ZABURA 32
SIM1 Arubarikademɛ gbɛ̃ kũ Luda a taarinↄ tònɛ à a durunnanↄ kɛ̃̀nɛ ũ.
2 Arubarikademɛ gbɛ̃ kũ Dikiri dì a durunna yã daro ũ, akũsↄ̃ manafiki kú à nɛ̀sɛɛ gũnlo.
3 Kũ ma yĩtɛ kũ ma durunnao, ma fɛ̃fɛ̃, ma wiki dìgↄ̃ dↄ zaa kↄnkↄ ari ↄkↄsi.
4 N ↄ dìgↄ̃ tↄ̃nama fãnantɛ̃ kũ gwãanio, ma gbãna làka lákũ guwãnagↄrↄ ifãntɛ̃ ma lɛ bà.
5 Akũ ma wennɛ ma durunnai, mádi ma yã vãni utɛnnɛ doro. Ma pì, mani ma taarinↄ o Dikirinɛ, akũ a ma durunna kɛ̃̀mɛnɛ.
6 Abire yãi n náanikɛri wɛ́ kɛmma a gↄrↄa, tó kisira tɛn su, ani a lero.
7 Ma utɛkimɛ n ũ, ndì ma bo wɛ́tãmmanaa gũn, ndì likamai ǹ ma sura ba.
8 Mani yã dannɛ mà n da zɛ́ kũ à de ǹ sɛ́a, mani lɛ́ damma, ma wɛ́ gↄ̃ tɛ́nyĩ.
9 Ǹsungↄ̃ kun laasunn sari lán sↄ̃ ke baragbãsↄ̃ bàro, tó ńdi sↄ̃mↄ káńnɛ kũ a bàaoro, òdi da n dↄ̀rↄↄaro.
10 Yã'ũmmanaa dì da gbɛ̃ vãninↄla, Dikiri yenyĩ dì lika a náanikɛrinↄa.
11 Gbɛ̃ mananↄ, à pↄnna kɛ Dikiri yãi, nɛ̀sɛpuradenↄ, à ayuwii kɛ à yáa dↄ.