Matɨyu 4

1 Oso hohosohonta Anɨtuye Towahuno Wopɨngo Jisasɨmo hwaho aêamu mohumunyopono ipemotasɨmentisofoho. Osopo Seten Jisasɨmo honɨngkano wonyo imokiyoêne yamofo ulohoêmentisofoho. 2 Jisas kako Mpohumo jomo ulɨmo lonto wopayo manyoênjo nohumentanɨngki mofehiênyo fouti (40) sɨkuno fouti (40) uyakolofahonɨngki Jisas mijoho engo umentisofoho. 3 Jisas mijohoêno nohumentanɨngki Seten iêmofaponto ulɨmento, Kɨko Anɨtuye Hwomu Nehwosɨêmanji olo sojo piênɨngo lomo hungkuno ulohojoêno wosopayo umoênono. 4 Ose ulahonɨngki Jisas ulɨmento, Anɨtuye hungkuno ole nalɨwoênɨngki, Aêamu wosopayoênohini nɨngkuhwoso sohwo kako itoêno mohumanohoho. Oêo, aêamu Anɨtuye hungkuno hopiênonohinomneêno syafɨsyɨwoênɨngkohofoso oso hofɨkoe huyoêmango songo humayoênefoho. 5 Ose ulahonɨngki Seten Jisasɨmo pone wopɨngo poneêno ipemotasonto Anɨtuye tajo ango engo antɨfe yokintahopo uhumajonto 6 ulɨmento, Kɨko Anɨtuye Hwomu hwosɨêmanji kɨko olopo ntaêni filɨkofamofo. Ose ulɨkwato lohofonto ulɨmento, Anɨtuye hungkuno nalɨwoênɨngki, Anɨtu kakoe aêamu ahwomomjo sohwamo kikimneêno ulɨhwosoêno hofɨko jɨje ahomo kumakukuji jɨje sɨfemo sojo mentofomatnnehino. Tohino momatnnohino. 7 Seten ose ulahonɨngki Jisas ulɨmento, Nomêne ifalifaliyo mtɨêmokumentohofoso ole, Kɨko jɨje Hwe Engo Anɨtu sohumo yamofo nulohofohotoho. Kɨko jɨje hunomnohini inɨngkusoêmanji ole syafɨsyɨkutoho. Anɨtu wonɨmokosyohumamtonoho. Ose syafɨsyɨkutoho. 8 Ose ulahonɨngki Seten Jisasɨmo hwofɨkiênyo yokintaho engo soponeêno utɨmotasonto olo hwaho hopiênonohino aêamu soênji yoêmayo hwahoponjo yokumpohnênyo soêntnno Jisasɨmo utɨhwamentisofoho. 9 Ose utɨhwanto ulɨmento, Kɨko ngkineêno hwomtame ntohofohoji jɨje sɨmeho ntapisoso yoêmayo uhwonalokunoso wokijapmmonnoho. 10 Ose ulahonɨngki Jisas ulɨmento, Kɨko iêwaho ntohofo. Kengopono fɨwano. Anɨtuye hungkuno ole nalɨwoênɨngki, Kɨko jɨje Hwe Engo Anɨtu kakineênohini hwomtame ulohofo. Kakineênohini syoho ulohofiyo. Ose ulɨmentisofoho. 11 Ose ulahonɨngki Seten Jisasɨmo ulɨkoêmahonɨngki aêamu ahwomo mtaêangoso nuêmantɨfi Jisasɨmo ufoêmaêmentohofofoho. 12 Aêamu fihwa hofɨko Jounɨmo impoêangomo intofahumentohofo soêno Jisas kako nupaênonto kako hwaho Ngkalilineêno umentisofoho. 13 Kako ango Nasalet ulɨkoêmanto ango Koponeyam osopo humamentisofoho. Oso ango hopo sopo Mijo Ngkalili mitɨmomɨngoponoho. Aêamu Sepɨyulanênji Napɨtalaiênjiye imu sofe hwahoponoho. 