Matɨyu 15

1 Oso hohosohonta aêamu Falisi sohwanji aêamu honɨngkano hungkuno lutɨhwamotofo sohwanji hofɨko Jelusalem ulɨkoêmantɨfi hofɨko Jisasɨyepono pmmentohofofoho. 2 Nuêmantɨfi ulɨmentohofi, Jɨje inomokomoyo lohwa nakwoe neyakwosafe yahino somo minɨngkayoênjo pehoêno yalokwofo. Hofɨko wosopayo wonantɨfeso hofɨko aho mijo itoêno miyatɨkuênyofoho. 3 Ose ulahonɨngkofi Jisas ulɨmento, I sekwo sekwoe yahinomnohini inɨngkayoêne Anɨtuye hungkunomo hwotoho pehoêno feelokwofo. 4 Anɨtu ole lɨmento, Kɨko jɨje mpohwo naêumo tɨfi finɨngkayo. U, aêamu fihwo kako hungkuno wonyo kanɨngkwohwo konaêwohimo uloso osohwo kako poyo wapeênono. Anɨtu ose lɨmentisofoho. 5 I sekwo ole lɨwoênɨngkohofo, Hwe fihwo kako hamniyoho hiênjo sohwo kanɨngkwohwo konaêwohimo ufoêmayo soêno, i kako sikimo ulɨmontonoho. Ngko hamniyoho yoêmayoso wosejapmmonji ko yoheso ngko ole nto lɨmalefoho. Ngko Anɨtumo uyɨmneêno yohono. Ose lososo kako kanɨngkwohwo yaêumo mufoêmanehoho. Ose lɨwoênɨngkohofɨhwasoho. 6 Osoêno sekwo oso yahino homo somo inɨngkawowoênɨngkohofo soêno sekwo Anɨtuye hungkunomo hwotoho fewoênɨngkohofɨhwasoho. 7 Sekwo aêamu mangoênohino hwasoho. Hohonta hwe Aisaiya sekumneêno hungkuno nehopi lɨmentisofoho. Ole nalɨmento, 8 Olo aêamu loso hofɨko hofɨkoe mango mtaêni nje yofe hoênonɨmawoênɨngkohofofoho. I, hofɨkoe sɨmehoso ngkimo mantapeênjo iwoênɨngkohofofoho. 9 Hofɨko aêamu hwahoponjo sofe hunoso nomantɨfi Anɨtu mtaêangofoho lontɨfi aêamu somo lutɨhwawoênɨngkohofofoho. Osoêno hofɨko ngkimo wonyopi jomo ntɨwoênɨngkohofofoho. Aisaiya ose lɨmentisofoho. 10 Jisas hwe moyaêmimo ngkiyepono wapɨfento joho ulɨmentisofoho. Nopahonɨngkofi ulɨmento, Sekwo itoêno nɨpaênɨngkuji huno fɨsyafɨhupmno. 11 Yoêmayo jɨje mangomo johufaseêmofososo oso jɨje honɨngkanomo wonyo imoênnyoêneêmaho. Oêo, yoêmayo jɨje mango mtaêni lisoso oso jɨje honɨngkanomo wonyo imokiyoênefoho. 12 Ose ulahonɨngki kakoe inomokomoyo sohwa Jisasɨmo nuêmantɨfi ulɨmentohofi, Oso hungkuno lohinoso aêamu Falisi sohwa nupaênontɨfi sɨmeho wonyo umoênɨngkohoho. Oso hisoêno kɨko huno lakiyohoho. 13 Ose ulahonɨngkofi Jisas ulɨmento, Yoêmayo ipisayo uyoêneso nje Mpohwo ahwomomo humaso sohwo kako mahulinyoso siki fokafoso somo Mpohwo kako pmpongo hiênji wae yaofonefoho. 14 Sekwo aêamu Falisi sohwamneêno uhwontohumamno. Hofɨkoe syohofoho. Hofɨko tɨmpiênyo hwafoho. Aêamu tɨmpiênyo huhwo sohwa nomêne aêamu tɨmpiênyo somo honɨngkano iputɨhwawoênɨngkohofɨhwafoho. Hwe tɨmpiênyo sohwo nomêne tɨmpiênyo sohumo honɨngkano iputɨhwasoso oso hwaêu piênɨmomo wopɨwesyanjiyoho. 