Misee 5

¹ Yinni Gusunɔ u nɛɛ, wunɛ Bɛtelehɛmu, Efɑrɑtɑgibun wuu, wunɑ ɑ piiburu bo Yudɑn wusu sɔɔ. Adɑmɑ wunɛn min diyɑ kpɑro koo yɑri wi u koo nɛn tɔmbu Isirelibɑ kpɑrɑ. U wɑ̃ɑwɑ sɑɑ yee yellun di.

² Adɑmɑ ko nɑ n ginɑ nɛn tɔn be deriwɑ ben yibɛrɛbɑn nɔmɑ sɔɔ sere kurɔ wì u koo kpɑro wi mɑ, u kɑ mɑ. Be bɑ kpikiru dɑ, bɑ koo gɔsirɑmɑ bu Isireli be bɑ tie deemɑ.

³ Kpɑ kpɑro wi nɑ bɛɛ nɔɔ mwɛɛru kuɑ mi, u bɛɛ nɛn tɔmbu mɛnnɑ u kpɑrɑ mɑm mɑm kɑ nɛ, Yinni Gusunɔn dɑm kɑ nɛn yiiko. Win tɔmbu bɑ ko n wɑ̃ɑ bɔri yɛndu sɔɔ. Kpɑ u yĩsiru yɑri hɑnduniɑn goonu nnɛ ye sɔɔ.

⁴ Wiyɑ u koo kɑ bɔri yɛndu nɑ. Asirigibu bɑ̀ n nɑ, bɑ bɛsɛn tem wɔri bɑ duɑ sere bɛsɛn sinɑ kpɑɑrɔ, sɑ ko bɛsɛn kpɑro be bɑ dɑm bo seeyɑ bu bu wɔri.

⁵ Ben tɑbu yɑ̃nun sɔ̃, bɑ koo Asirigibu kɑ Nimurodugii be tɑɑre, kpɑ bu sun wɔrɑ Asirigibu bɑ̀ n bɛsɛn tem wɔrimɑ.

⁶ Isireli be bɑ tiɑrɑ bɑ ko n wɑ̃ɑ tɔn dɑbinun suunu sɔɔ nge kɑko ɑrufɑɑnigiru te Yinni Gusunɔ u derɑ tɑ wɔrumɑ, ǹ kun mɛ nge gurɑ ye yɑ nɛmɔ tɛɛru, yɑ ǹ gɑ̃ɑnu yĩiyɔ tɔnun min di.

⁷ Isireli be bɑ tiɑrɑ bɑ ko n wɑ̃ɑ tɔmbun suunu sɔɔ, kpɑ bɑ n dɑm mɔ nge gbee sunɔ ge gɑ wɑ̃ɑ gbeeku yɛɛn suunu sɔɔ, ǹ kun mɛ yɑ̃ɑ gɔ̃ɔ sɔɔ. Mi gɑ duɑ kpuro, gɑ rɑ yɑɑ kɑsukuwɑ gu mwɛ. Goo kun mɑɑ kpɛ̃ u gu mwɑɑri.

⁸ Isirelibɑ, i seewo i bɛɛn yibɛrɛbɑ wɔri. Kpɑ i bu go mɑm mɑm.

⁹ Yinni Gusunɔ u nɛɛ, tɔ̃ru gɑrɑ sisi tè sɔɔ kon bɛɛn dumi kɑ bɛɛn tɑbu kɛkɛbɑ kpeerɑsiɑ.

¹⁰ Kpɑ n bɛɛn wusu kɑm koosiɑ. Kpɑ n bɛɛn gbɑ̃rɑnu suriri.

¹¹ Kon bɛɛn dobo dobogibu go. I ǹ mɑɑ ben dobo dobo wɑsi bɛɛn suunu sɔɔ.

¹² Kon bwɑ̃ɑrokunu kɑ kpee ni i girɑ kɔsuku. I ǹ mɑɑ nu sɑ̃ɑmɔ.

¹³ Kon bũu wi bɑ mɔ̀ Asitɑɑten sɑ̃ɑ yerun dɑ̃nu wukiri. Kpɑ n bɛɛn wusu kɔsuku.

¹⁴ Nɛn mɔru koo se, kpɑ n nɛn dɑm sɔ̃ɔsi bwese ni nu ǹ mɑn mɛm nɔɔwɑmmɛn mi.