रोमी 3

1 अळतेन यहुदी बन्‌ने सी काय फायदु ने नीते फतरी काटणे सी काय नफु? 2 आखे आन्‌गे सी बेसकु फायदु पेहेल ते ज की भगवानेन बुल तीनु काजे सुपलु हतलु। 3 कदी हींद्‌रे मां भुरसु नी करे असला बी नीकळी जाय ती काय हय गुयो? काय हींद्‌रे भुरसा मां धुकु देणे सी भगवानेन छाचाय फालतु हय जासे काय? 4 कदी नी बाकुन भगवान छाचलु रवसे ने आखा माणसे लुच्‌चा रवसे, जसों लिखलो छे, “तेरी तु आपणी वात मां वारलु छे ने नीयाव करनेन टेम मां तु छाचलु छे।" 5 हेरेसी कदी आपणु जे भुंडो काम करजे चे भगवानेन धरम काजे पाक्‌को करे, ती आपणु काय कहंजे? काय ज की भगवान जु रीस करे नीयाव नी करन्‌यु छे काय? ज ते माणसेन रीत पर कय र्‌यु। 6 कदी नी नीते भगवान कसु कळीन नीयाव करसे? 7 कदी मारा झुटेन वजे सी भगवानेन छाचाय हेरे सेक-सींगार वाटे, जादा करीन उजेंतु हवे ती पेहेल काहा तु पापी छे करीन मारु नीयाव हवे? 8 “हामु काहा नाव-बद्‌दी नी करजे की भलाय नीकळे?” जसों हामरे पर जु वाक नीकाळी बी र्‌या, ने काहानाक कहें की हींद्‌रो जत कहंणु छे। बाकुन असलात गुनु लागाड़नु वारु छे? 9 ती पछेन काय हयो? काय आपणु हींद्‌रे सी वारलु छे? कदी नी; काहाकी आपणु यहुदी ने नी-यहुदी दुयु पर गुयु गुनु लागाड़ी देदला छे की चे आखा ने आखा पापेन हक मां छे। 10 जसों लिखलो छे: “कुय बी वारलु नी हय, एक बी नी हय। 11 कुय बी समजदार नी हय; कुय बी भगवान काजे हेरने वाळु नी हय। 12 आखा भटकी गुयला छे, आखान आखा बीगड़ी गुयला छे; कुय बी भलाय करने वाळु नी हय, एक बी नी हय। 13 तींद्‌रु गळु मसाणेन तसु छे, चे आपणा जीप्‌या सी झगड़ा करे, हींद्‌रा हुटड़ा मां घड़सान जहर भरलु छे। 14 हींद्‌रो मुंहडो रीस ने कड़वान सी भरायलो छे। 15 हींद्‌रा पाय माणसे काजे मारीन खुन करने उतवाळा रवे, 16 हींद्‌रे वाट मां नुकसाण ने दुख छे, 17 चे सांतीन वाट नी जाणे। 18 हींद्‌रा डुळा अगळ भगवान काजे देखीन बी नी बीहे।" 19 हामुक मालम छे की मुसान कायदु जु काय कहें तींद्‌रे सी कहें, जे मुसान कायदान हक मां छे; हेरेसी एकेक जणान मुंहडो बन्‌द हय जाणु चाहजे ने आखी कळी भगवानेन डंडेन वाटे रवे; 20 काहाकी मुसान कायदान काम सी कुय जीव बी हेरे अगळ वारलु नी गीणाये, हेरेसी की मुसान कायदान साहरे पापेन उळखान हवे। 21 बाकुन हय मुसान कायदा सी अलग भगवानेन चु वारलु उजेंतु हयु, की तेरी गवाय मुसान कायदु ने भगवानेन अघी सी आवणे वाळी वात देखाड़न्‌यान देय, 22 ने भगवानेन चु धरम ज्‌य ईसु मसी पर भुरसु करने सी आखा भुरसु करने वाळा वाटे छे। काहाकी काय बी छीट नी हय; 23 हेरेसी की आखान ने आखा पाप कर्‌या ने भगवानेन सेक-सींगार सी छेटे हय गुया, 24 बाकुन भगवानेन गीण-दया सी तीना छुटकारान साहरे ज ईसु मसी मां छे, फेरी मां वारलु ठेहरावलु छे। 25 ईसु मसी काजे भगवान लुही सी पापेन डंड भरन्‌यु बणाय देदु, ने ईसु पर भुरसु करने सीत आपणु काजे छुटकारु जड़े, जे माणसे पाप पेहेल करला ने भगवान तींद्‌रा पाप काजे सेण करतु र्‌यु ने तींद्‌रा चु ईसुन साहरे आपसान धरम उजेंतु कर्‌यु। 26 बाकुन ईनेत टेमे तेरु धरम उजेंतु हवे तेरेसी चु आपसुत वारलु गीणायसे, ने जे ईसु पर भुरसु करे तीनु काजे बी वारलु बणावसे। 27 ती मटाय करनु काहा र्‌यो? हेरी ते जागा नी हय। काहानी मुसान कायदान वजे सी? काय वारलु करने मुसान कायदा सी? नी बाकुन भुरसान कायदान वजे सी। 28 हेरेसी कुय माणुस मुसान कायदान कामेन अनसारे चालीन नी, बाकुन भुरसान साहरे धरमी बण सके। 29 काय भगवान यहुदीयान अतरुत छे काय? काय नी-यहुदीन नी हय? हव नी-यहुदीन बी छे। 30 काहाकी एकुत भगवान छे, जु फतरी काटाण्‌या काजे भुरसा सी ने नी फतरी काटण्‌या काजे बी भुरसान साहरे वारलु ठेहरावे। 31 ती काय आपणु मुसान साहरे लिखला कायदा काजे भुरसान साहरे फालतु ठेहरावजे? कदी नी बाकुन मुसान साहरे लिखला कायदा काजे जादा ताकतवाळु बणावे।