Luta 2

1 Naomi hwabuna Elimileka efana hesa hesana Bowasi. In ya bada yo ya mahula. 2 Fuya esega, Luta ya libalau Naomi lisina, iyen, Ibe wa liba afulegu, E lau dodoga edi gabu yai, be tau paisowa kalahe somo yai sa lau afuledi E tanoêidi. Egu siba gonowana nuwana, doga hesa haba ya itagu, yo haba ya fanuhagu, be ai lisina E paisowa. Luta alinana Naomi ya bui, iyen, Natugu, u lau! 3 Yo fede, Luta ya lau gabu hesa yai, be tau paisowa mulidi yai ya lau, be kalahe sa lau afuledi, ya tano gogoidi. Nuwa supu yai ya lau Bowasi ena gabu yai. 4 Hige walolona Bowasi, Betelehem yai ya mahano fuyoma, be tau paisowa ya lautoêiyedi, iye, Yaubada maêemiu. Na iti, alinana sa fafuyo, tiyen, Yaubada i saguhim. 5 Bowasi ya fatiêo lau tau paisowa edi baêisa lebena, iyen, Waihin hasahasalana ni, sai? 6 Tau paisowa tau ita watandi alinana ya bui, Waihin te, laolaoma. Mowabi yai maêena Naomi sa fiyoma. 7 Na ya anêetaigu, iyen, U abigu be tau paisowa ai mulidi, anêan ya tano. Haêa ya paisowa fatubu hwalahwalala yai, be atabahim, logulogu yai ya anyawasi. 8 Yo fede, Bowasi ya libalau Luta lebena yai, iyen, Hola ya fatalaham. Tabu kalahe ai gabu hesa u tano. Aiteêi moho, egu tau paisowa ma afa haidam. 9 U itaêita lau somo yai sa paisowa, bena ma afa haidam, Haêa egu tau paisowa tatau E falibadi yo E laugagayoêedi, ibege ti fasinam. Na yena gadom ya magu, u lau be hoêowa sa yahi kaulidi, am u nom. 10 Luta ya dulu lidi ena faêatiti ya ginauli, na ya libalau Bowasi lebena, iyen, Yau taêowawa. Sidohana be wa modeêegu? Yo paêana somo wa abi loholohoêigu? 11 Bowasi alinana ya bui iyen, Haêa E siba, lawam ena ginauli mahudoêidi wa ginaulidi, lahum ena fuya peêi mulina yai. E siba sidohana tamam, tinam yo em nuêu wa lau afuledi, na wa laoma, beyabeyana dodoga hige u sibaidi, lisimai yai wa miya. 12 Somo wa ginauli, haba Yaubada ya famaisam, be maisam mahudoêina haba wa abi Isalaela eda Yaubada lebena yai, haba loguloguna yai ya bobodiyem. In lebena yai wa laoma, mwahuli wa abi. 13 Bowasi alinana Luta ya bui, iyen, Baêisa, um wa loholoho wananaha lebegu yai. Nuwagu wa faêadidili, paêana wa abi komakomanigu. In moho, E nuwatuhui mate, yau hige em tau paisowa laêi maêegu gonogonowamai. 14 Kalahe fuyana yai Bowasi ya libalau Luta lisina, iyen, U laoma, be fwalawa tefana u abi, na u bwalui ai liêu. Yo fede, ma afa haidana tau paisowa sa taêai, na Bowasi kalahe gabugabudi haisa ya fatamali lawen lisina. Ya anêan eeâ, bogana ya yahayaha. In moho, ana kalahe ya antole; hige i faêofidi. 15 Habahim, ya aulaha be ya fuyo gabu. Ana ya tano boda. Muli yai Bowasi ena tau paisowa ya falibadi, iyen, Au ita afulen, tabu somo au libaen ai lebena. In moho, gabu anêandi pilidi yai, haisa au solu fahidi be au lau afuledi, haba ai ana ya tanoêidi. 17 Amainiya Luta ana kalahe ya tano gogo eeâ, ya mailafi. Na ya abi lisi mate, begana haba 10 kilograms ya lobahi. 18 In kalahe ya tanoêidi, na ya fuyo edi nuêu be lawana ya faêita, oulina fisa, yo hinaga anêan antoledi ya felen. 19 Naomi ya fatiêo lau Luta lisina, iyen, Somo yai wa tanoêidi? Sai ena gabu yai wa paisowa? Haba taumoho ni Yaubada ya fanuwa loholoho, paêana ya abim be wa paisowa. Yo fede, Luta, Naomi ya faliba mate Bowasi ena gabu yai ya paipaisowa. 20 Naomi ya libalau lawana lebena, iyen, Guyau ena faloholoho Bowasi ai lisina! Ena liba fasunuma tau mwahuli yo tau peêi lisidi yai hige ofina! Yo ya liba fiyo, iyen, Taumoho ni ama hwahwayasa hesa wananahana. In tau ita watanimai. 21 Luta Bowasi alinana ya libaen, Hinaga iye, Bena ma afa haidagu, ena tau paisowa, êe paisowa eeâ, êe lau gabu faêofi. 22 Na Naomi ya libalau Luta lebena, iyen, Ihiâ, Natugu, loholohona mate wawahin ni ma afa haidam au paisowa Bowasi ena ai gabu. Yena doga hesa ena ai gabu wa paisowa ibe ti iwalaim. 23 Yo fede, maêedi Luta bali yo witi gabudi luwaga sa lau gabu ofinidi. Na amainiya ma lawana sa miya esega.