ROMA-SATZI 10

1 Iyekiite, nokowi rawisakoshireyetai nosheninkapaini Israel-iite. Iro namanantaiyaariri Pawa. 2 Niyotzi ithaamentashiwaitari Pawa, rantashiwaitawo te ikemathaperotzimaitawo. 3 Te riyotaiyini ikowatzi Pawa rotampatzikashiretairi, te ikemisantzi, tema rithotyaakotashitawo intampatzikashiretantyaari apaniroini. 4 Tema rithotyaakero Cristo Inintakaantaitakeri pairani, iri tampatzikashiretakagairiri ikaatzi awentaashiretaariri. 5 Iriitake Moisés-ni osankenatakotakeriri rimonkaaterome Inintakaantaitakeri pairani intampatzikashiretantaityaarime. Jiroka ikantake: Inkaate monkaatairone, iri ñagairone rañaashireyetai. 6 Te imonkatziyawo awentaashirenkantsi otampatzikashiretantatsiri. Te okowaperota impankenawaityaawo rimonkaatairo tsikarika oita. ¿Kantachama riyaate inkiteki pankenawaitachari ishintsineenteri Cristo rayiitantyaari isaawiki rowawisaakoshiretantairi? 7 ¿Kantachama riyaate sarinkaweniki rowiriintairi Cristo ikamawetapaintaga? 8 Jiroka ikantaitake, rakaite: Piyoshiretakero ñaantsi, piyowaantetakero eejatzi. Kantakotachari jaka “ñaantsi”, irojatzi nokenkithatakotapiintziri awentaashiretaarira Cristo. Jiroka okanta: 9 Arika piñaawaitero pinkante, “Nowinkatharite rini Jesús,” arika pawentaashiretanakyaari Pawa, iriira owiriintairiri ikamawetakaga, ari pawisakoshiretai. 10 Awentaashiretaari, iro rotampatzikashireyetantairi. Añaawaitairo, iro rowawisaakoshireyetantairi. 11 Ari okantzi Osankenarentsipero: Inkaate awentaashiretaiyaarine, eero raminaashiwaitaawo. 12 Onkantawetakya aakarika Judá-ite, aakarika Grecia-thatotatsiri, iri Cristo Awinkathariteta maawoini. Itzimirika amanaiyaarine, iriitake ineshironkatairi. 13 Tema jiroka ikantaitake: Itzimirika amanaiyaarine Pinkathari, raakotairi iwairo, aritake rawisakotai. 14 ¿Kantachama ramanaityaari Pawa terika rawentaashiretaitari? ¿Kantachama rawentaashiretaityaari Pawa, terika ikemakoitziri? ¿Kantachama inkemakoiteri, tekaatsirika kenkithatakaantatsine? 15 ¿Kantachama inkenkithatakoiteri, tekaatsirika otyaantantatsine? Iro rosankenatantaitakawori, kantatsiri: ¡Osheki inkameethayitzite amerone kameethari ñaantsi risaikantaitari kameetha! 16 Iro kantzimaitacha, te maawoini inkemisantaitero Kameethari Ãaantsi. Iro ikantantakari Isaías-ni: Pinkatharí, te ikemisantaitziro nokenkithatziri. 17 Ari okantari. Ontzimatye inkemaitawakero riñaane Pawa ompoñaantyaari rawentaashiretaityaari. 18 Nokantzi naaka, “¿Ikemaitakeroma?” Mataka, tema rosankenaitake kantatsiri: Ikenkithatakoitakero nampitsikipaini, Ikemaitakero maawoini kipatsiki tsikarika risaikaitzi. 19 Napiitero nonkante, “Jirika isheninkapaini Israel-ni, ¿Ikemathaperotakeroma?” Iri Moisés-ni ooñaawontakerori rosankenareki, ikantake: Ari nonkantakaakyaawo pisamaneentyaari itsipasatzipaini atziri kaari sheninkatawakaachane. Osheki pinkisaneentashireteri piiyetziri “masontzishireripaini”. 20 Irojatzi ikantakeri Isaías-ni irirori: Iñaayetaana kaari kowakowatenane. Noñaagaari kaari aminaminatenane. 21 Iro kantzimaitacha, ikantzitaka eejatzi Isaías-ni, ikenkithatakotakeri Israel-iite, ikantake: Nowaankawakowetashitapiintakari, temaita ikemisantaiyanani, piyathari rinaiyakeni.