Jona 2

1 Jona pisde bänipkätan yiwixäwik, tumuk wamu Anätunä Yawele 2 using yakut. “Yawe, nä anaxälake yanggäwämba, nätä natäke yakumu gätä pahakuläk. Ämusing hikngä axumgin ämindä yiwixayingkätandä, tumuk wamu anggatängamiläkge yäwa, näle tumuxu anatäpguläk. 3 Gätä mumbi, nä yanggä ämalan hikngä, yanggä bänipkätan epgum. Tiwän yanggätä täpän kopa, gäle yanggätä täku temäke pänguhikut. 4 Tiwän using natäpgum. ‘Gätä gika nomdanetä anawaläk. Tiwändeyä gika takwän yotda hipdu axawit.’ 5 Yanggätä täpän kopgum, tiwän pälä päkakopa hakin. Yanggä gäpmayi hikngä gwendä tängäna täpä undä hikngä täpän kopa, songäsongä yanggäne nanätä kuhitna gwenu wamgin. 6 Nä täwan kemat hikngä aepgum. Kepdä yämä iwikiwik yiwitde alepän kuhingamikut. Tiwändeyä, Yawe Anätunatä gapmayinetä käluk täkako tewi yiwikum. 7 Nina natäpa, käluk yiwitnangäsä täknga wenä tinangge tiwän, Yawe, nä gäle natäke, tumuxu yäwa, yot takwändanetä anatäpguläk. 8 Hängä kitokngänä wenä ämindäkän kwätäluke tumuxu ile tahakaying äminu uläkwäxu, gwälam hikngä gätä pahangyäminggaläxu maha yämikaying. 9 Tiwändeyä nä kawu gäle tayixäwik, gäle uman täknga yatängenaxäwik, hikawu gäle tänguke häwa ihikuwik. Wamu kitokngä u yakumu undä pahawit. Axumnangäsä tiwändeyä, Yawetäkän käluxu nipmambän yiwixamängunin,” yang yakut. 10 Tiwänä Yawetä pis gwenu iniwän, täku yanggä kwayimune watutekut, Jonan.