Diyobi 1

1 Taumoho hudoêi hesana Diyobi mate Udi Nuêuna yai ya miyamiya. Hige somo laêi lebena yai ti fagilu paêana in doga dudulaina. Yaubada ya fafadebasae yo heyaya ya anêanfaledi. 2 Nanatuna tatau faligigi luwaga yo wawahin faihona. 3 Ena sipi oulidi 7 tausan, kamela 3 tausan bulumakau 1 tausan yo donki 5 handele. Ya fagogo wananaha habahim tefa saisai dodogadi. 4 Nanatuna tatau, hesa - hesa ana fuya mataêasi ya ginauli ena luma yai na afa lolofudi faihona sa yogaidi be maidadi sa anêangogo. 5 Mataêasi ofina yai, Diyobi ya yogaidi sa laoma be ya abi nonohaidi. Hwalahwalala ya eno obiyo haba ainauya antalasam ya gabu nanatuna enehedi, paêana ena nuwatuhu iyen, “Bena nanatugu heyaya ti ginauli yo nuwadi yai Yaubada ti kaumananai.” Laulau te ya famala Diyobi ena miyamiya, fuya ouêouli. 6 Fuya hesa anelu sa laoma be sa fataumahata fuyoêidi Guyau nuwanuwana yai, na Tau Laulau Fagilu, Satani, ya lau watanidi hinaga. 7 Guyau ya libalau Tau Laulau Fagilu lisina iyen, Somo yai wa laolaoma? Na ena bui ya felen iyen, Tanoêubu E lau tiga fataêiêili. E leuleu yo E saesae ganahewana yai. 8 Habahim Guyau ya libalau Tau Laulau Fagilu lebena iyen, Egu tau paisowa, Diyobi haêa wa nuwatuhu fadosi e higeêe? Hige sai hesa doha in. Hige somo hesa lisina yai ti fagilu yo in doga dudulaina. Yaubada ya fafadebasae yo heyaya ya anêanfaleêedi. 9 Yaubada alinana Tau Laulau Fagilu, Satani, ya bui iyen, (Diyon 3:17-18) Diyobi hige i fadebasae gaibuim! 10 Fuya ouêouli, ana boga yo ena ginauli wa bobobodiyedi. Em faloholoho lebena yai be ya fagogo, ena sipi yo bulumakau sa tadada. 11 In moho aho, ibe ginauli mahudoêidi lebena yai wa kamfahidi, haba ya kaumananaem. 12 Guyau ya libalau Tau Laulau Fagilu lebena iyen, Logena, ena ginauli mahudoêidi nimam yai E toledi. In moho, tabu u abilau tauna yai. Habahim Tau Laulau Fagilu, Guyau ya lau afulen. 13 Lahai hesa Diyobi nanatuna sa anêangogo yo wain sa nomnom tuwahadi taumoho ena luma yai. 14 Wasa tau leyamana ya laoma Diyobi ya faliba iyen, Em bulumakau aba giyagiyali sa felifeliêi na donki mate fadidi yai sa anêanban. 15 Sabe dodogadi, em tau lau fayofayo sa tulufidi be mahudoêidi sa wunuidi na yosiyosi mahudoêidi sa angafuhidi. Yau ibogu moho E gela be E laoma, em E liba! 16 Hola ma libalibana yo fede wasa tau leyamana hudoêi ya laoma ya liba iyen, Namanamali em sipi yo tau itaêita watanidi mahudoêidi ya angabuidi. Yau ibogu moho, E gela E laoma em E liba! 17 Hola ma libalibana na wasa tau leyamana fafa faihonana ya laoma ya liba iyen, Tau angafu pwaludi faihona iti Kaladiya dodogadi sa laoma be em kamela mahudoêidi sa angafuhidi na em tau lau fayofayo sa wunuidi. Yau ibogu moho, E gela E laoma em E liba! 18 Hola ma libalibana na wasa tau leyamana fafatina ya laoma ya liba iyen, Nanatum sa anêangogo yo wain sa nomnom tuwahadi ena luma yai. 19 Ma esega na nuêu pitapitalina yai hwayahwayau laêilaêi ya towama! Luma ya towa fafataêiêili be ya guli. Nanatum mahudoêidi ya saêinidi be sa peêi. Na yau ibogu moho, E gela E laoma em E liba. 20 Yo fede Diyobi ya mwaito be ana luhuluhu ya kamgigi yo kuluna ya holi, ena nuwa heyaya fafaêilalana. Habahim ya guli lidi tanohi yai be Guyau ya fadebasae. 21 Na iyen, E tubuma, ma tau afaêafagu. Na ma tau afaêafagu haba E peêi. Guyau somo ya felegu, haêa ya fafuyo; In moho, Guyau E fadebasae. 22 Diyobi pilipili ya fahoina, in moho hige ena lau fagilu hesa Yaubada lebena yai, yo hige ena heyaya hesa.