1 TƐSALONIKADENƆ 4

¹ Yã kũ à gↄ̃̀n dí, ma gbɛ̃nↄ, a mà ó kĩnaa lákũ à mana á kunna ká Ludagu nà. Á kunna de lɛ kↄ̀, ama ótɛn wɛ́ kɛáwa, ótɛn kútɛ kɛárɛ ó Dikiri Yesu gũn, àgↄ̃ kun lɛ àgↄ̃ gɛ́o.

² Á yã kũ o dàárɛ kũ Dikiri Yesu tↄ́o dↄ̃.

³ Luda ye á kunna gↄ̃ adona, à mì kɛ̃ pãpãkɛnaaa.

⁴ Á baadi gↄ̃ a zĩda kũna dↄ̃ kũ bɛ̀ɛrɛɛo gbãsĩ sari,

⁵ adi kɛ kũ dà vãni nidɛnaao lán kifiri kũ ò Luda dↄ̃ronↄ bànlo.

⁶ Yã pìi musu gbɛ̃ke sún a gbɛ̃dake taki kɛ ke à taari kɛnɛro, zaakũ Dikiri ni wɛ́ tã yã bire taka kɛ̀rinↄ a lákũ o gĩnakɛ o òárɛ nà, o á sã gào.

⁷ Luda dí ó sísi ògↄ̃ kú kũ gbãsĩoro, séde ó kunna gↄ̃ adona.

⁸ Abire yãi gbɛ̃ kũ à gì yãdannɛna díi, adi kɛ bisãsirin à gìiro, Luda kũ àdi a Nini kũ à kú adona daógun à gìi.

⁹ Óni le ò yekↄ̃ina yã oárɛro, zaakũ kũ á zĩdao Luda yekↄ̃inaa dàárɛ.

¹⁰ Á kunna de lɛ kↄ̀, á ye ó gbɛ̃ kũ ò kú Masedonia bùsu gũnnↄi ń pínki. Ma gbɛ̃nↄ, o lɛ́ dàáwa, àgↄ̃ kɛ lɛ àgↄ̃ gɛ́o,

¹¹ à zɛ́ wɛtɛ àgↄ̃ kun yãkete sari, á baadi á zĩda yã kɛ à á zĩda zĩ kɛ, lákũ o dìtɛárɛ nà,

¹² de á kunna le à ká bàaidenↄgu, de àsun fu á zĩdaa à da gbɛ̃keiro.

¹³ Ma gbɛ̃nↄ, o ye àgↄ̃ yãpura dↄ̃ gbɛ̃ kũ ò andunia tònↄ yã musu, de á pↄ súngↄ̃ sira lán gbɛ̃ kũ ò tãmaa vĩronↄ bàro yãi.

¹⁴ Zaakũ o sì kũ Yesu gà à fùtɛ, lɛn dↄ Luda ni tó gbɛ̃ kũ ò andunia tò Yesu gũnnↄ ɛra ò su kãao lɛɛlɛ.

¹⁵ Yã kũ ótɛn oárɛ díkĩna bi Dikiri yãdannɛnaamɛ. Ókↄ̃nↄ gbɛ̃ kpara kũ ónigↄ̃ kun ari Dikiri sugↄrↄ zĩnↄ, óni do gbɛ̃ kũ ò andunia tòo pìnↄnɛ arɛro.

¹⁶ Dikiri mɛ́ ani bo ludambɛ, à kipa kũ yãditɛnnɛnaao kũ malaika gbɛ̃ zↄ̃kↄ̃ↄ kòtooo kũ Luda kãkãki ↄ́o, gbɛ̃ kũ ò gà Kirisi gũnnↄ ni vu bona gan káaku,

¹⁷ abire gbɛra ókↄ̃nↄ gbɛ̃ kpara kũ ó kunnↄ, oni ó sɛ́tɛ kũńwo lɛɛlɛ ari ludambɛ lukun ò da Dikirilɛ ĩa gũn, gbasa ògↄ̃ kú kãao ari gↄrↄ sĩnda pínki.

¹⁸ Abire yãi à kↄ̃ laakari kpátɛ kũ yã pìio.