ROMUDENƆ 10
SIM1 Ma gbɛ̃nↄ, yã kũ má yei ma swɛ̃̀ɛ gũn matɛni a wɛ́ kɛ Ludaamɛ Isarailanↄ surabana ũ.
2 Mani fↄ̃ mà ń sèeda kɛ kũ ò kokari vĩ kũ Luda yão, ama ń wɛ́ kɛ̃naro.
3 Zaakũ ò dↄ̃ deran Luda dì tó yã bo kũńwo nna nàro, akũ òdigↄ̃ wɛtɛ yã bo kũńwo nna kũ ń zĩda gbãnao. Deran Luda dì tó yã bo kũńwo nna nà, odi wero.
4 Zaakũ Kirisi Musa doka lɛ́ pàpa, de yã bo kũ gbɛ̃ sĩnda pínki kũ à a náani kɛ̀o nnamɛ.
5 Deran doka dì tó yã bo kũńwo nna nàn Musa ò a takadan à pì, gbɛ̃ kũ à yã pìi kɛ̀ mɛ́ ani wɛ̃̀ndi le a gũn.
6 Lákũ ludanaanikɛnaa dì tó yã bo kũńwo nna nà kɛ̃na a yãn à pì: Ǹsun o n nɛ̀sɛn ǹ pi, dí mɛ́ ani gɛ́ ludambɛ à Kirisi kiparo,
7 ke dí mɛ́ ani gɛ́ gyãwãn à Kirisi bo ganlo.
8 Yã kũ à òon dí: Yã pì kú kũnwo kãni, à kú n lɛ́n kũ n nɛ̀sɛɛo. Ludanaanikɛna yã kũ odì a waazi kɛn yã pì ũ.
9 Tó n ò kũ lɛ́o gupuraa kũ Yesumɛ Dikiri ũ, akũsↄ̃ ń sì n swɛ̃̀n kũ Luda a bò gan, ani n sura ba.
10 Zaakũ yã pì sina n swɛ̃̀n mɛ́ àdi tó yã bo kũnwo nna, akũsↄ̃ yã pì ona kũ n lɛ́o mɛ́ àdi n sura ba.
11 À kɛ̃na Luda yãn ò pì, wé'i ni gbɛ̃ kũ àtɛni a náani kɛ kũ zikiro.
12 Yudanↄ kũ buri pãndenↄ donadona kↄ̃nɛro, zaakũ ń pínki Dikiri dokↄ̃nↄmɛ, àdi karana kɛ gbɛ̃ kũ òdi a sísinↄnɛ ń pínki.
13 Zaakũ Dikiri sìsirinↄ ni bo ń pínki.
14 Deran gbɛ̃nↄ ni a sísi a náanikɛnaa sarii? Deran oni a náani kɛ a yãmanaa sarii? Deran oni a yã ma waazikɛrii sarii?
15 Tó òdi waazikɛrinↄ zĩḿmaro, deran oni waazi kɛńnɛ nàa? À kɛ̃na Luda yãn ò pì: Baarunnakparinↄ suna dì kɛńnɛ nna fá!
16 Ama adi kɛ gbɛ̃ sĩnda pínki mɛ́ à baaru nna pì sìro. Akũ Isaya pì: Dikiri, dí mɛ́ à ó yã sìi?
17 Lɛmɛ ludanaanikɛnaa dì bo a yãmana kĩnaamɛ, yã pì sↄ̃ bi Kirisi yãmɛ.
18 Ma pì yↄ́ↄ! Odi manloo? Ò mà. Ń kòtoo dà anduniala pínki, ń yã'onaa gɛ̀ɛ ari zĩtɛ lɛ́a.
19 Ma pì yↄ́ↄ! Isarailanↄ dí dↄ̃ro yá? Káaku gĩa Musa pì: Mani tó ò gↄ̃ba kpá kũ buri kũ ò de ma gbɛ̃ ũronↄo, mani tó ń pↄ fɛ̃ bisãsiri wɛ́siradenↄ yã musu.
20 Akũ Isaya Luda yã ò kũ kùgbãnao à pì: Gbɛ̃ kũ odi ma ki wɛtɛronↄ mɛ́ ò ma le, ma a zĩda mↄ̀ gbɛ̃ kũ odi ma gbɛkaronↄnɛ.
21 Isarailanↄ yã musu à pì: Zaa kↄnkↄ ari ↄkↄsi ma ↄ dↄ̀ buri sãgbãnade kũ ò fɛ̃na kũmaonↄnɛ.