KÖLFEL 6
BSM1 Ai Samol mi Lapalap, kosap amiritiei lon om song, kosap pwal apwüngüei lon om lingeringer.
2 Kopwe ümöümöch ngeniei, ai Samol mi Lapalap, pun üa fokun pekus. Ai Samol mi Lapalap, kopwe apöchökülaei, pun üa fokun apwangapwang.
3 Ngüni a pwal fokun riaföü. Ai Samol mi Lapalap, ifa ükükün fansoun om kopwe akachopwa ngeniei?
4 Ai Samol mi Lapalap, kopwe feito o amanauaei, kopwe angasaei seni mäla ren om we tong ellet.
5 Pun chon mäla resap chechemenuk. Esap wor eman epwe mwareituk lon lenien sotup.
6 Üa malülü ren ai ngüngü, iteiten pwin kiei a nüküchöchön ren chönün mesei, ai peet a chöchön ren chönün mesei, lupwen üa kechü.
7 Mesei a tton ren ai letipeta, a toputopula ren ai kechü pokiten chon oputaei ra ariaföüüei.
8 Oupwe sü seniei, ämi meinisin mi föri föför mi ngau. Ewe Samol mi Lapalap a rongorong ai leüömong le kechü.
9 Ewe Samol mi Lapalap a rongorong ai tüngorün alilis, ewe Samol mi Lapalap a etiwa ai iotek.
10 Ekewe chon oputaei meinisin repwe säw o rükö. Repwe kulsefäl o müttir mefi ar itengau.