15 Ose ulahonɨngki Pita ulɨmento, Oso pahnnɨmo hungkuno nto lohinoso yoloho fonaso. 16 Ose ulahonɨngki Jisas ulɨmento, Sekwo hoku huno ane kulaho. 17 Ihwoni, yoêmayo hopiênono mangomo josyohumawoênɨngkiso oso hiso sɨmehomo wowoênɨngkohoho. Sɨmeho mtaêangoso monje noswaponto iêango piênɨmomo wowoênɨngkohoho. 18 I, yoêmayo mango mtaêni swapɨwoênɨngkisoso aêamufe huno mtaêni swapɨwoênɨngkohoho. Oso hiso aêamufe honɨngkano wonyo imoênɨwoênɨngkohoho. 19 Yoêmayo huno mtaêni swaponteso ole, huno wonyo syafɨsiyo, aêamumo fonjasiyo, nomêne hwafe ape hufo iyo, ape sikinjomo wonyo ulohofo, yoêmayoso hufo iyo, hwasyo hungkunojo, sitofo hungkunojo, 20 oso yoêmayo hiso aêamufe honɨngkano wonyo imokiyoênefoho. Ou, aêamu fihwo kako kakoe aho mijo miyatɨkuênyoênjo ilohofɨhwosi wosopayo nososo oso hiso kakoe honɨngkano wonyo mmokonehoho. Ose ulɨmentisofoho. 21 Oseso Jisas oso ango hopo sopo nulɨkoêmanto nomêne hwaho pone hufaêu Taiyaênji Saitounênji osopono umentisofoho. 22 Aêmu temtitofo kengosi hwaho Kenanntaêango noponto Jisasɨmo nuêmanto joho ulɨmento, U, Hwe Engofo, kɨko Ntefitɨye imu hwosoho. Kɨko ngkineêno hitoho wakilofono. Towahuno wonyo sohwo nje mumo humaho. Nɨhuêno wonyo ulohofalofoho. 23 Ose ulahonɨngki Jisas kako oso aêmu siye hungkunomo asomo mujoênjo imentisofoho. Oseso kakoe inomokomoyo sohwa Jisasɨmo nuêmantɨfi ulɨmentohofi, Olo aêmu losi kako joho lonto lonto tɨfi kinɨngkopalofoho. Kɨko asomo filɨhwajo. 24 Ose ulahonɨngkofi Jisas ulɨmento, Aêamu Isɨlaelɨso honɨngkanoêno tɨpeelokwofo. Oso aêamu somneêno Anɨtu lonuhwojahonɨngki pmmentohe hwoênyoho. Aêmusi kako aêamu Isɨlael mtaêangiêmaho. Kako temtitofo kengiyoho. 25 Ose ulahonɨngki aêmusi kako noponto Jisasɨênjo ne lopo hwomtame ulohofonto ulɨmento, Hwe Engofo, kɨko ngkimo nɨfoêmaho. 26 Ose ulahonɨngki Jisas aêamu Isɨlael soêntnno aêamu temtitofo kengo soêntnno pahnnɨmo hungkuno ulɨmento, U, nakwo mehomife wosopayo mehwasi sɨwojomo wohoênɨmofantantaho. Oêo, awonoho. Oso wonyofoho. 27 Ose ulahonɨngki aêmusi syafɨhuêmento, Ngko aêamu Isɨlaelɨnɨêmaho. Oêo, sɨwojo paênyiênyoho. Ose syafɨsyonto ulɨmento, Hwe Engofo, kɨko nehopi lohino. I sɨwojoso hofɨko ilɨfiso hofekwoêyohwosa wosopayo nonontɨfi huêmumokwojahonɨngkofi nɨwoênɨngkohofofoho. 