Matɨyu 19
PNG1 Jisas oso hungkunoso hopiênono losojwaofonto kako Ngkalili nulɨkoêmanto kako hwaho Jutiya Mijo Joutan nongkihntaêni wakoêmentisofoho. 2 Oso hopo sopo aêamu piênɨngo engoso Jisasɨmo tɨfi inɨngkamotofofoho. Aêamu mnokinoênjo somo Jisas wopɨngo umokumentisofoho. 3 Oseso aêamu Falisi sohwa Jisasɨmo yamofo ulohofano lontɨfi nuêmantɨfi ole ulohonɨmentohofi, Honɨngkano hungkunoso ole woênnyotaho. Hwe fihwo yoêmayo wonyoêwonyo soêno kakoe ape wae yaofoso wopɨngotaho. 4 Ose ulohonɨngkahonɨngkofi Jisas ulɨmento, Sekwo Anɨtuye hungkuno olo soêno huno maseyoênjo liyohoho. Anɨtuye yoêmayo hopiênono mtɨêmokumentiso sohonta kako hweênji apeênji mtɨêmokumentisofoho. 5 Nomtɨêmokonto ole lɨmento, Olo hilo soêno fihwo kanɨngkwohwo konaêwohimo ulɨkoêmahwosi kakoe apeênji nemêno makotoku wolohoênanjiyoho. Sikoêyaêu angaênohino umoênanjiyoho. 6 Oseso siko aêamu hufaêu umoênanjiêmaho. Oêo, sikoe aêapahoso angaênohino umoênanjiyoho. Osoêno Anɨtu osiyaêumo nto mekotɨjwahumasofoho. U, oloso nomtɨhuposoêeno. 7 Ose ulahonɨngki aêamu Falisi sohwa ulɨmentohofi, I osoêno Mouses kako olo hungkunolo pehoêno mtɨêmokumentisoto. Aêamu kako ape wohoênahumo lɨhwosi oso hisoêno iyoswomo mtɨêmokuhwosi aêmu simo uyahojɨhwosi wohoênahumontonoho. Oso pipilo. 8 Ose ulohonɨngkahonɨngkofi Jisas ulɨmento, Aêamu yokumpohnênyo imoênɨmentohofo soêno Mouses olo hungkunolo mtɨêmokumentisofoho. I sɨmoêmo neêmo olo yahino loso mmoênɨmmojofoho. 9 Ngko nje hungkuno waselɨmonneêno yohono. Hwe fihwo kakoe ape honɨngkano wonyo mmofeênjo simo hwehwo kako wae yaofɨhwosi nomêne ape masoso oso hwe sohwo kako ape itoêno mayo honɨngkano somo mtɨhupeso sohwo kako ose yososo kako honɨngkano wonyoênjo hweho. 10 Ose ulahonɨngki kakoe inomokomoyo sohwa ulɨmentohofi, Hwe kakoe apeênji fosyohumayo yahinoso oseêmanji i, hwe songo ape momaso sohwo kako hwosijo lohofoso wopɨngofoho. 11 Ose ulahonɨngkofi Jisas ulɨmento, Hwe moyaêmi olo hungkuno hwosijo sohwafe honɨngkano somo inɨngkayo soêno fehohnjo hopoêmaho. Oêo, Anɨtu aêamu angaêno angaênohino somo kakoe yokumpohnênyo uyososo oso aêamuso hofɨko olo hungkuno lomo unɨngkafe. 12 Ihwoni. Hwe angaêno angaênohino sohwa hofɨko ape momapitnne hwafoho. Aêamu fehohnjo konaêwohi aswo maênyo somtaêni ape mayosoêno hofɨkoe aêapaho itoênohinoêmaho. Aêamu fehohnjo nomêne sohwamo ape momasoênjo iyoêne ipisayo sɨhu peetɨmotofofoho. Aêamu fehohnjo Anɨtuye syoho somneêno syafɨsyonte soêno hofɨko ape mayo honɨngkano hano pitofahinɨwoênɨngkohofofoho. Olo hungkuno losoêno hwe fihwo oloso uyɨmo loso sohwo kako uyono. 13 Oso hohosohonta aêamu fehohnjo hofɨkoe mehomi weêeso Jisas kako aho ulonjimokono lontɨfi Jisasɨyepono mehomi somo uhwatɨmentohofofoho. Nuhwojahonɨngkofi kakoe inomokomoyo sohwa yoka ulɨmentohofofoho. 14 Jisas ulɨmento, Sekwo mehomi somo nopɨjumofɨkutoho. Oêo, hofɨko ngkiyepono wapɨfe. Anɨtu aêamumo mokosyohumayoso mehomi paênyomnoho. 15 Ose ulonto kako mehomi somo mnokinopo aho ulonjimokumentisofoho. Kako moiêwo ulonjimokonto oso hopo sopo nilɨkoêmanto umentisofoho. 16 Hwe fihwo Jisasɨmo uêmanto ulɨmento, Nje Lontɨhwayo sohwosi, ngko songo neêno humayoêneso yoêmayo wopɨngoso pipi iêmo maêmnehono. 17 Ose ulohonɨngkahonɨngki Jisas Ulɨmento, Kɨko yoêmayo wopɨngo soêno pehoêno ntohonɨngkino. Nɨhuêno angaênohino sohwo wopɨngo hweho. Mpohwo kakoênohinoho. U, kɨko songo neêno humayoêneso womaêmo lohoji kɨko honɨngkano hungkuno hopiênonohino somo tɨfi finɨngkahwoho. 