Job 31

1 Job sogdebalid: “An weyob sogsanad: ‘An ome-gwensak-dakalile, bipisaale galagwensuli an egi binsaosurye.’ 2 ¿Ibu-ibmar-nued Bab-Dummad-Bur-Biriginedgine amilege? ¿Ibu-ibmar-nued Bab-Dummad-Bela-Gangued-Nikadgi nikulege? 3 ¿We-odurdaklegedde dule-isganamargadsursi? ¿Boni-dummagan-amilegedi dule-isganamargadsursi? 4 Bab-Dummad, ¿an-ibmar-nued-imakdiid daksursi? Bab-Dummad, ¿an-nanadiid daksursi? 5 “An igar-isganaba nanasale, an gakanginbi sunmaksale, 6 Bab-Dummad an-wilubdaksundo. Geb agi Bab-Dummadi, an-ibmar-isgana-imakdisulidi dakoed. 7 An ibmar-nued-imakedgi bangusale, ibmar-isgana-imakedgi an binsadiile, ibmar an atur-imaksa gudiile, 8 an-ibmar-digsadi bela ani gunmarsundo. An-nainugi-ibmar-naidi bela ani sumarsundo. 9 “Ome-gwensakse an binsaed galesale, dule-an-neg-dikarbamaid-e-ome an argadii gusale, 10 an-ome dule-baid-omega gusunnodo, dulemar an-omebo galagwensuli gumarsunnodo. 11 Ar deyob an ibmar imaknonikile, binged-dummad anga gunonikiled. An sabsur-odurdaklegergebed. 12 Soo-dummad-neg-gasayob gusaled, an-nainumar bela gummaksayob gusaled. 13 “An-maiga-gudimalad anga sognonimalale, be anga igar-maidba imaksasurye, an ega igar nudakedsedaed. 14 Degisulile, Bab-Dummad igar-itogega anse gollalile, ¿igi an abin sogosunna? 15 Bab-Dummadi, we-napnegse-an-odenonikidid, an-maiga-gudiid-odenonimogadid, ¿A-Bab-Dummadi emarbi sapidukugi anmar-mesissursi? 16 “Dule-wilemaladi ibmar-abealile, an ega ukdidaed. Omegan-ei-sui-burgwismaladi, an ukudmaada imakdisulid. 17 Bipisaagwale walagwen an mas gundisulid, sergan-satedga an mas ukdii gusad. 18 An sapingwad-akale, we-dulemarga e-babyob an gudii gusad. An gwalulesad-akale, omegan-ei-sui-burgwismalad-bendakdii an gusad. 19 Dule-wilemaladi an morsuli imakdii gussulid, an-wagab dule-wilegedi morsulidbali dambedba burgwissurgusad. 20 An dule-wilegedga an-sibad-wawaad-mor uksagusad. Degidbali, nuedye anga sogsagusad. 21 Dule-sergan-satedgi an dodossulid, igar-itolealir, an-garganguedgi egi yolegodeeye an binsassulid. 22 An yamo-gakansanaile, an-swidamar bela batesunnodo, an-surgan-e-garmar-abingunanaidi bela bus-bus nosunnodo. 23 An gusgu Bab-Dummad-emar-sabsur-odurdakedgi dobekwaa gudiid. Bab-Dummad uludele, e-gangued-asabin an gwisgussuliled. 24 “Orginbi an atakdii gussulid, orbina sulibinsa an itodii gussulid. 25 An ibmar-bukidar-nikadba an na san dummarba imaksasulid. An-arbasadba bukidar-ibmar-amisadgi an na san-dummarba imaksasulid. 26 Deginbali, dad-ibeler-ganai an dakdaed, nii-bela-bela-ganaid nadapi an dakdaed. 27 Degi-inigwele, bipisaagwale, an emar-wagab we-e-nugmar odummodisulid, arbakebela an odummodisurbalid. 28 An we-ibmar-nug odummosana, an odurdaklegedinad. Bab-Dummad-Bur-Biriginedgi an dummad-nosan-itole. 29 “An-isdarmalad boniganse sabsur-odurdaklenaile, egi burgunai an gudisulid. Egi boni-dummagan danikile, ega gwen an yeer itodisurbalid. 30 Degine, an-isdaradgi ukabsaale, an sunmakdisulid. Ibiga wemar geg burgwedibeye, an sogdisurbalid. 31 Dule-gwensak an-negse-ataknadele, masgi an ogunnedsedaed. Ukudmaada an barmidisulid. 32 Dule-ainebalid an-neggi an nuekwaa ogabdiid, neg-magaba an ogabdisulid. 33 Dulemar-isgued-odukuedyobi an-isgued an odukudisulid. Dulemar-dobedba, an-ibmar-oakalosad odukuodeeye an binsadisulid. 34 An-gwenadgan-isdar-an-dakmalad-abin an boo sigissulid, amar-abin an gayamaklessulid. 35 “Bitigi Bab-Dummadi an-itosana gadin. Bab-Dummad-Bela-Gangued-Nikadi an-abin-imaksun. An-sunmaksadi, gardagi ise-narmakar an messunnad. Bab-Dummad angi akar-sogbiele, anga narmakar mesmosunna. 36 Bab-Dummad-akar-angi-sogoedi, nuedgi an sedii guoed, ologurginyobi an sii gudigusaled. 37 Bab-Dummad-asabin an gwisgudapile, bela an na barsogoed. Gwen an Bab-Dummad-asabin bingeguosulid. 38 “An-nainumar angi gwisgunanaile, bela napa-imulesmaladi boedbimalale, 39 gwenadgan-ibe, ibmar-gwag-bennussuli an guchale, degine, e-ibmala-yardaknai an gusale, 40 an-nainugi trigo-digaled-muchubbi, gagan-ikobiid ainisundo. An-nainugi cebada-digaled-muchubbi, gagan-isgana ainisundo.” Job-sunmaked wese bergunaid.