Lau Kapole 1

1 Beyabeyana Yelusalem yai, doga ya ouli wananaha, na aho ite, afaêafana! Hesana beyabeyana ya laêi nuêu hahaisa ganahewadi yai, na aho ite doha hwabuhwabu. Beyabeyana in doha hatafele, na aho ite ya famala tau lau fayofayo. 2 Diuda dodogadi maihonadi sa tan eloêelolosi. Tau gadogadosisiyedi mahudoêidi sa lau afuledi, hige tau abi famatanodi. Afa haidadi mahudoêidi sa sana mulimuliyedi, sa famala adi waiyunu. 3 Be sa lawedi sa famala edi tau lau fayofayo yo mwahu sa fabaheidi. Mulimuli dodogadi ganahewadi yai sa miya na hige aba anyawasi loholohona ti lobahi. Waiyunu mate, Diuda dodogadi sa weêa dudu lidi beeâ, sa fasai bulubuluhidi. Hige edi aba gela hesa. 4 Iti kapoleâ, Saiyon edaêedadi mate afaêafadi. Itaêitadi doha ti tantan, paêana hige sai laêi i lau watanidi i lau be Yaubada i fadebasae. Yelusalem Taonna aba luhuluhu launa afaêafana. Tau antalasam sa tan nuwa heyaya, yo wawahin hasahasaladi sa tan eloêelolosi. 5 Ana waiyunu sa famala ena baêisa, habahim sa miya gwaugwau. Ena heyaya debadi yai, Guyau ya fakamkamna na nanatuna sa tohaidi be sa lawedi nuêu eda lofalofa. 6 Beyabeyana Yelusalem itaêitana olina, na aho ite higeêe. Ena babaêisa doha suisui guliguliyamna, tauna sa belubelu paêana hige kalahe, ma belubeluna ya gela tau faêoyowa matadi yai. 7 Edi kamkamna lahaidi yai, yo fuyana sa leuleu yo sa saisai mate, ginauli loholohodi mahudoêidi beyabeyana iti enehedi sa nuwatuhuidi. Isalaela dodogadi hige tau saguhidi fuyanna waiyunu sa fasai bulubuluhidi. Yelusalem ena heyaheyaya yai adi waiyunu sa itadi mate sa ala liuliuhwaêedi.