ZƏBUR 24

¹ Rəbbindir yer üzü və orada mövcud olanlar, Dünya və orada yaşayanlar.

² O, yerin təməlini dənizlər üstündə qurdu, Dünyanı sular üzərində yaratdı.

³ Rəbbin dağına kim çıxa bilər? Müqəddəs məskəninə kim girə bilər?

⁴ – Əlləri pak, qəlbi təmiz, Hiyləyə könül verməyən, Yalandan and içməyən insan.

⁵ O, Rəbdən bərəkət alacaq, Xilaskarı Allahdan salehlik alacaq.

⁶ Belə adam Rəbbi soraqlayar, Yaqubun Allahının üzünü axtarar. Sela

⁷ Ey darvazalar, başlarınızı qaldırın, Ey qədim qapılar, açılın, Əzəmətli Padşah içəri daxil olsun!

⁸ Bu əzəmətli Padşah kimdir? – Odur, güclü-qüdrətli Rəbb, Döyüşdə qüvvətli Rəbb.

⁹ Ey darvazalar, başlarınızı qaldırın, Ey qədim qapılar, açılın, Əzəmətli Padşah içəri daxil olsun!

¹⁰ Bu əzəmətli Padşah kimdir? – Ordular Rəbbi, Odur əzəmətli Padşah! Sela