Paisowa 19

1 Apolosi hola ma miyamiyana Kolinto Taonna yai. Na Paulo Eisiya Nuêuna ganahewana yai ya lau fote leu Efeso taonna. Amainiya tau famuli watanina haisa ya failobahidi, 2 be ya fatiêoidi, iyen, Fuyanna ami kawawananaha mate, Yaluwa Tabuna ami abi, e hola? Alinana sa bui, tiyen, Higeêe! Yaluwa Tabuna mate somo? Hige wasana ai sibai. 3 Paulo ya fatiêoidi iyen, Babasito somo - somohena ami abi? Alinana sa bui tiyen, Diyon ena babasito. 4 Paulo iyen, Diyon ena babasito mate tau nuwabui, enehedi. Habahim Diyon, Isalaela dodogadi ya falibadi mate mulina yai, doga tau laoma ni bena sa kawawananahaêen - mate Yesu ai lisina. 5 Wasa te sa atahiyen, yo fede Guyau Yesu hesana yai sa babasito. 6 Paulo nimana ya tole lawen lisidi, yo fede Yaluwa Tabuna ya laoma lebedi. Alina hesa - hesa yai sa libaliba yo nuwatuhu somo Yaluwa ya feledi sa libalibaedi. 7 Tatau oulina doha safuhudohudoêi luwaga. 8 Paulo ya lau Diusi edi aba oiêoigogo lumana yai be amainiya nawalahi faihona ma nuwa adidilina dodoga maêena sa libaliba. Nuwadi bena sidohana ya abidi be sa laoma Yaubada lisina ya famala edi baêisa. 9 In moho, haisa sa nuwa poêi be ena liba hige ti lau watan yo “Guyau ena Edaêeda Fafamuli Watanina” sa liba faheyaya dodoga matadi yai. Yo fede, Paulo ya lau afuledi na tau kawawananaha ma afa haidana sa lau be doga hesa hesana Tailanusi ena aba lau faêata lumana yai, ya lau faêata lahai esega - esega yai. 10 Lau faêata ni sa laulawen eeâ, boliman luwaga be Diusi yo Giliki salumadi Eisiya nuêuna yai sa miyamiya mate Yaubada ena liba sa atahiyen. 11 Yaubada Paulo ya fapaisowa be noêo sa diêo wananaha, ya lau ginauli, 12 be yena muyahasa aba sausau e liêo dala Paulo tauna sa eliêina na sa lawedi tau asiêasiyebo sa faêeliêinadi haba sa loholoho yo yaluwa heyaheyayadi sa lau afuledi. 13 Diusi haisa fuya ouêouli sa lau sa adaêadau be yaluwa heyaheyayadi sa liba duidi mate hinaga sa anpate bena yaluwa heyaheyayadi sa liba duidi Guyau Yesu hesana yai. Yo fede yaluyaluwa ni sa falibadi tiyen, Yesu hesana Paulo ya fapaisowa be ya lauguguya mate hesana yai, au kalamahano! 14 Diusi edi tau antalasam baêisana hudoêi hesana Sekewa nanatuna tatau faligigi luwaga laulau ni sa ginaginauli. 15 Fuya hesa yaluwa heyaheyayana hudoêi alinadi ya bui iyen, Yesu yo Paulo hinaga E sibaidi. Na umi safaluma? 16 Yo fede doga yaluwa heyaheyayana lisina yai ni ya tulufidi be ya lei hafihafitidi. Ya antalainidi, be ma tau afaêafadi yo ma omaêomatadi ena luma sa gela afulen. 17 Wasa te Diusi yo Giliki, Efeso yai sa miyamiya, sa atahiyen mate mahudoêidi êwasabu ya famohafudi be Guyau Yesu hesana sa faêatitiyen. 18 Habahim tau kawawananaha peidi sa laoma Paulo lisina yai be edi heyaheyaya sa liba famahatadi. 19 Tau ayaêayahan yo tau kalakalawan hahaisa edi ginauli bukadi sa abi gogondima, be sa gabu goludi dodoga matadi yai. Bukadi maisadi sa pei gogondi, mate, laêina doha siluba piêadi 50 tausan. 20 Laulaudi te lisidi yai, Guyau ena liba ya tadada heyaheyaya, ma gigibwalina. 21 Efeso yai somo sa tubu na mulidi yai, Paulo ena nuwatuhu bena ya lau Yelusalem. Na hola ya bwaêi ya lau Masedoniya yo Akaiya Nuêudi yai, na ai mulina, haba ya lau Yelusalem. Yo iyen, Ainiya, habahim E lau Loma E antaumanaidi. 