2.SAMUEL 8

¹ Iwe, mürin ekoch fansoun Tafit a maun ngeni ekewe chon Filistia, a akufuur o atolongeer fän nemenian. A angei Metek-ama seni fän nemenien ekewe chon Filistia.

² Tafit a pwal akufu chon Moap. A akonerela won pwül lon tettelir o aükü ngeniir och aükük. Iwe, ekewe aramas mi küür ruu kinikinin ewe aükük a nirela, nge iö a küw ewe aülüngatin kinikin a amanaua. Iei usun ekewe chon Moap ra nom fän nemenien Tafit o takises ngeni.

³ Mürin, Tafit a pwal akufu Hatateser nöün Rehop we mwän ewe kingen Sopa, lupwen ätewe a feila pwe epwe aworasefäli an nemenem won ewe fanü arun ewe chanpupu Oifrat.

⁴ Tafit a liapeni seni Hatateser ükükün engeröü füpükü chon wawa oris me rüe ngeröü sounfiu mi fetal. A pwal pökü selin pechen ekewe oris meinisin mi nukunuk woken, nge a likiti ekoch oris fän iten ükükün ipükü woken.

⁵ Iwe, lupwen ekewe sounfiun Siria seni Tamaskus ra feito pwe repwe alisi Hatateser, Tafit a maun ngeniir o niela ükükün rüe me ruu ngeröü me leir.

⁶ Mürin, Tafit a anomu mwichen sounfiu lon Siria. Ekewe chon Siria ra nom fän nemenien Tafit o takises ngeni. Iwe, ewe Samol mi Lapalap a awinna Tafit ekis meinisin ia a feila ie.

⁷ Tafit a angei o uweela Jerusalem ekewe tittin maun seni kolt nöün Hatateser kewe meilap ra uwei.

⁸ Ewe king Tafit a pwal angei chomong piras seni Peta me Perotai ekewe telinimwen Hatateser.

⁹ Iwe, lupwen Toi ewe kingen Hamat a rong pwe Tafit a akufu nöün Hatateser kewe mwichen sounfiu meinisin,

¹⁰ a tinala nöün we mwän Joram ren ewe king Tafit, pwe epwe uwei an kapong ngeni o eäni kapasen etiwetiw ngeni pokiten an akufu Hatateser lon maun. Pun Hatateser a maun ngeni Toi fän chomong. Joram a pwal uwala lifang ren Tafit pisek seni silifer, kolt me piras.

¹¹ Iwe, ekei pisek ewe king Tafit a apini fän iten ewe Samol mi Lapalap o achu ngeni ewe silifer me kolt a fen apini, pun liapan seni ekewe mwü meinisin a atolongeer fän nemenian.

¹² A apini mine a liapeni seni Etom, Moap, pwal seni ekewe chon Amon, chon Filistia me Amalek, pwal liapan seni Hatateser nöün Rehop we mwän ewe kingen Sopa.

¹³ Iwe, än Tafit iteföüla a wattela, lupwen a liwinsefäl seni an niela engol me walu ngeröü chon Etom lon ewe lemolun salt.

¹⁴ Tafit a anomu mwichen sounfiu lemenen Etom, nge chon Etom meinisin ra nom fän nemenien Tafit. Iwe, ewe Samol mi Lapalap a awinna Tafit ekis meinisin ia a feila ie.

¹⁵ Iwe, Tafit a nemeni unusen Israel o föri mine a öch o pwüng ngeni nöün aramas meinisin.

¹⁶ Joap nöün Seruia we mwän i meilapen ewe mwichen sounfiu, nge Jehosafat nöün Ahilut we mwän a soumak.

¹⁷ Satok nöün Ahitup we mwän me Ahimelek nöün Apiatar we mwän ra souasor, nge Saraia a seketeri.

¹⁸ Penaia nöün Jehoiata we mwän i meilapen ekewe chon Cheret me chon Pelet, ir chon tümwünü ewe king, nge nöün Tafit kewe mwän ir nöün ewe king chon öüröür.