1 TIMƆTI 3
SIM1 Yã díkĩna bi yãpuramɛ: Tó gbɛ̃ ye à kɛ gbɛ̃ zↄ̃kↄ̃ ũ, àtɛn zĩ mana ni dɛ.
2 Gbɛ̃ zↄ̃kↄ̃ gↄ̃ kun taari sari, nↄmɛndode ũ, laakaride ũ. Àgↄ̃ a zĩda kũna dↄ̃ gbɛ̃ fayade ũ, nibↄkũri ũ, gbɛ̃ kũ ani fↄ̃ à yã dańnɛ ũ.
3 Àsungↄ̃ de wɛ̃dɛri ke gbɛ̃ pãsĩ ũro. Àgↄ̃ de nɛ̀sɛdode yãketesaride ũ. Ɔgↄ sún donɛ arɛro.
4 Àgↄ̃ a ↄn kũna dↄ̃, a nɛ́nↄ gↄ̃ mì natɛnɛ ògↄ̃ a ↄdↄki gwa.
5 Zaakũ tó gbɛ̃ a ↄn kũna dↄ̃ro, ani kɛ dera à fↄ̃ à Luda sↄsi gbɛ̃nↄ gwaa?
6 Àsungↄ̃ de Yesude dufu ũro, de àsun ĩa dã à a zĩda da yãn lán Ibilisi bàro yãi.
7 Àgↄ̃ tↄ́ nna vĩ Yesusaridenↄ kĩnaa dↄ, de òsun a tↄ́ ĩni sí, à zu Ibilisi tankutɛnlo yãi.
8 Lɛmɛ dↄ kpanyĩrinↄ gↄ̃ de gbɛ̃ bɛ̀ɛrɛdenↄ ũ. Òsungↄ̃ de lɛ́pladenↄ ũro. Wɛ̃ yã sún dońnɛ arɛro. Òsungↄ̃ de ↄgↄ vãni wɛtɛrinↄ ũro.
9 Ògↄ̃ Yesu yã asirinↄ kũna kũ nɛ̀sɛpurao.
10 Ò ń yã gwa gĩa, tó ódi yãke leḿmaro, gbasa ò ń ditɛ kpanyĩrinↄ ũ.
11 Lɛmɛ dↄ ń nↄnↄ gↄ̃ de nↄgbɛ̃ bɛ̀ɛrɛdenↄ ũ, laakaridenↄ ũ, ògↄ̃ náani vĩ yã sĩnda pínki gũn. Òsungↄ̃ de kↄrↄmↄtↄdenↄ ũro.
12 Kpanyĩri gↄ̃ de nↄmɛndode ũ, àgↄ̃ a ↄn kũ a nɛ́nↄ kũna dↄ̃.
13 Gbɛ̃ kũ ò ń zĩ kɛ̀ a zɛ́anↄ gwena nigↄ̃ mana, ń laakari nigↄ̃ kpatɛna ń Kirisi Yesu náanikɛnaa gũn manamana.
14 Bee kũ matɛn yã dínↄ onnɛ, ma dìtɛ mani su n gwa saa.
15 Tó ma suna sù à gìi kɛ̀, má ye ǹgↄ̃ dↄ̃ lákũ à kũ̀ ògↄ̃ kun Luda ↄndenↄ ũ nà. Ɔnde pìnↄmɛ Luda Wɛ̃̀ndide sↄsi ũ, yãpura pɛ́tɛki ũ kũ a gbãnalekio.
16 Ó donyĩzɛ asiri kũ à bò gupuraa zↄ̃kↄ̃ yãpuramɛ: À bò à sù bisãsiri ũ, Luda Nini yãpura kpàa, malaikanↄ a è. Ò a yã waazi kɛ̀ burinↄ tɛ́, ò a náani kɛ̀ andunia gũn, Luda a sɛ̀ à tà kãao gakuri gũn.