno soêno nakwo nto upaênɨmalohwone hopaso kɨko olo jɨje hwapɨngo loponjo aêamu hnênɨmo fonalohofo. 24 Ose ulonto ulɨmento, Ngko hungkuno nehopiênohino waselɨmonneêno yohono. Aêamumo Anɨtu hungkuno uyahonɨngki lɨmojo sohwoe aêamu hwapɨngoponjoso hofɨko kakoe hungkuno somo itoêno minɨngkawoênɨngkiyohofo. 25 U, nehopi. Hohonta Ilaija kako hwaho Isɨlael humamojo sohonta ifoyo masiyoênjo neêno nohumentanɨngkofi soswo hufaêu sɨhune hamno aho fehohnjo hopiênonohino nomêne mtaêni angaêno uyakoloêmentisofoho. Oso hohosohonta mijoho mɨkunɨmposo iêmofopahonɨngki apɨwojo sofa piênɨngo oso hwaho Isɨlael sopo humamentohofofoho. 26 I osoêno Anɨtu kako Ilaija sohumo kako kakoe hwapɨngo Isɨlael sopo apɨwojo fisimo ufoêmayoêne uhwatɨmentisoêmaho. Oêo, Anɨtu kako hwaho Saitoun ango Salefat oso ponjo apɨwojo angaênohino simneêno yoêmayo wonyoangkafo aêamu miyɨwoênɨngki yohofoso ulohofoneêento uhwatɨmentisofoho. 27 U, nomêne hungkuno mneêno fɨsyafɨsyo. Hohonta Ilaisa Anɨtu mtaêni hungkuno lutɨhwaêmojo sohwo humamojo sohonta oso hwaho Isɨlael sopo aêamu uyo nɨhuêno wonyoso piênɨngo engoênjo humamotofofoho. I osoêno Ilaisa kako kakoe hwapɨngoponjo aêamu somo wopɨngo umokumentisoêmaho. Oêo, kako hwe angaêno hwaho Siliyantaêango Naman sohumnohini wopɨngo umokumentisofoho. 28 Jisas ose ulahonɨngki aêamu oso tajo ango homo somo humohumantohofo aêamuso hungkuno hiso upoênantɨfi sɨmeho tohino umnɨmentisofoho. 29 Hofɨko nolɨkafontɨfi Jisasɨmo aho kompemotawentɨfi ango pone engo somo Jisasɨmo momonyomo uyohotofano lontɨfi kompemotawomentohofofoho. Oso ango antɨme hiso hwofɨkiênyo yokintahopo molinyofoho. Oso hwofɨkiênyo sopo nohumantɨfi Jisasɨmo hoênomehwasi wohoênaofano lontɨfi ko imentohofoso 30 Jisas kako hofɨkoênjo ajwoêmo womentisofoho. 31 Jisas kako hwaho Ngkalili ango Koponeyam neêno umentisofoho. Osopo nohumanto kako sɨkuno iyoho humayo somo aêamu piênɨngo somo Anɨtuye hungkuno lutɨhwamentisofoho. 32 Aêamuso hofɨko kakoe hungkunomo upaênontɨfi yomo imentohofofoho. Hwapɨngoso aêamu sɨkuno iyoho humayo homo somo hungkuno lɨmotofoso hofɨkoe huno mtaêni majofoho. Oêo, nomêne aêamu ulɨmotofoso ulɨmotofofoho. I, Jisas Anɨtuye huno ne somtaêni hungkuno wopɨngo tɨpemanto yokumpohnênyo soênohini lutɨhwamentisofoho. 33 Oso tajo ango weêe homo somo hwe towahuno wonyoênjo fihwo nohumanto kako mango mohmêno ole ulɨmento, 34 Hoe, Jisas Nasaletnntaêango sohwosi, kɨko nakumo peho wonalohoêmneêno sopalokuno. Kɨko nakumo wonyo wonamokumonneêno losopalokuno. Ngko kikineêno huno niyohoho. Kɨko Anɨtuye Hwomu Wopɨngo Ne hwosoho. 