2 Tesalonicenses 2

1 Cunc’aÆpimaye joupa oÆsina’ ticuaicoconno ÆaÆPoujna Jesucristo. OÆsina’ lafot’Æe’monga’, jiÆpe litine aÆmajnta anuli iÆque. Itsiya caxc’ai’ilhuo’, camilhuo’: Aga tu’i’molhuo’: “Joupa icuai’ma al Cueca’ Quitine. Icuaicona’ma ÆaÆPoujna, cal Espíritu Santo alu’iponga’.” O tu’itsolhuo’: “Ƚinca icuaicona’ma. IÆne Pablo jouc’a liyejmalepa alumme’eponga’ caÆje’e tuya’e’ toÆta’a.” Ja’ni tu’itsolhuo’ toÆta’a, imanc’ aimimufc’o’molhuo’ loÆpicuejma’, aimonÆ‘e’me Æinca. 3 Ja’ni toÆta’a tehueÆe tifel’mitsolhuo’, o ja’ni ituca’ liÆ‘ejma’, aimolapenuf’e’mola’ liÆtaiqui’. ToÆpo’noÆe loÆpicuejma’, aimifel’mi’molhuo’. IÆne nonespá toÆta’a infel’miyale, a’i toÆta’a lo’iya micuaiconaya ÆaÆPoujna. Ate’a lan xanuc’ titaleco’me litaiqui’ ȽanDios. Tipai’i’moÆtsi liÆpicuejma’. Tihuejco’me ocuena cataiqui’. TijouÆa’ ti’iÆa’ toÆta’a timuj’moxi anuli cal xans ma le’a ixcay lo’epa. Tetets’i’ma jahuay locuxepa ȽanDios. IÆque aimunÆuya, tejac’ma. 4 IÆque ti’nof’e’moxi. Ti’ay quipilaic’ ȽanDios, jouc’a ti’ela’ quipilaic’ jahuay lilendiosla’ lan xanuc’. Ticua: “Ma le’a iya’ laxc’onÆingai’ma”. Ti’onÆico’moxi to ȽanDios. ToÆta’a ticutshuai’ma jiÆpe lixoute’ ȽanDios. 5 Imanc’, ¿te joupa olimenc’ecopa iÆe lainu’ipolhuo’ maÆmana’ anuli? 6 Imanc’ joupa oÆsina’ tipa’a lopa’necopa iÆque Æixcay xans. ȽanDios joupa ixpic’epa litine timuj’moxi iÆque. 7 Itsiya Æinca ma tipa’a anuli petsi aimaÆsinyi. IÆque ma le’a ixcay lo’epa, tetets’i jahuay locuxepa ȽanDios. Jouc’a tipa’a petsi ti’hua limane tipa’neco’ma iÆque. Ti’hua tipa’ne, tijouÆa’ tiÆojm’ma. 8 TiÆojnla’ iÆque nopa’nepa, timuj’moxi Æixcay xans, iÆque tetets’i locuxepa ȽanDios. IÆque aimipaneya toÆta’a. Ticuaicoconno ÆaÆPoujna tifusco’ma, tima’a’ma. IÆque cal xans aimixnet’Æya ticuaicohuananni ÆaÆPoujna. Aimi’iya mehuelojnya, tejac’e’ma. 9 Ma Satanás lummepa iÆque Æixcay xans. MaÆque Satanás tepi’i’ma acueca’ icueya limane. ToÆta’a ti’e’ma al cueca’. Lo’eya tocomma to lo’eya ma le’a ȽanDios. IÆque a’i andios, ma’ afelÆaiqueya litaiqui’, afelÆaiqueya lo’epa. 10 IÆque no’epa lixcay tifel’mi’mola’ lan xanuc’, iÆne petsi ti’hua tejac’eyoÆtsi. IÆne aiquilepenufi al Ƚinca Cataiqui’. I’e’me capilaic’, toÆiya aimunÆulyacu. 11 ȽanDios ticua: “Tifel’mitsoÆtsi”. Pe lomana’ joupa ipo’nopa lafelÆaiqueya cataiqui’, tepenufle iÆta’a. 12 ToÆta’a titeÆ‘mi’mola’ nulemma iÆne petsi aiquiÆ‘aic’ Æinca al Ƚinca Cataiqui’. IÆne petsi xonca iÆpic’a lo’epa lixcay, tetets’iyi locuxepa ȽanDios. 13 Imanc’ aimi’onÆcotolhuo’ to iÆniya pe natets’ipá ȽanDios. ToÆiya aÆs’najtsi’iyi ȽanDios, ticuicomma. Imanc’ unc’aÆpimaye. ȽaÆPoujna ti’elhuo’ capic’a. Lipangopa li’a Æamats’ ȽanDios joupa i’huijf’ecopolhuo’ tunÆu’etsolhuo’. Ƚinca tunÆu’e’molhuo’. Cal Espíritu Santo ti’hua tilanc’e’e’molhuo’ loÆpicuejma’, ti’itsolhuo’ ma i’huexi ȽanDios. ToÆta’a lo’iyacolhuo’ ma molihuejcoyi al Ƚinca Cataiqui’. 14 Litine loÆquimf’epa Lataiqui’ lalu’ipolhuo’, ȽanDios ijoc’ipolhuo’ toluyalaicoÆe toÆta’a. TijouÆa’ toÆcuxeta anuli ÆaÆPoujna Jesucristo. 15 ToÆiya, cunc’aÆpimaye, toÆpo’noÆe loÆpicuejma’, tolihuejcocona’me lataiqui’ laÆmuc’ipolhuo’. Ja’ni illanc’ caÆtuca’ alu’ipolhuo’, ja’ni liniÆ‘epolhuo’ iÆta’a coÆje’e, ma’ anuli iÆe lataiqui’, tolihuejcoÆe. 16 Titoc’itsolhuo’ iÆniya ÆaÆPoujna Jesucristo y ȽanDios. ȽanDios, iÆque caÆ‘Ailli’, aÆ‘nujuaisponga’, ixpic’epa aÆtoc’itsonga’. ToÆiya lixpi’iponga’ calata nulemma. Itsiya aimaÆsueÆmot’Æeyi te ts’i’ic’ maÆ‘iyaconga’ Locuaicoya Quitine. AÆsina’ lapenuftonga’. 17 Ja’ni toÆsueÆmot’Æeyi, ȽanDios tixpi’itsolhuo’ cunlata. Ma monÆ‘eyi al c’a o moÆpalaic’oyi al c’a tifa’etsolhuo’ loÆpicuejma’.