28 Ose ulahonɨngki Jisas ulɨmento, U, aêmu losiyo, jɨje sɨmeho hiêntnnohinoso engoênjo kiyoho. Kɨko pehoêno kumoênoso oso kɨko wotɨpemaêmonnoho. Ose ulahonɨngki oso hohosohonta oso aêmu siye mu wopɨngo imoênɨmentisofoho. 29 Jisas oso ango hopo sopo nulɨkoêmanto Mijo Ayo Ngkalili momɨngo mofone sopo nowento hwofɨkiênyo weêe sopo nosonto osopo humamentisofoho. 30 Nohumentanɨngki hwe hwoyaêmi piênɨngoso nuêmantɨfi aêamu sɨfe wonyoênjo soênji aêamu tɨmpiênyo soênji yokino kokatoênnyo soênji aêamu mampiênyo soênji wonyoêwonyo mnokinoênjo soênji oso piênɨngo engo somo Jisasɨye sɨfɨkiênyoêmo uhumatɨêmentohofofoho. Uhumojahonɨngkofi Jisas wopɨngo umokumentisofoho. 31 Oseso aêamuso uhwonɨmentohofoso aêamu mampiênyoso hungkuno nɨhuêno itoêno lahonɨngkofi aêamu yokino kokatoênnyoênjoso wopɨngo imoênɨngkahonɨngkofi, aêamu sɨfe wonyoênjoso hano uhwanɨngkofi aêamu tɨmpiênyoso tɨmo honɨngkahonɨngkofi osomo uhwonontɨfi pisopisaho mjalɨmɨwentɨfi hofɨko Isɨlaelɨfe Anɨtu kakoe yofe hoênoma lohoêmentohofofoho. 32 Jisas kakoe inomokomoyo sohwamo joho ulonto ulɨmento, Ngko olo hwe hwoyaêmi lomneêno hitoho ntokwoho. Sɨkuno hufaêu sɨhune ngkoênji humantohofofoho. Hofɨko wosopayo anefoho. Mijohoênohinofoho. Ngko lɨhwatɨmeêmanji u, hofɨko honɨngkanopo tɨmo sɨkunoêno ikuji nopɨwahupitnnoho. 33 Ose ulahonɨngki kakoe inomokomoyo sohwa ulɨmentohofi, Olo hwaho lopo aêamu mohumunyoponoho. Nakwo olo aêamu piênɨngo engo somneêno wosopayo ntɨêmtaêni manehwono. 34 Ose ulahonɨngkofi Jisas ulɨmento, Sekwo wopayo alale weho. Ose ulahonɨngki ulɨmentohofi, Nakwoe wosopayoso aho fehohntaêni hopiênono fehohntaêni hufaêuyoho. Osoênji inanɨku weêeso angaêno angaênohinoho. 35 Ose ulahonɨngkofi Jisas hwe moyaêmi somo ulɨmento, Sekwo hwaho lopo fosyohumamno. 36 Ose ulonto kako wopayo aho fehohnjo hopiênono fehohntaêni hufaêuyo osoênji inanɨkuênji nomanto Anɨtumo isamoyoka ulonto wopayoso kutɨkujo lohofonto kakoe inomokomoyo sohwamo uyɨmentisofoho. Nomantɨfi oso hwe moyaêmi somo uyɨmentohofofoho. 37 Aêamuso wopayo nontɨfi sɨmeho uhnnɨngkahonɨngki nulɨfeeêmentohofoso mɨhuêmokumentohofofoho. Nomɨhuêmokontɨfi hoêyo aho fehohnjo hopiênonohino fehohntaêni hufaêu mehuêmemeehumentohofofoho. 38 Hwe sohwa oso wosopayo nɨmentohofoso foua tausen (4000) hwafoho. Oseso moyaêmi mehomi soêno hofɨko atofo malɨmentohofofoho. 39 Jisas oso hwe moyaêmi somo noluhwajonto yofayokinomo nokotasontɨfi hwaho Makatan nongkihntaêni wakoêmentohofofoho.