35 Ose ulahonɨngki Jisas kako towahuno wonyo sohumo yoka ulɨmento, Mampiênyo fosyohumaho. Kɨko olo hwe lohumo ulɨkoêmaho. Ose ulahonɨngki towahuno wonyo huhwo sohwo kako hwe sohumo aêamu piênɨngoênjo sopo hwahopo yohotofasyonto ulɨkoêmanto hwe sohumo nomêne tohino muyoênjo imentisofoho. 36 Aêamu ose uhwonontɨfi yomo engo yontɨfi hofɨko mjahnnɨmmentohofi, Olo hungkuno yokumpohnênyo hiloso peho hungkuno ulahonɨngki humpehofo towahuno wonyo sohwafo. Ose hnnɨmentohofofoho. 37 Oseso Jisasɨmneêno hungkunoso angoêmeemneêno hoênɨmentisofoho. 38 Jisas kako oso tajo ango somtaêni swaponto Saimounɨye angomo humentisofoho. Saimounɨye konemi siye aêapahoso tohohmtnno mɨkunɨmposoênjoho. Oso hisoêno hofɨko Jisas oso aêmu simo ufoêmayoêno joho lutɨmaêmentohofofoho. 39 Jisas kako aêmusi fosyowentanjo sopo lohofawento kako aêapaho tohohmtnno hwapɨngo sohumo yoka ulɨmento, Kɨko mpano. Ose ulahonɨngki kakoe aêapaho tohohmtnnoso moiêwo imoênɨmentisofoho. Moiêwo imoênɨngkahonɨngki aêmusi kako komoêno nolɨkafonto aêamumne wopayo iloho humisyofoho. 40 Mofehiênyo ikwoêmokahonɨngki hwe moyaêmi hofɨkoe aêamu mnokinoênjo somo Jisasɨênjo soponeêno motɨhuêmokumentohofofoho. Kako aêamu angaêno angaênohino homo somo aho kisasyonto kako hwe moyaêmi hopiênonohino somo wopɨngo umokumentisofoho. 41 Jisas kako hwe moyaêmi piênɨngo engo somtaêni towahuno wonyo wae yaoêmentisofoho. Oso towahuno wonyo hiso hofɨko joho mohmêno ole ulɨmentohofi, Kɨko Anɨtuye Hwomu Ne hwosoho. Ose ulɨmentohofofoho. Hofɨko Jisas Kɨlais sohwo ahwomo mtaêni Anɨtu uhwatɨmentiso hweho huno umentiso soêno Jisas hofɨkimo yoka ulɨmento, Sekwo nomêne hungkuno ulɨkutoho. Ose ulahonɨngki hofɨko mampiênyo humamentohofofoho. 42 Imɨngo ne soênji Jisas oso ango hopo sopo nulɨkoêmanto hwaho aêamu mohumunyo soponeêno ngkoênohini weêenehwo wohumamo lonto umentisofoho. I osoêno hwe moyaêmi hofɨko hafɨhafe tɨpmêmantɨfi uêmaêmentohofofoho. Uêmantɨfi yokumpohnênyo ulɨmentohofi, Kɨko nakumo nonahwotɨêmofohotoho. Kɨko nakwo Koponeyam lopo wohumentɨhwano. 43 Ose ulahonɨngkofi kako ulɨmento, Aêamu angoêmeemjo somo Anɨtu kako wopɨngo wosemokosyohumamteêno yalokunjo soêno ngko hofɨkimo hungkuno wopɨngo hiso wolɨjumoêmonneêno yohono. Anɨtu kako oso syoho hisoêno nɨhwatɨmentiso hwoênyoho. Ose ulɨmentisofoho. 44 Oseso Jisas kako Anɨtuye hungkuno wopɨngoso hwaho Jutiya soponjo tajo ango angaêno angaênohino somo humolutɨhukuêmofisofoho.