14 Hwe Aisaiya sohumo Anɨtu hungkuno uyahonɨngki lɨmojo sohwo hohonta ifalifaliyo mtɨêmokumentisoso hohosohonta ne imoênɨmentisofoho. Ole mtɨêmokumento, 15 Mijo Joutan nongkihntaêni mijo ayo momɨngopo hwaho Sepɨyulanênji Napɨtalaiênji hiênjoponoho. Aêamu temtitofo kengo Anɨtuye hungkuno mupaênɨmmotofo sofeponoho. 16 Hofɨko sɨkwoêmjohoêmo humafijoso pomponaho engo uhwonɨfitnnefoho. Aêamu sɨkwoêmjoho soêmo weêenepi nɨhuênahone wapeênano lɨkuji yontanɨngkuji pomponaho engo wonyoangkafoso uêmofapmmontonoho. Ose mtɨêmokumentisofoho. 17 Oso hohosohonta Jisas kakoe hungkuno lomaêmentisofoho. Ole ulɨmento, Sekwoe honɨngkano wonyo somtaêni fɨwoloêmokumno. Anɨtu nemokosyohumayo sohwoe sɨkuno mofoneponoho. 18 Jisas Mijo Ayo Ngkalili momɨngo sopo nowento hwe hufaêu inanɨku syohoênjo sikoênɨkwaêimo uhwonɨmentisofoho. Sikoe yofeso Saimounênji Entɨluênjoho. Saimounɨye yofe nomêneso Pitafoho. Siko inanɨku hoêyo mijomo hoênaofontanɨngki uêmaêmentisofoho. Inanɨku ifamiyoso sikoe hamniyoho syohofoho. 19 Nuêmanto ulɨmento, Siko tɨfi nnɨngkapinyo. Siko inanɨku mawoênɨngkisiye paênɨngoso Anɨtumneêno aêamu mayoêne wolosetɨhwamo. 20 Ose ulahonɨngki sikoe inanɨku hoêyo komoêno nulɨkoêmanji Jisasɨênji umentohofofoho. 21 Nowentɨfi Sepetiye hwomu sohwaêu Jemɨsɨênji Jounênjimo uhwonɨmentisoso siko hamnɨngkwohwo Sepetiênji yofayokinomo nohumantɨfi inanɨku hoêyo itoêno esyohumentanɨngki uhwononto joho ulahonɨngki 22 siko homnɨngkwohwoênji yofayokinoênji komoêno ulɨkoêmanji Jisasɨênji umentohofofoho. 23 Jisas hwaho Ngkalili hoêmo soêmeemo emoyonto hwe moyaêmi somo hofɨkoe tajo ango somo Anɨtuye hungkuno soênji Anɨtu wonyoangkafo nemokosyohumayo soêntnno lutɨhwamojofoho. Kako nolutɨhwanto aêamu mnokino kengo kengoênjo aêapaho wonyo umokumojo somo wopɨngo umokumentisofoho. 24 Jisas olo wonyoangkafo hiloso imentiso soêno hwaho Siliya hoêmo soêmeemo hoênɨmentisofoho. Aêamu hiso nupaênontɨfi aêamu yoêmayo tangoênjo mnokinoênjo somo Jisasɨyepono ipemotapmmentohofofoho. Aêamu towahuno wonyoênjo soênji aêamu nopɨwasyontɨfi yomo yomo iwoênɨngkohofo soênji aêamu sɨfe aho peênnyoênjo soênji hopiênonohino somo ipemotopahonɨngkofi Jisas wopɨngo umokumentisofoho. 25 Wopɨngo umokahonɨngki aêamu piênɨngo engo Jisasɨmo inɨngkamentohofofoho. Aêamu Ngkalili, Ntekapolis, Jelusalem, Jutiya, Mijo Joutan nongkihntaêango aêamu piênɨngoso inɨngkamentohofofoho.