Toho Wojo Honajo Hungkuno 5

1 Ngko Anɨtu kakoe epohumayo sopo nohumanji uhwonɨmentoheso, kakoe aho anga sohohntaêni iyoswo sawemo popokiênnyoso mokosyohumamentisofoho. Oso iyoswo homo somo hungkuno paho hohnjoênji ajwoêmjoênji mtɨêmokinyo somo impe mijahoênjoso lojwohofojahinyoso aho fehohnjo hopiênono nomêne mtaêni hufaêuyoho. Lojwohofojahinyoso hwapɨngo olenoho. Aêamu sikinjo iyoswo homo somo mɨkwalofeênefoho. 2 Aêamu yokumpohnênyo ahwomomjo sohwo mampaho mohmêno ole lɨmento, Aêamu wopɨngo ne sohwo kako oso iyoswo somjo impe mijahoênjoso lokoefaofɨhwosi fisakuyoêne hopoenohinoso tɨhwolo. 3 Ose ulahonɨngki aêamu ahwomomo humalofo sohwa hwahoponjo humalofo sohwa aêamu poyo peênɨmentohofo sohwa oso iyoswo homo somo fisakuyoêne hopoenohinoso nɨhuêno awonoho. 4 Ngko oso iyoswo homo somo nofisajɨhwosi uhwonyoêne sohumo huno uhwononji humotaho engo lɨmentohefoho. 5 Humotaho lontanɨngko hwe engo fihwo Anɨtuye epohumayo momɨngopo lohofonto kako ntɨmento, Kɨko humotaho lohotoho. Ihwoni, osopo hwe fihwo humaho. Kako aêamu Jutafe hwe engo ne hweho. Ntefit yofe engoênjo sohwoe imu hweho. Kako Setenɨmo uyakolofonto honɨngkano wonyo miyo hweho. Osoêno kako iyoswo popokiênnyo impe mijahoênjo lojwohofojahinyo aho fehohnjo hopiênono nomêne mtaêni hufaêuyoênjo homo somo wofisojwaoêmontonoho. Ose ntɨmentisofoho. 6 Nuhwonɨngkahonɨngko Anɨtuye epohumayoênjo sopo oso songo humalofo osofosofahuênohino sohwanji hwe engo sohwanji nohumentanɨngkofi Jisas Anɨtuye Yahu Mu Sipsip Paênyo sohwo Anɨtuye epohumayo mofone sopo lɨkofohumamentisofoho. Hohonta oso yahu huhwo sohumo aêamu fonjahumentohofoso ime hiênjohwo uhwonɨmentohefoho. Kakoe sɨhwanoênji tɨmoênji aho fehohnjo hopiênono nomêne mtaêni hufaêuênjo hweho. Kakoe tɨmoso Anɨtuye Towahuno paênyoênjo hwaho yawojoêmeemo uyohojɨkuêmoênyofoho. Ose uhwononji ole syafɨhuêmentoho, U, sɨhwanoso kakoe yokumpohnênyo mɨkunɨmposo yakolonoho. Kakoe tɨmoso Anɨtuye Towahuno hweho. Yoêmayo hopiênono huno unyo hweho. Ose syafɨhuêmentohefoho. 7 Oso Yahu Mu huhwo sohwo kako nowento Anɨtu kakoe epohumayo sopo humaso sohwo kakoe aho angahohntaêni iyoswo popokiênnyoso maêmentisofoho. 8 Nomahonɨngki oso songo humalofo osofosofahuênohino sohwanji hwe engo sɨfe aho hopiênonohino nomêne mtaêni osofosofahuênohino sohwanji oso Yahu Mu sohwoe sɨfɨkiênyoêmo ipitofawoêmentohofofoho. Nohumanji oso hwe engo angaêno angaênohino sohwa hofɨko tampuyo paênɨngo impe piênɨngoênjo soênji noswanyo naênohino sopo tɨkayo akino wopɨngo Anɨtumneêno woênnyo soênji maêmentohofofoho. Oso tɨkayoso aêamu Anɨtumneêno jomo ulɨwoênɨngkohofo sohwafe hungkunofoho. 9 Osopo nohumantɨfi ta songo ole ulɨmentohofi, Kɨko iyoswo popokiênnyo impe mijahoênjo lojwohofojahinyoso nomahoji fisaku joso hoponoho. Hwapɨngoso aêamu kikimo fonjakohumentohofoso jɨje honɨyo usɨhumaêmentohinoso aêamu hopiênonohinoso wonyo somtaêni mpe emaêmentohinoso hofɨko jɨje aêamu ne imoênɨmentohofofoho. Kɨko oso aêamu hiso temtitofo hopiênonohino mtaêangoso hungkuno kengo kengoênjo aêapaho kengo kengo somtaêni hwaho kengo kengo somtaêni maêmentohinofoho. 10 Kɨko oso aêamu huhwo sohwamo nomanji Anɨtuênjopo mokosyohumanji hofɨko Anɨtuye syoho ulohofiyoêne mmokumentohinofoho. Oseso hofɨko hwahoponjo aêamu hopiênonohino somo womokosyohumantɨfeho. Oso ta hiso Jisasɨmo ulɨmentohofofoho. 11 Ngko Jounêni apaêno uhwononji upaênɨmentoheso aêamu ahwomomjo piênɨngo engo sohwafe mampahoso hoênɨmentisofoho. Oso hopo sopo hofɨko Anɨtuye epohumayo soênji yoêmayo songo humalofo osofosofahuênohino sohwanji hwe engo sohwanji nohumentanɨngkofi hofɨko kuêmokuêmofo ihumajɨêmentohofofoho. 12 Hofɨko mampaho engoênji ole lɨmentohofi, Anɨtuye Hwomu Aêamufe Wonyomneêno Poyo Peênɨmentiso sohwo kako yoêmayo mokosyohumayoêne yofe engoso, yoêmayo hoêyangoso, yoêmayo huno wopɨngoso mayoêne kako hopoenohino hweho. Nakwo kakoe yofe engoso nohoênomehwasi kakoe yokumpohnênyo soêno yoloho lɨjwaofɨhwasi isamoyoka ulano. Kakoe sɨmeho wopɨngo umoênono. Mango mohmêno ose lɨmentohofofoho. 13 Ose upaênonji ole upaênɨmentoho, Yoêmayo Anɨtu mtɨêmokumentiso ahwomomjo sohwanji hwahoponjo hnênnonji aêamu poyo peênɨmentohofo sohwanji mijo ayomjo sohwanji nakwo hopiênono ole lɨmentɨhwoni, Anɨtu kakoe epohumayo sopo humaso sohwoênji kakoe Hwomu Aêamufe Wonyomneêno Poyo Peênɨmentiso sohwoênjimo isamoyoka mɨkunɨmposo selalokuhwono. Nakwo sikoe yofe hoênosemalokuhwono. Sikoe yofe engoênji sikoe yokumpohnênyoênji neêno nowentɨhwonefoho. 14 Ose ulahonɨngkofi oso songo humalofo osofosofahuênohino sohwa ole lɨmentohofi, Ou, nehopeho. Ose lahonɨngkofi hwe engo sohwa hofɨko sikoe yofe hoênomayoêne hwomtame imentohofofoho.