Ni Gi 24

1 Ngane e Balam i lohoka vona e BAKOVI DAGI i ngaru ni gamai e huriki a Israel, lakea i uka ma i rata a malulu ge kasisi manga a hini muga i rata. I mata lakea na tabeke i ngeki. 2 I matai a maka kape ne huriki a Israel ri vapesihi ramai a kabu takutaku ne ria. Muri a Hanuna Vure i bele vona, 3 i ta vakakika, i ta maea: “Iea a nitane Balam, e tune Beor. A nita iea na viri i para hateka a matana, i matai kamumu a maka maki. 4 A nitana viri i longo a nitana Vure, ra viri i matai a vurena i valai na Vure Tuhaka Hateka, ra viri i tabuli puru, i palala a gina. 5 A matai a maka kape ne huriki a Israel, ri mata kamumu hateka. 6 Ra maka kape nga ri ola manga a kai a det, ri manga a hania ni rata na gagana naru dagi, ri manga a maka kai dagi e BAKOVI DAGI i varo, ri manga a maka kai a sida ri pesi na dahana naru. 7 A naru ge vonu pasilua, ge maguru tala na tavila vona. E huriki a hamona i uka ma ri gi bala a naru. A hariki ne ria, a rana bara i dagi, i gao hateka na hariki e Agag. A hariki o Israel bara i matakari e huriki ri ala kupo. 8 A Vure i bole tala ria o Egipto, a vuhuna a Vure i made turane ria, ri gao hateka, manga a bulmakau i tegi. Ri vakalobo liu e huriki a pile ne ria. Ri raputu a tuhane huriki a pile, ri padimate ria na maheto. 9 E Israel i manga a laion, i mahita. E rei ge vangoa? Ni gi gamai e huriki ri gamai ioe. Ni gi ruduraha e huriki ri ruduraha ioe!" 10 E Balak i madihi tata a hatena, i kanipilu a limana i takia e Balam i ta maea, “Iau a gale valai ioe koea ta go ruduraha e huriki a pile nau, pali i balaka tolu o gamai ria. 11 Ge a ra ngane, a marikoi. O hamule lakea na tanga vomu. Muga a ta muholi ni habi a maka mahala vomu, pali e BAKOVI DAGI i putu tagu a dalamu, i uka ma go bole ngane." 12 Lakea e Balam i koli i ta maea, “A taki a vinuru o rudu valai ri gi bole iau a ta maea, 13 ‘E Balak ge ngaru ni habi a maka gol, a maka silva, ri tabuli na ruma-hariki vona, iau i uka ma ga bole, a vuhuna i uka ma ga ratea tara maki na ningaru nau, ma ga longotaro a nitane BAKOVI DAGI. Ga vakalongo kunana a ngava e BAKOVI DAGI i ngaru ga vakalongo.’ 14 Ngane ga hamule mai e huriki a viri nau. Pali ga taki taro ioe vona a maka maki e huriki a Israel ri gi rata na tara vomu muri ma." 15 Lakea e Balam i ta vakakika i ta maea, “Iau e Balam e tune Beor, mu longoa a nita vakakika nau. A matagu i para hateka a matai kamumu a maka maki. 16 A nitana viri i longo a nitana Vure, ra viri i lohoka na lohokanga na Vure Meli Liu, ra viri i matai a vurena i valai na Vure Tuhaka Hateka, ra viri i tabuli puru, i palala a gina. 17 A masia, pali i tabana, a masia, pali i uka ma i tabuli tabukoi. A hada bara i pagitala valai ne Iakop, a kodo hariki bara i pesi rike o Israel. Bara i ubi momo a dumena matana e huriki a Moab, bara i ubi momo a gine huriki e tune Set. 18 E Idom bara ni ratapile, a pile vona e Seir tara bara ni ratapile, pali a Israel bara i gao hateka. 19 A matakari bara i valai na kabu ne Iakop. Bara i ratapile e huriki ri tababana ni mahuri na tanga." 20 Muri e Balam i matai e huriki a Amalek, i vakalongo a nita vakakika ne ria i ta maea: “E huriki a Amalek, muga ri gao hateka. Muri bara ri bole a vuranga dagi." 21 Muri i matai e huriki a Keni, i vakalongo a nita vakakika ne ria i ta maea: “Ra tanga mu made i uka viri ge ratapilea. A tanga mu made vona i pesi tora manga a nuna loha i tabuli langa na kedo na mapana lolo. 22 Ni Gi Pali e huriki a Asur bara ri vaubi turane mua, bara ri ratapile mua, ri lakavu e huriki a tara ne mua. 23 Muri e Balam i vakalongo tabua tara nita vakakika i ta maea: Na tahuna a Vure ge ratea ra naro iea, e rei ge mahuri? 24 Ni Gi E huriki a Saiprus bara ri rike na aga ne ria ri valai ri vakamadihi e huriki a Asur e huriki a Eber. Pali ria ranga bara ri vurua." 25 Muri e Balam i malaga i hamule mai a tanga vona, e Balak tara i malaga i hamule mai a tanga vona.