BONAA 1
SIM1 Isaraila nɛ́ kũ ò tà Misila kũ ń de Yakubuo, baadi kũ a bɛ gbɛ̃nↄ tↄ́n dí:
2 Rubɛni, Simɛↄ, Levi, Yuda,
3 Isaka, Zɛbuluni, Biliaminu,
4 Dã, Nafatali, Gada kũ Asao.
5 Yakubu buri pìnↄ ń pínki gbɛ̃nↄn baaakↄ̃ akurimɛ. Yusufu sↄ̃ a gĩnakɛ à kú Misila kↄ̀.
6 Akũ Yusufu gà kũ a vĩ̀ninↄ kũ gbɛ̃ kũ ò kun a gↄrↄanↄ ń pínki.
7 Isarailanↄ nɛ́ ì ò kɛ̀ dasi ò kàra ò dasi kũ̀ manamana, ò dà bùsuu pìla pínki.
8 Kína dufu kũ à Yusufu dↄ̃ro kpata blè Misila,
9 akũ à pì a gbɛ̃nↄnɛ: À Isarailanↄ gwa, ò dasi kũ̀ ò dàóla.
10 Ò gɛ́ ò ↄ̃ndↄ̃ kɛńnɛ de òsun kararo yãi. Tó zĩ̀i fùtɛ, ò na ó ibɛrɛnↄa ò zĩ̀ ká kũoo ò bↄtɛ ó bùsun.
11 Akũ ò gbɛ̃nↄ dìtɛńnɛ ń dikirinↄ ũ ò wɛ́ tãḿma kũ zĩ gbãna kɛnaao. Lɛmɛ ò Pitomu kũ Ramɛsɛo kàtɛ Firi'aunanɛ a pↄ́blekatɛkianↄ ũ lɛ.
12 Ama lán òtɛn wari dↄḿma nà, lɛmɛ òdigↄ̃ kara lɛ òtɛn dagula, akũ swɛ̃̀ɛ kɛ̃̀ Misilanↄgu ń yã musu.
13 Akũ ò ń dá zↄ̀zĩ pãsĩn
14 ò ń pↄ yàka ò ɛ̃ zĩ gbãna dàńnɛ kũ kúnkubonaao kũ bura zĩ sĩnda pínkio. Ò zĩ pìnↄ dàńnɛ pínki pãsĩpãsĩ.
15 Akũ Misilanↄ kína Eberu nɛ́sɛtɛrinↄ sìsi, a do tↄ́n Sifira, a do Pua.
16 À pìńnɛ: Tó áni nɛ́ i Eberu nↄgbɛ̃nↄnɛ tera sa, tó gↄ̃gbɛ̃mɛ, à a dɛ. Tó nↄgbɛ̃mɛ sↄ̃, à a tó.
17 Nↄgbɛ̃ pìnↄn Luda vĩna vĩ, odi yã kũ à òńnɛ kɛro, òtɛn nɛ́gↄ̃gbɛ̃nↄ tó.
18 Akũ kína pì ń sísi à ń lá à pì: À kɛ̀ dera a kɛ̀ lɛ a nɛ́gↄ̃gbɛ̃nↄ tòo?
19 Ò wèa ò pì: Eberu nↄgbɛ̃nↄ de lán Misila nↄgbɛ̃nↄ bàro, ò wãna òdi nɛ́ i ari ògↄ̃ ká.
20 Lɛmɛ Isarailanↄ tɛn kara lɛ òtɛn dasi kũ. Akũ Luda yã mana kɛ̀ nɛ́sɛtɛrii pìnↄnɛ
21 à ń gbá nɛ́nↄ, kũ ò a vĩna vĩ yãi.
22 Akũ Firi'auna yã dìtɛ a gbɛ̃nↄnɛ ń pínki à pì: À Eberu nɛ́gↄ̃gbɛ̃ kũ ò ń ínↄ ká Nili ín ń pínki, ama à nɛ́nↄgbɛ̃nↄ tó.