YAASINƆ 28
SIM1 Yãvãnikɛrii dì bàa lɛ́, bee tó òtɛn pɛ́aro, gbɛ̃ mana dìgↄ̃ wↄ́rↄgↄ vĩ lán músu bà.
2 Tó bùsu taari kɛ̀ zↄ̃kↄ̃, a kínanↄ dìgↄ̃ dasimɛ, ama laakaride yãdↄ̃ri ni tó aafia gↄ̃ kun.
3 Kína kũ àdi wɛ́ tã takasidenↄa de lán legũ kũ à mà à pↄ́ble yàkaa bàmɛ.
4 Dokadarisarinↄ dì yãvãnikɛrinↄ sáabu kpá, dokadarinↄ sↄ̃ òdi fìti kɛ kũńwo.
5 Gbɛ̃ vãninↄ yãzɛde mì dↄ̃ro, ama gbɛ̃ kũ òdi Dikiri arɛ wɛtɛnↄ dↄ̃ swáswa.
6 Takaside taarisaride mana de aruzɛkɛde yãlɛkpɛrɛkɛrila.
7 Nɛ́ dokadari asãnsĩni vĩ, pãpãdenↄ gbɛ̃nna dì wé'i da a deamɛ.
8 Gbɛ̃ kũ àdi a aruzɛkɛ kara ↄgↄ'i zↄ̃kↄ̃ↄ gũn tɛn pↄ́ kakara gbɛ̃ kũ àdi takasidenↄ wɛ̃nda gwanɛmɛ.
9 Gbɛ̃ kũ àdi doka kpá sãkoto, Luda dì zã a aduakɛnan.
10 Gbɛ̃ kũ àdi gbɛ̃ mananↄ da zɛ́ vãnia ni lɛ́tɛ à da a zĩda tankutɛmmɛ, taarisaridenↄ sↄ̃ oni bo mana.
11 Ɔgↄde dì a zĩda ditɛ ↄ̃ndↄ̃de ũmɛ, ama takaside asãnsĩnide dì a ↄ̃ndↄ̃ dↄ̃amɛ.
12 Tó gbɛ̃ mananↄ zĩ̀i blè, gbɛ̃ sĩnda pínki dì ĩa dãmɛ, tó yãvãnikɛrinↄ kpata blè, baadi dìgↄ̃ mì kpáguimɛ.
13 Tó n n taarinↄ ùtɛ, ĩni gɛ́ arɛro, tó n ò akũsↄ̃ n tò, Luda ni n wɛ̃nda gwa.
14 Arubarikademɛ gbɛ̃ kũ àdigↄ̃ Dikiri vĩna vĩ ũ, sãgbãnade sↄ̃ àdi lɛ́tɛ à da yãn.
15 Gbɛ̃ pãsĩ kũ àdi kí ble takasidenↄa de lán músu kũ àtɛn pũtã bàmɛ, lán sàbo kũ àtɛn kusiḿma bà.
16 Don'arɛde kũ àdi wɛ́ tã a gbɛ̃nↄa faya vĩro, gbɛ̃ kũ à zã̀ ↄgↄvãnilenan wɛ̃̀ndii dìgↄ̃ gbã̀na.
17 Gbɛ̃dɛri kũ a laasun tɛn wari dↄa nigↄ̃ bàa lɛ́ ari à gɛ́ gaomɛ. Gbɛ̃ke sún kpánɛro.
18 Gbɛ̃ kũ àdi yã kɛ a zɛ́a nigↄ̃ aafiamɛ, yãdↄrↄsarikɛri sↄ̃ ani lɛ́tɛ kãnto.
19 Gbɛ̃ kũ àdi laakari dↄ a bú zĩa dìgↄ̃ kãna, gbɛ̃ kũ àdi pɛ́ gukoria sↄ̃ àdigↄ̃ kú takasi gũmmɛ.
20 Luda ni arubarika da náaniden manamana, gbɛ̃ kũ àtɛn wã à kɛ ↄgↄde ũ ni bo pãro.
21 Gbɛ̃wɛgwana manaro, bee kũ abireo gbɛ̃ ni taari kɛ burodi kusu yãi.
22 Sãnkarade dì wã kũ aruzɛkɛlenaao, àdigↄ̃ dↄ̃ kũ takasi ni a lero.
23 Gbɛ̃ kũ àdi kpãkɛ̃ gbɛ̃i nigↄ̃ nna kãao de gbɛ̃ kũ à a tↄ́ nna sìla.
24 Gbɛ̃ kũ à kpãni ò a de ke a daa, akũ àtɛn pi, taarinlo, ade lɛɛlɛ kũ kpãni wɛ́dewɛomɛ.
25 Gbɛ̃ kũ à wãkũ vĩ dì fìti damɛ, gbɛ̃ kũ à Dikiri náani vĩ mɛ́ ani karana le.
26 Gbɛ̃ kũ àtɛni a zĩda náani kɛ bi yↄ̃nkↄmɛ, gbɛ̃ kũ à tɛ́ ↄ̃ndↄ̃i mɛ́ ani bo mana.
27 Pↄ́ dì kĩa gbɛ̃ kũ àdi takasidenↄ gba pↄ́aro, òdi gbɛ̃ kũ àdi ń wɛ́ gwaro kámɛ.
28 Tó yãvãnikɛrinↄ kpata blè, baadi dìgↄ̃ mì kpáguimɛ. Tó ò gàga, gbɛ̃ mananↄ dì dagula.