Tito 1

1 Iya’ ninPablo ca’ey laÆcuxe’epa ȽanDios. Iya’ nin’apóstol, epaluc Jesucristo, iÆque lummepa. Lummepa pe lomana’ li’huijf’epola’. IÆniya tepenufle. Ti’iÆa’ quiÆsina’ te ts’i’ic’ al Ƚinca Cataiqui’. TihuejcoÆe ȽanDios. 2 Ti’iÆa’ quiÆsina’ ȽanDios tepi’i’mola’ liÆpitine aimijouya. Ai’a tilanc’e’ma li’a Æamats’ ȽanDios inespa: “Capi’i’mola’ laixanuc’ liÆpitine aimijouya”. Ma’ aÆinca toÆta’a lo’epa ȽanDios, iÆque aimi’iya mifelÆaiqueya. 3 Icuapa: “Ticuaitsi litine laixpic’epa, camuc’i’mola’ laixanuc’ iÆe laitaiqui’ lainespa”. Joupa icuai’ma iÆta’a litine. Iya’ cuya’e’ lataiqui’ linespa ȽanDios. IÆta’a aipenic’. IÆque ȽanDios ȽalunÆu’eyaconga’ lapi’ipa iÆta’a laipenic’, aÆcuxe’epa ca’eÆa’. 4 Iya’ ninPablo quiniÆ‘ehuo’ ima’ cumTito. Illanc’ ninc’oquexi’ aÆ‘huaiyijnyi Cristo. ToÆiya ima’ ai’hua. ȽanDios caÆ‘Ailli’ y Jesucristo ȽalunÆu’eyaconga’ tipaxnetso’, titoc’itso’, tipac’e’etso’ lopicuejma’. 5 Laipo’no’mo’ jiÆpiya Æamats’ Creta nu’i’mo’ lof’eya. Aimi’mo’: “Jifa’a tipa’a lahue’epa. Aiquifaquila’ lapimaye litsilojpola’ xanuc’, iÆne tixpic’e’me lataiqui’. Ima’ tofaj’mola’. IÆya’ iÆya’ petsi lafoÆyomma lapimaye, ima’ tofajtola’ iÆne litsilojpola’ xanuc’.” ToÆta’a laimipo’. Itsiya ma to’eÆa’. 6 Ima’ tofajtola’ iÆne limetsaiconnila’ ac’a xanuc’. IÆniya ts’anuli quiÆpeno, iÆne ts’iÆnaxque’ naihuejcopá locuxepa ȽanDios. ToÆta’a aiminesyacu lan xanuc’: “IÆque cal xans linaxque’ aimihuejcoyi, ti’eyi nixpiya”. 7 Lapimaye litsilojpola’ xanuc’ ti’e’me cuenna lixanuc’ ȽanDios, toÆiya ticuicomma tofajtsola’ petsi limetsaiconnila’ ac’a xanuc’. Aimofaj’ma petsi ma le’a quituca’ tixpic’e lipicuejma’. Jouc’a aimofaj’ma Æaixtumma, ni Æoxnatsaipa, ni Æinfule, ni lonesya: “Culijco’ma caitomí”. 8 Tofaj’ma petsi Æaixojpa queta tepenufila’ lipimaye quiyouyomma aculi’, tepi’ila’ quilejut’Æ tunxajle. Tofaj’ma iÆque petsi letenÆcocopa al c’a a’i lixcay, petsi aimilosma, ti’ay al Æijca, tenaj’moxi al xujc’a, tihuequi ȽanDios, timuj’moxi ma’ i’huexi ȽanDios, ticuxeyoxi al c’a. 9 Tofaj’ma petsi ti’hua tihuequi lataiqui’ limuc’impa, iÆe lataiqui’ aimifelÆaique. ToÆta’a ti’i’ma tu’i’mola’ lapimaye. Timi’mola’: “ToÆta’a tuya’e’ Lataiqui’. ToÆcuec’eÆe.” Jouc’a titalai’e’mola’ lan xanuc’ pe aimihuejcoyi ȽanDios. Timuc’i’mola’ a’ij Æinca lonespa. 10 Itsiya timana’ axpela’ lan xanuc’ aimihuejcoyi locuxe’empola’. IÆne tipalaicoyi quiÆtuca’ liÆpicuejma’. Tifel’miyaleyi. IÆne linfel’miyale xonca axpela’ iÆniya axanuc’ judío. 11 Ticuicomma tiâch’ixc’entsola’. IÆne iÆpic’a tulijle quiÆtomí, toÆiya timuc’iyaleyi pe aimetenÆma. Timana’ Æajut’Æi petsi jahuay lapimaye naihuejcopá ȽanDios joupa imenac’impola’ liÆpicuejma’. 12 Anuli cal xans acueca’ ts’ixina’, Æipajnyota jiÆpe Æamats’ Creta, icuf’mola’ lipiÆya’ xanuc’, ticua: “IÆna’a laixanuc’ nomana’ Creta infel’miyale, ailopa’a quiÆpicuejma’, ti’onÆcospola’ to linneja, intetsopá, ahuiye”. 13 Ma’ al Æinca linespa iÆque cal xans. Ma toÆta’a liÆ‘ejma’ iÆniya nomana’ Creta. ToÆiya toxc’ai’itsola’ a’ujfxi lapimaye nomana’ jiÆpiya. Tomitsola’: “Aimolihuej’me iÆe lixcay cane. Tolihuejle al Ƚinca Cataiqui’. 14 AimoÆquimf’e’mola’ loya’apa iÆne lan xanuc’ judío. Aimolihuej’me locuxe’epolhuo’ iÆniya. IÆiya liÆtaiqui’ tipa’acoyi quiÆtuca’ liÆpicuejma’. Tetets’iyi al Ƚinca Cataiqui’." 15 Petsi joupa li’ipola’ limpio liÆpicuejma’, iÆne tixinyi ac’a jahuay lipo’nopa ȽanDios jifa’a li’a Æamats’. Ituca’ liÆpicuejma’ lan xanuc’ pe aimihuejcoyi Jesucristo. IÆniya a’ij limpio liÆpicuejma’, tixinyi jahuay axujc’a. 16 Micuayi: “Alimetsaicoyi ȽanDios”, maÆne ti’eyi lixcay, ti’eyi pe aimetenÆma ȽanDios. IÆne ixcay liÆpicuejma’, incuejlocale, aimi’iya mi’eyacu al c’a.