2 थिस्सलुनी 1

1 ये चिट्ठी पौलुस, सिलवानुस और तीमुथियुसो री तरफा ते ए। आसे एसा चिट्ठिया खे थिस्सलुनीकियों नगरो री मण्डल़िया खे लिखणे लगी रे, जो म्हारे पिता परमेशर और प्रभु यीशु मसीह रे ए। 2 आसे प्रार्थना करूँए कि म्हारे पिता परमेशर और प्रभु यीशु मसीह रे तुसा खे कृपा और शान्ति मिलदी रओ। 3 ओ साथी विश्वासियो, तुसा रे बारे रे आसा खे हर बखत परमेशरो रा धन्यवाद करना चाईयो और ये ठीक बी ए, कऊँकि तुसा रा विश्वास यीशु मसीह पाँदे बऊत बड़दा जाओआ और तुसा खे आपू बीचे प्यार बऊत ऊँदा जाओआ। 4 इजी बजअ ते आसे आपू बी परमेशरो री मण्डल़िया रे तुसा रे बारे रे कमण्ड करूँए। कऊँकि तुसे सब्र और विश्वासो साथे सबी किस्मा रे उपद्रव और क्ल़ेश सईन करोए। 5 तुसे लोक दुःख सईन करोए और ये तुसा लोका खे परमेशरो रे राज्य रे जाणे जोगे बणाओए। इजी रा ये सबूत ए कि परमेशरो धार्मिकता ते न्याय करना। 6 और परमेशरो रा ये न्याय ए कि जो तुसा खे दुःख देओए, परमेशरो तिना खे बदले रे दुःख देणा 7 तेस तुसा लोका खे दुःख क्ल़ेशा ते चैन देणी और परमेशरो आसा लोका खे बी चैन देणी। ये तेस बखते ऊणा जेबे प्रभु यीशु मसीह आपणे सामर्थी स्वर्गदूता साथे बऊत जादा सुलगदी ऊई आगी रे स्वर्गो ते प्रकट ऊणा। 8 परमेशरो तिना लोका खे सजा देणी जो तिना खे नि मानदे और म्हारे प्रभु यीशु मसीह रे सुसमाचारो पाँदे विश्वास नि करदे। 9 सेयो लोक प्रभुए रे सामणे ते और तिना री महिमामय सामर्था रे तेजो ते सदा खे लग कित्ते जाणे। तेस तिना लोका खे अनन्त विनाशो री सजा देणी। 10 ये तेस दिने ऊणा, जेबे प्रभु यीशु आपणे लोका बीचे महिमा पाणे वापस आऊणा और सब विश्वास करने वाल़ेया लोका अचम्बा करना। इदे तुसे बी शामिल ए कऊँकि तुसे आसा रे संदेशो पाँदे विश्वास कित्तेया। 11 इजी खे आसे तुसा री खातर लगातार प्रार्थना बी करूँए कि म्हारा परमेशर तुसा खे तेसा जिन्दगिया जोगा बणाओ जेतेखे जिऊणे खे तिने तुसे बुलाई राखे। से तुसा री हर एक खरी इच्छा खे पूरा करो और हर एक तेस कामो खे से सफल बणाओ जो तुसा रे विश्वासो रा नतीजा ए। 12 ईंयां म्हारे प्रभु यीशु मसीह रे नाओं तुसा रे जरिए महिमा पाणी और तुसा तेसरे जरिए आदर पाणा। ये सब कुछ आसा रे परमेशरो रे और प्रभु यीशु मसीह री कृपा रे जरिए ऊणा।