Paisowa 28

1 Ai, ma loholohomai fote yai, habahim êe sibai bonabonaluwa te hesana Malata. 2 Dodoga amainiya mate sa abi komakomaniêimai. Ya usa na nuêu ya gogoma, yo fede oyagi sa yufi be êe anmwahibo. 3 Paulo oyagi lagalagadi ya tano gogoidi, be ya fafapei lau oyagi alaêalana yai. Weso anêan nalina oyagi gigibwalina amnana ya atahi, yo fede ya kalamahanoma, be Paulo nimana ya nali. 4 Malata dodogadi wa weso sa ita Paulo nimana yai ya kaukauti yo fede ibodi sa libaliba tiyen, Moêisa, doga te mate tau aiyunu hesa! Paêana gabogabo yai ya gelama ma loholohona. In moho “Tau Fakasa yaubadana” ya fanuha bena Paulo ya peêi. 5 Na Paulo nimana ya tawa luhiluhiyen, yo fede, weso ya lubi fapito lawen oyagi alaêalana yai. In moho Paulo hige i peêi. 6 Sa kinokinoi, na tiyebom, Nimana haba ya pou e haba ya guli lidi be ya peêi. Sa bagi watan eeâ, aêawana ya lofa, na hige somo i tubu lisina yai. Edi nuwanuwatuhu sa buidi, be sa liba tiyen, Nuwana in yaubada hesa! 7 Ema aba tuba hiti (nuêuna) sadaina yai mate bonabonaluwa ni, baêisana Pubilisi ena tanohi. Ya yoga hitinimai be lahai faihona ai ana taumana. 8 Pubilisi tamana ya lepa. Tauna sa gigigibwali yo ya lau mulimuli mate êwasina. Paulo ya lau tau lepa ena aba enoêeno yai be ya abilau tauna yai na ya lauêuêula, yo fede Guyau ena gigibwali yai ya faloholoho. 9 Laulau te ya tubu, mulina yai mate tau lepalepa mahudoêidi bonabonaluwa yai ni, sa laoma, be ya faloholohodi hinaga. 10 Fuyana ai amainiya, ainauya boludi sa felemai. 11 Nawalahi faihona mulidi yai, Alesandiya wagana hesa hesana “Oitau Godegode” yalasi hola ya ita watan Malata bonabonaluwana yai eeâ, ya towa motu, habahim ya lau Loma. Yo fede somo êe fanufanuhadi ema sa soi êe husaidi wagana yai na êe awa be êe adau boda. 12 Silakusi taonna yai êe mahano be amainiya êe miya, lahai faihona. 13 Amainiya êe gelu boda, be êe duna Legium taonna yai. Bobonna hwayahwayau mulimai yai ya towama be êe boboyo eeâ, lahai fafaihonana yai êe duna Puteoli taonna yai. 14 Amainiya tau kawawananaha haisa êe failobahidi. Sa yoga hitinimai, be lebedi yai êe miya wiki esega. Habahim êe lau fote êe lau Loma. 15 Tau kawawananaha hahaisa Loma yai wasamai sa atahiyen be sa laoma beeâ, taon hesa hesana “Apusi Maketi” yo “Taumana Lumadi Faihona” amainiya sa lobahimai. Paulo ya itadi mate Yaubada ya lautoêiyen yo nuwana ya adidili. 16 Fuyanna êe mahano lau Loma yai, gabeman hesa Paulo ya faliba be iyabona ya gogo hudoêi, na tau gatinina mate tau hiyala hesa. 17 Lahai faihona mulidi yai, Diusi babadadi, Paulo ya yoga gogoidima be iyen, Falegu Isalaela! Hige eda dodoga lisidi yai somo ya faheyaya, e ada ulutubu miyamiyadi ya utusidi. In moho, Diusi babadadi Yelusalem yai sa augu yo sa fele lawegu Loma Gabeman dodogadi nimadi yai. 18 Loma gabeman babaêisadi sa fatiêo buibuigu yo sa fanuha bena sa soêe fahigu, paêana hige somo hesa ya faheyaya debana yai haba ya peêi. 19 In moho Diusi babadadi sa êwaiyoêo. Hige egu edaêeda hesa somo be, Loma edi Baêisa, Sisa, E anêetai bena ya falau fatala fuyoêigu, na hige bena falegu Diusi ya fagiludi. 20 Mata paêa te debana yai E lau falibaimiu be ami laoma bena E itamiu yo te libaliba. Paêana Isalaela ena sunuma yai seni yai te sa augu. 21 Sa libalau Paulo lisina tiyen, Wasam hige Diudeya yai ema ti uliyama yo afa haidada Isalaela amainiya sa laoma hige wasam somo heyaheyayana ti libaen ai atahiyen. 22 In moho em nuwanuwatuhu bena êe sibai paêana dodoga nuêu ouêouli yai mate “Guyau Edaêedana” pelena te sa êwaiêwaiyoêoêen. (Paisowa 22:14, Paisowa 24:14, Paisowa 24:22) 23 Yo fede ana lahai sa golu maêedi Paulo. Na lahaina yai ni, dodoga boludi sa laoma Paulo ena aba miyamiya yai. Yaubada ena Aba Baêisa Nuêuna wasana ya dede famahata lebedi yai, hwalahwalala ya lau eeâ, ya maihona. Ya anpate bena nuwadi ya abidi be haba Yesu wasana, Mose ena laugagayo yai yo peloweta edi uliêuli yai, sa kawawananahaêen. 24 Haisa, ena libaliba yai nuwadi ya abidi na haisa hige ti kawawananaha. 25 Sa faibayaho be hige nuwadi esega. Sa fatubu bena sa aulaha, na Paulo ena liba ofiêofina yai, iyen, Yaluwa Tabuna ena gigibwali yai, Peloweta Isaiya wahawahamiu ya faliba dudulaidi iyen, 26 Yaubada ya liba, doha ite: Au lau be dodoga te, ai lisidi auwe, “Haba ami ataêatahi, na ibege au nuwatuhu lobahi; haba ami ita, na ibege au ita lobahi.” (Maleko 4:12) 27 Dodoga te sa nuwa poêi wananaha, nuwadi sa anêanloya be beyadi sa tipadi yo matadi sa fatoudi. Ibe higeêe, haba matadi sa falaladi, be ginauli sa itadi, yo beyadi haba sa taêafasi, be liba sa atahiyedi, yo ginauli haba sa nuwatuhu lobahidi; haba sa timuli be sa fuyoma lisigu, na haba E faloholohodi. (Isaiya 6:9-10) 28 Paulo ena liba ya falafu sofa iyen, Logena, E fanuha bena ami siba mate, Yaubada ena famwahuli wasana haêa ya lau taêowawa lisidi yai be iti haba sa atahiyen! 29 Ya liba ofi mulina yai, Diusi ma faifaibayahodi sa aulaha sa lau. 30 Paulo luma hesa ya famaisa be amainiya ya gogo boliman luwaga. Na safalumadi sa laoma lisina mate ya yoga hitinidi, ma nuwa loholohona 31 Ma nuwa adidilina, Yaubada ena Aba Baêisa Nuêuna wasana ya libalibaen yo Guyau Yesu Keliso wasana ya fatalahadi. Hige gonowana sai laêi i gudu.