18 Ose ulahonɨngki ulɨmento, Honɨngkano hungkuno ntisoto. Ose ulahonɨngki Jisas ulɨmento, Hungkuno ole, Kɨko nomênihumo nofonjasiyoêeno. Kɨko ape itoêno mayoêne yahino somo nomtɨhuposoêeno. Yoêmayoso hufo iyoêeno. Nomênehumo hwasyo hungkuno ujoêeno. 19 Jɨje mpohwoênji naêuênjiye hungkunomo tɨfi finɨngkayo. Sikoe yofe fohoênomaho. Kɨko kikineêno kuêmoênɨwonɨngkiso hopa aêamu kɨkoênjopo humalofo somneêno wakumoênono. 20 Ose ulahoningki hwe huhwo sohwo ulɨmento, Oso hungkunoso ngko inɨngkowalokweno. Nomêneso peho imnehono. 21 Ose ulahonɨngki Jisas ulɨmento, Jɨje honɨngkano wopɨngo hwofiloênnyo umoênɨmo lohojɨêmanji jɨje hoêyango yoêmayo hopiênonohinoso aêamu mpe wakilohopɨfe. U, kɨko hamniyoho maho oso hiso nomahoji aêamu yoêmayoso umofonyo iwoênɨngkohofo somo uyo. Kɨko ose isoso kɨko ahwomomjo hoêyango neso womaêmonnoho. Ose yohoji kɨko ngkimo tɨfi nnɨngkape. 22 Ose ulahonɨngki oso hwe songo sohwo nupaênonto sɨmeho tango uyahonɨngki kakoe angopono umentisofoho. Hwapɨngoso kakoe hoêyango yoêmayoso piênɨngoênjo aêamu somo muyɨmnehono lonto umentisofoho. 23 Nowahonɨngki Jisas kakoe inomokomoyo sohwamo ulɨmento, Ngko hungkuno nehopi waselɨmonneêno yohono. Aêamu hamniyoho yoêmayoso engoênjo yokumpohnênyo kemokosyohumaso sohwo kako ahwomomo Anɨtu umokosyohumayo soponeêno ijijoyonefoho. 24 Ngko apaêno waselɨmonneêno yohono. Yahu fihwo kako yongo imo paênyo soêmo wahumo lɨhwosi yososo wonyopi umontonoho. Oso paênyoso hwe hoêyango hamniyoho yoêmayoso aho yokumpohnênyo kemokosyohumantoso sohwo Anɨtumo enjwaêmo wohumamo lɨhwosi yososo hopoêmaho. Oêo, kako yahu sohwo yongo imo paênyo soêmo wahumo lɨhwosi ijijo wonyopi yoso hopaso oso hwe hoêyango engoênjo sohwo oseno yonefoho. 25 Ose ulahonɨngki kakoe inomokomoyo sohwa oso hungkunoso nupaênontɨfi yomo imentohofofoho. Hofɨko lɨmentohofi, Oseêmanji aêamu Anɨtuênji ango wopɨngo sopo songo neêno humayoêneso tɨhwo womaêmontolo. 26 Ose ulahonɨngkofi Jisas hofɨkimo tɨmo uhwononto ulɨmento, Aêamuso hopoêmaho. Oso hiso Anɨtu yososo hoponoho. 27 Ose ulahonɨngki Pita ulɨmento, Ihwoni, nakwo yoêmayo hopiênonohinoso hoênasyontani kikimo tɨfi kinɨngkopalokuhwono. Osoêno nakwo peho manehwono. 28 Ose ulahonɨngkofi Jisas ulɨmento, Ngko nehopi waselɨmonneêno yohono. Hwangku yoêmayo songo iêmofaposo sohonta Aêamufe Hwomu sohwo kakoe yokumpohnênyoênji hwe engo sohwoe epohumayo wonyoangkafo sopo nohumentanɨngkuhwosi ou, sekwo oso hohosohonta sekwo ngkimo tɨfi nnɨngkapɨwoênɨngkohofo sohwasi sekwo hwe engo sohwoe epohumayo aho hopiênono sɨfe mtaêni hufaêuyo sopo nohumatɨkutnnefoho. 29 Hwe moyaêmi hopiênonohinoso hofɨko hofɨkoe ango homnɨngkwaêwehwosanji hapiyosɨjanji mpohwo naêu mehomi hwaho yoêmayoso ngkineêno nje hungkunomneêno ulɨkoêmapijoso i, oso aêamu oso hisoêno yoêmayo piênɨngo engo wopɨngoso mapitnnefoho. Osoênji hofɨko songo neêno humayoêneso notɨpemapitnnefoho. 30 Hwe fihwo kako olo hwaho lopo nohumanto hwe engo hwoênyoho syofɨsyalokusoso oso hwe huhwo sohwo Anɨtuye ponemo soso sohwo kako hwe engoêmaho. Weêyo hweho. Hwe nomênihwo kako olo hwaho lopo nohumanto hwe engo hwoênɨmaho. Weêyo hwoênyoho syofɨsyalokuso sohwo oso hwe huhwo sohwo kako Anɨtuye ponemo soso sohwo kako hwe engo imoênone hweho.