Paisowa 25

1 Gawana Fesitu ya mahanoma nuêuna yai, na lahai faihona mulidi yai, Sesaliya Nuêuna ya lau afulen na ya aulaha ya hasai Yelusalem. 2 Amainiya maêena tau antalasam babaêisadi yo Diusi babadadi sa faêoigogo be edi lau fagilu sa fafinahe bodai. 3 Fesitu sa anêetai be bena Paulo ya fatamali lawen Yelusalem, paêana ai edaêeda haba sa nahai be sa wunui. 4 Alinadi ya bui iyen, Paulo haêa deli yai Sesaliya yai. Hige walolona haba E fuyo niya. 5 Yo fede ya falibadi iyen, “Tanutanuwaga haisa ma afa haidagu ai lau Sesaliya. Be yena taumoho te somo ya ginauli faheyaya haba ana sadi ami felen." 6 Fesitu maêedi sa miya nuwana lahai 8 e 10, na habahim sa lidi Sesaliya. Bobonna aba lau fatala yai ya taêai na habahim ya lau faliba be Paulo sa leyama. 7 Paulo sa famahanoyama, Diusi safalumadi Yelusalem yai sa laoma sa obiyo fafataêiêili, na edi lau fagilu peidi sa libaedi Paulo hewana yai, in moho, edi aba fagiluna hige aba fawananahadi. 8 Paulo ena ya tona galagala iyen, Yau hige Diusi edi laugagayo ya utusi, e Dubu Tabuna ya faheyaya, e Loma edi Kin Sisa lisina yai somo ya ginauli faheyaya. 9 Fesitu, bena Diusi nuwadi ya faloholoho, yo fede ya fatiêo lau Paulo lisina iyen, Wa fanuha bena wa lau Yelusalem, be ainiya E falau fatalam? 10 Paulo iyen, Hige gonowana! Itete Loma Baêisana, Sisa, ena aba fafalau fatala yai, bena aiteêi sa falau fatalagu. Um hinaga haêa wa sibai mate hige somo laêi ya ginauli faheyaya Diusi lebedi yai. 11 Ibe laugagayo E utusi, yo somo E ginauli faheyaya maisana peêi, mate ena dudulai. Ibege ya anfaleyen. In moho, ibe yena bwalabwala yai agu maisa sa felegu, hige sai laêi ena dudulai bena i tolegu nimadi yai. Logena, Loma Baêisana Sisa E anêetai bena egu lau fatala ya atahi. 12 Fesitu tau faliba fasibasibana, maidana sa oiliba ofi, mate ya libalau Paulo lisina iyen, Haêa Loma Baêisana wa anêetai, be haba wa lau lisina. 13 Lahai fisa mulidi yai Kin Agilipa yo lofuna Benisi sa lau Sesaliya be Fesitu sa antaumanai yo sa lautoêiyen. 14 Amainiya sa miya lahai fisa, habahim, Fesitu, Paulo wasana ya dedei Kin Agilipa lisina yai. Iyen, Taumoho hesa amaiteêi, Filiki ya falau deli be ya lau afulen. 15 Na fuyanna E lau Yelusalem, tau antalasam baêisadi yo Diudeya babadadi sa anêetaigu, bena ana sadi E felen. 16 Na alinadi E bui, yawa, “Ai Loma ema laulau mate, ibege doga ai fagilu napai be ai fele afulen tau fagiluna nimadi yai. Bwaêibwaêina bena enehena ya tona galagala ai matadi." 17 Tau fagiluna sa laoma amaiteêi mate hige ya bagibagi. Bobonna, aba laulau fatala yai E taêai na liba E fatamali be Paulo sa leyama. 18 Tau fagiluna sa mwaito be sa libaliba, na nuwagu yai yawa, “Haba somo lisina yai ana sadi sa felen?" 19 Fedebom, edi lauêuêula abiêabina moho yo doga hesa hesana Yesu, haêa ya peêi, Paulo ya libaen mate ya mwahuli fuyo, haladi yai sa faibayaho. 20 Mata paêana yoêoina mate ulugu ya kuêu, be Paulo E fatiêoi ibe gonowana ya lau Yelusalem be ainiya haba fadudulai bodaina. 21 In moho, Paulo ya anêetaigu bena E abi didin eeâ, Baêisa Sisa haba ya falau fatala fuyoi. Lisina yai E liba, be sa gati fuyoi eeâ, E fatamali lawen Loma Baêisana lisina. 22 Kin Agilipa iyen, Egu fanuha bena doga ni ena liba E atahi. Fesitu iyen, Bobon habahim wa atahi. 23 Bobonna Agilipa yo Benisi sa leli na sa lau honehone be sa luhulau aba lau fatala ganahewana yai maidadi hiyala tau lau kulukuluwena haisa, yo taon babadadi. Na habahim, Fesitu ya lau faliba, be Paulo sa leyama. 24 Fesitu iyen, Kin Agilipa yo salumadi aho amaiteêi, doga te ami ita? Diusi mahudoêidi amaiteêi yo Yelusalem yai edi fatala pili lebena yai, logena sa anêetaigu be E falau fatala. Na sa halahalabo tiyen, Ibe ya peêi mate, ya loholoho! 25 E lobahi mate hige ana mata hesa debana yai haba i peêi. In ena anêeta Loma Baêisana lebena yai, haba E fatamali lawen Loma. 26 Somo haba E uli Kin enehena? Ana sadi hige i mahata! Sidohana haba Sisa egu fafalibana? Logena E foyahiyama lisimiu yo, um Kin Agilipa, matam yai! Ana mata yoêoina mulina yai, haba Sisa ena E uliêuli be E faliba. 27 Hige i dudulai bena tau lau deli aba fagiluna hige ya lobahi na haba ya dui i lau Sisa lisina.