ZIA YÃ 9
SIM1 Malaika sↄↄrode a kãkãki pɛ̀, akũ ma susunɛ è, à bò ludambɛ à lɛ̀tɛ zĩtɛ. Akũ ò Zĩngowɛɛ lòkoto mↄ̀nɛ kpàa,
2 akũ susunɛ pì Zĩngo wɛ̀ɛ lòkoto pì zɛ́ wɛ̃̀. Túsukpɛ bòn lán tãmatɛ zↄ̃kↄ̃ túsukpɛ bà, akũ Zĩngo wɛɛ pì túsukpɛ ifãntɛ̃ sira kũ̀, gu kɛ̀ síi níkiniki.
3 Kwanↄ bↄ̀tɛ túsukpɛ pìi gũn, ò dà zĩtɛla. Ò ń gbá gbãna lán andunia fínↄ gbãna bà.
4 Ò pìńnɛ òsun wari dↄ sɛ̃̀ɛaro ke lá ke lí ke, séde gbɛ̃ kũ ò Luda sèeda vĩ ń mì'arɛaronↄ.
5 Odi ń gba zɛ́ ò gbɛ̃nↄ dɛdɛro, ama oni ń da mɛ̀'ũmmanan ari mↄ sↄↄro. Ń wãwã de lán fí gbɛ̃pana wãwã bàmɛ.
6 Gↄrↄ birenↄa gbɛ̃nↄ ni ga wɛtɛ, oni ero. Ga ni ni ń dɛ, ama ga ni bàa lɛ́ńnɛ.
7 Kwa pìnↄ de lán sↄ̃ kũ ò soru mà kũ zĩ̀ionↄ bà. Ò pↄ́ke kúkuna lán wura fùraa bà, ń ãn de lán bisãsiri ãnn bà.
8 Ò mìkã vĩ gbã̀nagbãna lán nↄgbɛ̃ mìkã bà, ò sakanↄ vĩ lán músu saka bà.
9 Ń kùsɛ de lán mↄ̀ uta bà, ń dɛ̀mbɛrɛ kĩni dↄ lán gó dasi kũ sↄ̃nↄ tɛn gátɛ zĩ̀i gũn kĩni bà.
10 Ò vlã vĩ kũ kàao lán fí pↄ́ bà. Ń gbãna kú ń vlã pìnↄa, de ò wari dↄo gbɛ̃nↄa ari mↄ sↄↄro.
11 Zĩngowɛɛ lòkoto malaikaa pìmɛ ń kína ũ. Kũ Eberu yão a tↄ́n Abadↄ̃. Kũ Giriki yão sↄ̃ Apↄliↄ̃.
12 Yã pãsĩ káakupↄ gɛ̃̀tɛ, a mɛ̀n planↄ tɛn su a kpɛ dↄ.
13 Malaika suddode a kãkãki pɛ̀. Ma kòtoo mà à bò Luda arɛ turaretitikpataki kũ ò pì kũ wuraao bɛ̃nɛ siikↄ̃nↄ kpa.
14 À pì malaika suddode kũ à kãkãki kũnaanɛ: Ǹ malaika gbɛ̃nↄn siikↄ̃ kũ ò yĩyĩna swada kũ òdi pi Yuflati sarɛnↄ poro.
15 Akũ à malaika gbɛ̃nↄn siikↄ̃ kũ ò ń soru kɛ̀ wɛ̃̀ birea mↄ birea gↄrↄ birea gↄrↄ zaka bire yãinↄ pòro, de ò bisãsirinↄ lɛu aakↄ̃de dɛdɛ yãi.
16 Ò soza sↄ̃denↄ dasi lɛ́ òmɛnɛ, ò gbɛ̃nↄn miliↄ̃ wàa domɛ.
17 Wɛ́gupu'enaa pìi gũn lán ma sↄ̃ pìnↄ kũ ń dìrinↄ è nàn dí: Ò mↄ̀ utanↄ dadana tɛ̃ɛ lán tɛ́ bà, búgu lán buluu bà, kpà'ikpa'i lán ifãntɛ̃gbↄ̃ↄ bà. Sↄ̃ pìnↄ mì de lán músu mìi bà. Tɛ́ kũ túsukpɛo kũ ifãntɛ̃gbↄ̃ↄo tɛn bo ń lɛ́n.
18 Kisira mɛ̀n aakↄ̃ díkĩnanↄ, tɛ́ kũ túsukpɛo kũ ifãntɛ̃gbↄ̃ kũ àtɛn bo ń lɛ́ gũnwo mɛ́ à bisãsirinↄ lɛu aakↄ̃de dɛ̀dɛ.
19 Zaakũ sↄ̃ pìnↄ gbãna kú ń lɛ́ gũn kũ ń vlão dↄ. Ń vlã de lán mlɛ̃̀ɛ bà, ò mì vĩ kũ òdi wari dↄo gbɛ̃nↄa.
20 Gbɛ̃ kpara kũ odi gaga kisira pìi musuronↄ, odi nɛ̀sɛ litɛ ò pↄ́ kũ ò kɛ̀ yã tòro. Ò kpɛ́ òtɛn kútɛ tãnanↄnɛ kũ pↄ́ kũ ò kɛ̀ kũ wuraao kũ andurufuuo kũ mↄ̀gotɛ̃o kũ gbɛ̀ɛo kũ lío. Pↄ́ pìnↄ dì gu ero, òdi yã maro, òdi táa o sↄ̃ro.
21 Odi nɛ̀sɛ litɛ ò ń gbɛ̃dɛna tòro ke ń pↄ́dammana ke ń gbãsĩkɛna ke ń kpãni'ona.