GALATIANƆ 2
SIM1 Wɛ̃̀ kuri awɛɛsiikↄ̃ gbɛra ma ɛra ma gɛ Yurusalɛmu kũ Baanabao.*fZĩr 15:2-4* Ma Titu sɛ̀, à gɛ̀ɛ kũoo se.
2 Ma gɛ gwe, kũ Luda mɛ́ à bò à sùma à pì mà gɛ́ yãimɛ. Akũ ma baaru nna kũ madì kpá buri pãndenↄnɛ bↄ̀kↄtɛ gbɛ̃ kũ ò de gbɛ̃ zↄ̃kↄ̃ ũnↄnɛ ńtɛ̃nɛ, de zĩ kũ ma kɛ̀ kũ a kũ matɛn kɛo sún kɛ pãro.
3 Titu kũ ó lɛɛlɛ, bee kũ a Girikikɛnaao, odi gã naa à tↄ̃̀ zↄ̃ro.
4 Yã pìi fùtɛ Yesude ɛ́kɛ kũ ò gɛ̃̀wái kpãninↄ musumɛ. Ò gɛ̃̀wái de ò ó zĩdadekɛna Kirisi Yesu gũn asiri gwa ò ó da zↄ̀blemmɛ,
5 akũ odì we ò mìi nàtɛńnɛro bee fíti, de à le àgↄ̃ baaru nna pì yãpura kũna yãi.
6 Gbɛ̃ kũ òtɛni ń gwa gbɛ̃ zↄ̃kↄ̃ ũnↄ dí yãke karamɛnɛro. Lákũ ò de nà dí kɛmɛnɛ yãke ũro, zaakũ Luda dì gbɛ̃ke wɛ́ gwaro.
7 Ò è Luda baaru nna kpana buri pãndenↄnɛɛ nàmɛnɛ ma ↄĩ, lákũ à a kpana Yudanↄnɛɛ nà Pitanɛ a ↄĩ nà.
8 Zaakũ lákũ Luda zĩ kɛ̀ Pita gãi nà a kunna zĩ̀ri ũ yã musu Yudanↄ tɛ́, lɛn à zĩ kɛ̀ ma gãi buri pãndenↄ tɛ́ lɛ.
9 Yamisi kũ Pitao kũ Yuhana kũ òtɛni ń gwa sↄsi gbɛ̀gba ũnↄ gba kũ Luda dàmɛnɛɛ dↄ̃̀, akũ ò ↄ kpàwá, ókↄ̃nↄ kũ Baanabao kↄ̃gbɛ̃kɛ sèeda ũ. Ò sì ò gɛ́ buri pãndenↄ kĩnaa, mↄ́kↄ̃nↄ sↄ̃, Yudanↄ kĩnaa.
10 Yã kũ ò yein dí, ń takasidenↄ yã gↄ̃ dↄógu. Gↄrↄ birea sↄ̃ ó mɛ̀ɛ wã̀ kũ a kɛnaao kↄ̀.
11 Kũ Pita sù Antiↄku, ma ginɛ tɛ̃tɛ̃ntɛ̃, kũ à zã̀ yãa yãi.
12 Zaakũ ari Yamisi zĩ̀rinↄ gↄ̃ gɛ́ ká, àdi pↄ́ ble kũ buri pãndenↄomɛ. Kũ ò kà, akũ à bòru kũ kpɛo à kɛ̃̀ḿma, kũ àtɛn vĩna kɛ Yuda kũ ò zɛ̀ kũ tↄ̃̀zↄ̃na yãonↄnɛ yãi.
13 Yuda kparanↄ nàa manafikikɛnaa pìi gũn. Bee Baanaba se ò a gà ò nàḿma.
14 Kũ ma è ò baaru nna yãpura kũna a zɛ́aro, ma ò Pitanɛ ń pínki wára: Mↄkↄ̃n Yuda ina ń kun lán buri pãnde bà, adi kɛ lán Yuda bànlo. À kɛ̀ dera ndì gã na buri pãndenↄa, de ògↄ̃ Yudanↄ yã kũnaa?
15 Yudanↄn ó ũ inaa gũn, buri pãnde durunnakɛrinↄn ó ũro.
16 Ama ó dↄ̃ kũ gbɛ̃ke dì bo mana doka pì kɛna yãiro, séde Yesu Kirisi náanikɛna ado.*fRom 3:20, 22* Bee ókↄ̃nↄ, o Kirisi Yesu náani kɛ̀, de ò le ò bo mana ó Kirisi náanikɛnaa pì yãimɛ, adi kɛ doka pì kɛna yãinlo, zaakũ gbɛ̃ke dì bo mana dokakũna yãiro.*fZab 143:2*
17 Gↄrↄ kũ ótɛn wɛtɛ ò bo mana Kirisi gũn, tó o è durunnakɛrinↄn ó ũ se, abire pì Kirisi tɛn durunna gba zɛ́n yá? Oi!
18 Tó ma ɛra matɛn doka kũ ma gbòro kɛkɛ, doka pì taariden ma ũ gwe.
19 Zaakũ ma gↄ̃ gɛ̀ ũ doka pìi musu, akũ ma kpɛ lìnɛ, de màgↄ̃ kun Luda pↄ́ ũ yãi. Ma ga lía kũ Kirisio.
20 Makũ mɛ́ má kun doro, Kirisi mɛ́ à kú ma gũn. Tera sà ma bisãsirikɛnaa gũn má kú Luda Nɛ́ kũ à yemai à gì a wɛ̃̀ndiii ma yãi náanikɛnaa gũmmɛ.
21 Matɛn Luda gbɛ̃kɛ da pãro. Tó gbɛ̃ dì bo mana doka pì yãimɛ, de Kirisi gà pãmɛ.