1 कुरींथी 10

1 ए भायसे, मे नी चाहतु की तुहुं हीनी वात सी अनजाण्‌या रवु की हामरा आखा डाहा बुड़ा वादळान नेचा हतला, ने आखा की आखा दरीयान ईचमां सी पार हयन गुया; 2 ने आखा वादळा मां ने दरीया मां, मुसान बपतीस्‌मा लेदा। 3 ने आखा एकुत आत्‌मा मां भरायला खाणो खादा; 4 ने आखा एकुत आत्‌मा मां भरायला पाणी पीदा, काहाकी चे तीना आत्‌मा मां भरायला झीरा सी पाणी पीदला जे तेरे साते चालतेली, ने चु झीरु मसी हतलु। 5 बाकुन भगवान हींद्‌रे मां सी बेसका माणसे सी खुस नी हयु, हेरेसी बयड़ा मां ढीक हय गुया। 6 जी वात हामरे वाटे एक दाखलु ठेर्‌यु, की जसा चे लालुच कर्‌या, असात आपणु बी भुंडली चीजेन लालुच मां करु; 7 ने नी तुहुं मुरती पुजण्‌या बणु, जसा की हींद्‌रे मां सी कतरा ते बणी गुया, जसों लिखलो छे, “माणसे खाणे पीणे बठ्‌या, ने खेलने कुदणे उठ्‌या।" 8 ने नी आपणु छीनाळो करजे, जसा हींद्‌रे मां सी कतरा कर्‌या; ने एकुत दाहड़ाम बीस ने तीन हजार माणसे मर गुया। 9 ने नी आपणु मालीक काजे पारखे, जसा हींद्‌रे मां सी कतरा, माणसे कर्‌या ने घड़सान साहरे खत्‌तम हय गुया। 10 ने नी तुहुं कुड़-कुड़ कर्‌या, जीनी रीत सी हींद्‌रे मां सी कतरा कुड़-कुड़ ने खत्‌तम करने वाळान साहरे खत्‌तम हय गुया। 11 बाकुन जी आखी वात, जी हींद्‌रे पर पड़ी दाखलान रीत पर हतली; ने चे हामरी चेतावणी वाटे जे कळीन आकरी टेम रवे लिखाय गुयली छे। 12 हेरेसी जु समजे, मे टणकु छे, चु चेतीन रवे की काय हीटी नी पड़े। 13 तुहुं काहाली असी पारख मां नी पड़्‌या, जे माणसेन सेण सी बाहार छे। ने भगवान भुरसा वाळु छे ने चु तुहुं काजे ताकत सी बाहार पारख मां नी पड़नी देय, बाकुन पारखणेन साते नीकास बी करसे की तुहुं सेण कर सकु। 14 एरे वजे सी, ए मारा लाटेक्‌ला, मुरतीन पुजा-पाट करने सी बची रवु। 15 मे अकलवाळा जाणीन तुंद्‌रे सी कह्‌वो; जो मे कह्‌वो, हीनाक तुहुं पारखु। 16 चु तु बेसकु वारुन कटवरु, जेरे पर हामु तु बेसकु वारु छे करीन कवजे; काय मसीन खुनेन साजेदारी नी हय? चु रुटु हामु तीनाक हामु तुड़जे, काय चु मसीन डीलेन साजेदारी नी हय? 17 हेरेसी की एकुत रुटु छे, ती हामु बी जे बेसका छे एकुत डील छे, काहाकी हामु आखा ईनात मां साजल्‌या हवजे। 18 जे डील भाव सी ईस्‌रायेली छे, हीनुक देखु; काय बादा चड़ावला खाणे वाळा वेदीन साजल्‌या नी हय। 19 अळतेन मे काय कह्‌वो? काय ज्‌य की मुरती पर चड़ाय गुयला बादा काय छे, नीते मुरती काय छे? 20 नी, बाकुन ज्‌य की नी-यहुदी जे बादा देय; चे भगवान वाटे नी बाकुन भुतड़ान आत्‌मा वाटे बादा देय ने मे नी चाहतु की तु भुतड़ान आत्‌मान साजल्‌या हवे। 21 तुहुं मालीकेन कटेरु ने भुतड़ान आत्‌मान कटेरा दुयु मां सी नी पी सकु। तुहुं मालीकेन भेसकायन ने भुतड़ान आत्‌मान भेसकायन दुयुन साजल्‌या नी हय सकु। 22 काय हामुक मालीक काजे रीस देवाड़ु? काय हामु हेरसी जुर वाळा छे? 23 “आखी चीजे मारे वाटे सय ते छे, बाकुन आखी फायदान नी हय,” आखी चीजे मारे वाटे सय ते छे, बाकुन आखी चीजे सी अगो बड़ाये नी। 24 कुय बी आपणीत भलाय काजे नी, बाकुन दीसरान भलाय काजे हेर बी करु। 25 ज्‌य काय हाटेम वेचाये, चो खावु ने मनेन वजे सी काय बी मां पुछु ने पारखु? 26 “काहाकी कळी ने हेरी भरपाय मालीकेन छे।" 27 कदी जे ईसु काजे नी जाणे असला मां सी कुय तुहुं काजे नेवता देय, ने तुहुं जाणे ने पारखणे चाहु, ती ज्‌य काय तुंद्‌रे अगळ मेक देय चोन खावु; ने मन वजेसी कुय मां पुछु। 28 बाकुन कदी कुय तुंद्‌रे सी कह्‌वे, “ज्‌य ते मुरती काजे बादा करली चीज छे,” ती तीना बताड़ने वाळान वजे सी ने मनेन वजेसी घुण खावु। 29 मारो मतलब तारु मन नी, बाकुन तीना दीसरान। भलो, मारु छुटकारु दीसरान वीच्‌यार सी काहा पारखी जाय? 30 कदी मे तु बेसकु वारु छे करीन साजल्‌यु हवो ती जेरे पर मे तु बेसकु वारु छे करीन कह्‌वो, ती हेरे वजे सी मारी वाक नीकाळे? 31 हेरेसी तुहुं चाहे खावु, चाहे पीयु, चाहे जो काय करु, आखो काय भगवानेन सेक-सींगार वाटे करु। 32 तुहुं नीते यहुदीया, नीते नी-यहुदी, ने नी भगवानेन मंडळी वाटे ठुकरेन वजे बणु। 33 जसु मे बी आखी वातो मां आखा काजे खुस राखो, ने आपणा नी बाकुन बेसकान फायदु हेरो की तीनुक छुटकारु जड़से।