ZABURA 22

¹ Ma Luda, ma Luda, à kɛ̀ dera n ma tonn? Ma wiki lɛ̀, à kɛ̀ dera ńdi su ma sura baroo?

² Ma Luda, ma lɛ́ zùnyĩ fãnantɛ̃, ama ńdi wemaro, ma wiki lɛ̀mma gwãani dↄ, mádi yĩtɛro.

³ Ń kú adona ń vutɛna kpatan, mↄkↄ̃n kũ Isarailanↄ dì n sáabu kpá.

⁴ Mↄkↄ̃mmɛ ó dizinↄ náani kɛ̀, ò n náani kɛ̀, akũ n ń mìi sì.

⁵ Ò lɛ́ zùnyĩ, akũ ò boki lè, ò n náani kɛ̀, akũ wé'i dí ń kũro.

⁶ Kↄ̀kↄ fítinnan ma ũ, bisãsirimɛ ma ũro, òtɛni ma sↄ̃sↄ̃, òtɛni ma gya bo.

⁷ Gbɛ̃ kũ òtɛni ma gwanↄ tɛni ma fobo, òtɛn lɛ́zuki kɛma, òtɛni ń mì kɛ dékũdekũ òtɛn pi:

⁸ Lákũ àtɛn Dikiri náani kɛ nà, à a sura ba, tó a yã kàagumɛ, à a mì sí.

⁹ Mↄkↄ̃mmɛ n ma bo ma da nɛ̀sɛn, n ma gwa aafia ma yↄ̃migↄrↄ.

¹⁰ Má na n ↄĩ zaa nɛ́'isↄmmɛ, ma Ludamɛ n ũ zaade má kú ma da nɛ̀sɛn.

¹¹ Ǹsungↄ̃ kú kũmao zã̀ro, zaakũ wari kɛ̀ kãni kũmao, gbɛ̃ke kun à kpámairo.

¹² Ò likamai dasidasi lán zùsanↄ bà, ò ma kaguraa kɛ̀ lán Basã bùsu zùsa gbãnanↄ bà.

¹³ Òtɛn lɛ́ atɛ̃ma lán músu ↄ́ↄdↄri kũ òtɛn pↄ́ kɛ yákiyakinↄ bà.

¹⁴ Ma gbãna tà lán í kↄtɛnaa bà, ma mɛ̀ gupɛkinↄ bòkũn pínki, ma mɛ̀ɛ yↄ̀ lán zↄ́saa bà.

¹⁵ Ma kòto kori kɛ̀ lán kpɛ̃nɛ kaso bà, ma nɛ́nɛ nà ma lɛ́ musu, ò ma wutɛ lán gɛ̀ɛ bà lukutɛ̃n.

¹⁶ Lɛwannanↄ gã̀ likanamai, gbɛ̃ vãni pìnↄ nàkarama, ò ma ↄnↄ kũ ma gbánↄ zↄ̃̀zↄ̃.

¹⁷ Mani fↄ̃ mà a wánↄ naro pínki, ò wɛ́ bìribiri, òtɛni ma gwa.

¹⁸ Ò ma pↄ́kasanↄ kpàatɛkↄ̃nɛ, ò kàpaa kpà ma uta yã musu.

¹⁹ Dikiri, ǹsungↄ̃ kú kũmao zã̀ro, mↄkↄ̃mmɛ ma gbãna ũ, ǹ mↄ́ ǹ kpámai likalika.

²⁰ Ǹ ma bo ń fɛ̃nɛda lɛ́i, ǹ ma wɛ̃̀ndi sí lɛwanna pìnↄa.

²¹ Ǹ ma bo músu pìnↄ lɛ́i, ǹ ma si zùsɛ̃ntɛ pìnↄ bɛ̃nɛa.

²² Mani n tↄ́ bo ma gbɛ̃nↄ tɛ́, mani n sáabu kpá kↄ̃kakaranaa gũn.

²³ Ákↄ̃nↄ Dikiri vĩnakɛrinↄ, à a sáabu kpá, ákↄ̃nↄ Yakubu burinↄ, à a tↄ́ bo, ákↄ̃nↄ Isarailanↄ, à mì natɛnɛ.

²⁴ Zaakũ adi takaside gya boro, adi a wɛ̃ndakɛ foboro, adi mìkpɛrɛ zunɛro, à sã kpà a wikilɛnaai.

²⁵ Mani n sáabu kpá pari kↄ̃kakaranaa gũn, mani lɛ́ kũ ma gbɛ̃̀nnɛ papa n vĩnakɛrinↄ wára.

²⁶ Takasidenↄ ni pↄ́ ble ò kã, Dikiri ki wɛtɛrinↄ ni a sáabu kpá, onigↄ̃ kú kũ wɛ̃̀ndiio gↄrↄ sĩnda pínki.

²⁷ Andunia lɛ́zɛkidenↄ nigↄ̃ Dikiri dↄ̃ ò arɛ dↄa, buri kũ ò kunnↄ ni kútɛnɛ ń pínki,

²⁸ zaakũ kíblena bi Dikiri pↄ́mɛ, àdi kí ble buri sĩnda pínkia.

²⁹ Andunia aruzɛkɛdenↄ ni donyĩ kɛnɛ ń pínki, kũ gbɛ̃ kũ ò kú ga lɛ́inↄ, gbɛ̃ kũ ò gɛ̀ɛ gɛ́kianↄ ni mì natɛnɛ ń pínki.

³⁰ Zia gbɛ̃nↄ ni donyĩ, oni Dikiri yã baba gbɛ̃ kũ oni sunↄnɛ.

³¹ Ò surabana yã o gbɛ̃ kũ òdi ń i kↄ̀ronↄnɛ, zaakũ à gĩnakɛ à kɛ̀.