22 Tau saguhina luwaga, Timoti yo Elasetusi ya fatamalidi, sa lau Masedoniya na in Eisiya nuêuna yai ya miya begana. 23 Fuyanna yai, faibayaho laêilaêi ya tubu mate, “Guyau ena Edaêeda” debana yai. 24 Siluba tau laulau ginauli hesana Dimetiyusi, yaubada bwalabwala waihinina hesana Atemesi, aba fafadebasaena dubuna tautauna mate lumadi kikiluka siluba yai ya ginaulidi be lisidi yai tau paisowa sa uneêuneidi be maisadi, moni laêilaêidi sa abiêabinidi. 25 Yo fede, maidadi salumadi nima paisowa hudohudoêidi lisidi yai doha iti adi paisowa ya yoga gogondi sa laoma be ya falibadi iyen, Tatau! Paisowa yai te, ami sibai mate eda moni eda aba lobahina. 26 Dodoga boludi Efeso yo Eisiya Nuêuna yai, Paulo ya nuwa oidi be ya foya ponolidi mate haêa ami itadi yo ami atahiyedi, yo ya liba, iyen, “Dodoga nimadi yai yaubada sa laulau ginauli, hige yaubada wananahadi." 27 Heyaya amainiya! Hige moni eda aba ginaulina moho Paulo i liba faheyaya. Yo hinaga yaubada waiwaihinna, Atemesi, aho te, sa fadebasae Eisiya nuêuna mahudoêina yo tanoêubu mahudoêina yai, ibege ena dubu ti faêatitiyen yo ena gigibwali haba ya gogoma. 28 Baiwa liba te sa atahiyen yo fede sa gafu pou be sa halahalabo tiyen, “Efeso dodogada! Eda yaubada, Atemesi ya hasai wananaha!” Na ti yoga boda, “Efeso dodogada! Eda yaubada, Atemesi ya hasai wananaha!" 29 Taon dodogadi, bobohalahala ya laêi wananaha be Masedoniya dodogadi luwaga, Geiyesi yo Alisitaku, iti Paulo afa haidana, sa solu weêaweêa lawedi aba oigogo laêilaêina yai. 30 Paulo ya fanuha bena ya lau baiwa matadi yai ya libaliba, na tau kawawananaha sa laugagayoêen. 31 Eisiya babadadi haisa, Paulo afa haidana, hinaga liba sa fatamali. Sa anêetai bena tabu i lau aba fafaêoigogo laêilaêi yai. 32 Dodoga sa faêoigogoma mate, nuwadi sa ponopono; haisa ginauli hesa sa halahalaboêen, na haisa somo hesa. Somo ana halulu sa lau niya mate, dodoga boludi hige ti sibai. 33 Diusi dodogadi sa andudu balabala be Alesandiya sa lawen baiwa nuwanuwadi yai. Na haisa baiwa ganahewana yai, sa yoga lau lisina, sa fatalaha bena somo ya laulau te ya liba famahata. Habahim, Alesandiya nimana ya lau hitin bena gagali sa fatautau be haba ya falibadi mate somo ya laulau te, hige Diusi dodogadi adi gilu. 34 Fuyanna sa nuwatuhu lobahi in Diusi dogana mate mahudoêidi sa halahalabo gogo tiyen, Efeso dodogada! Eda yaubada, Atemesi ya hasai wananaha! Doha mate sa laulau bodai eeâ, awa luwaga sa ofi. 35 Efeso edi taon kalakina, ya lau biliyedi be gagali sa fatautau. Na iyen, Efeso taonna tataumiu! Doga mahudoêina tanoêubu yai sa sibai mate Atemesi ena dubu yo umeêehu fafatabuna galewa yai ya beêuma, ita te itaêita watanidi. 36 Mahudoêimiu mate ami sibai mate ginaulidi te, wananaha. Au famakano! Tabu au nuwa feula! 37 Tatau ami foyahidima amaiteêi mate hige eda dubu yai ti angafu, e eda yaubada waiwaihinna ti liba fafaheyaya. 38 Aba lau fatala soêesoêedi, yo tau fafadudulai sa miyamiya, be ibe Dimetiyusi yo falena tau paisowa edi fatala pili sai hesa lisina yai, gonowana sa fadudulai. 39 Yena liba haisa sa otaêota, mate hinaga ai aba lau fatala haba sa fadudulaidi. 40 Somo aho te ya tubu, mate hige aniyona. Yena ami bobohalahala, ai halana haba sa fagilumiu be sa falau fatalamiu. Haba somo ami libaen? 41 Ya libaliba ofi, mulina yai, oigogo ya gudu.