Sɑmiyɛɛlɩ II 22
SIM1 Wɑɑtʋ wei Tɑcɑɑ yɑpɑ Tɑfiiti kɛ Sɑyuli nɑ ɩ kolontunɑɑ lɛlɑɑ niŋ tɑɑ tɔɣɔ Tɑfiiti sɑmɑ Ɩsɔ nɑ yontu sɩ: 2 Tɑcɑɑ kɛlɛ mɑ kʋkpɑmʋɣʋ nɑ mɑ tǝcɔɔsǝlɛ toŋ nyǝntɛ, nyɑ́ wɑɑsǝɣǝnɑ-m. 3 Nyɑɣɑlɛ mɑ Ɩsɔ nɑ mɑ́ cɔɔsǝɣǝnɑ-ŋ. Nyɑɣɑlɛ mɑ kpɑlʋɣʋ nɑ toŋ wei ɩ wɑɑsǝɣɩ-m tɔ. Nɑ mɑ tǝcɔɔsǝlɛ nte tǝ wɛ pʋɣʋ tɑɑ tɔ, nɑ mɑ kpʋlʋɣʋ tǝtʋlɛ. N kɛ́ mɑ wɑɑsʋlʋ, n yɑkɩ-m mʋsʋntʋnɑɑ niŋ tɑɑ. 4 Mɑ sɑmɑ Tɑcɑɑ nɑ kɑwilitɑɣɑ. Nyɑ́ yɑpǝnɑ-m kolontunɑɑ niŋ tɑɑ. 5 Sǝm tɑmɑ-m kɛ́ ɩsɩɩ lʋm sɔsɔɔm holɑ, nɑ pǝ́ nyɑɑsǝɣɩ-m ɩsɩɩ pusi sɔsɔɔnsɩ. 6 Atɛtǝlɛ kɑ hɔkɑ-m tǝ ŋmɩɩsɩ kɛ́. Nɑ sǝm nɑ́ɑ́ tuti-m nɑ pǝ puluɣu. 7 Mɑ yɑɑ Tɑcɑɑ kɛ mɑ lɑŋwɑkǝllɛ wɑɑtʋ sɩ ń wɑɑsɩ-m. Mɑ kiisɑɑ nɑ ń nɩɩ mɑ nɔɣɔ kɛ nyɑ́ tǝyɑɣɑ tɑɑ. 8 Pɑ́ɑ́nɑ́ kpɑ Ɩsɔ nɑ tɛtʋ sele, nɑ ɩsɔtɔnʋɣʋ kite ciɣiti, nɑ pɔɔŋ nɑ́ɑ́ sele ɩ kilɑ tɛɛ. 9 Kɔkɔ nyɔɔsɩ lɩɩnɑ Ɩsɔ nyɑ́ mɩɩnɑ tɛɛ, nɑ ń tɔ kɔkɔ mɑmɑlɑ nɑ nɔɣɔ. 10 N lumsɑ ɩsɔtɔnʋɣʋ nɑ ń tii, nɑ nyɑ́ nɔɔhɛɛ tɛɛ kɛ́ ɩsɔŋmʋntʋɣʋ kpɩɩsǝŋ nyǝŋkʋ. 11 Ɩsɔtɑɑ tɑŋlʋ kpɑɣɑnɑ-ŋ nɑ ń kʋlǝɣɩ hʋntʋ, nɑ heelim tɛɛkǝnɑ-ŋ. 12 N tɑkɑ nyɑ́ tǝɣɩ sǝkpɛtʋɣʋ, nɑ ŋ wɛ tɛʋ ŋmʋntʋɣʋ tɛɛ. 13 Nyɑ́ nyɑlɑmǝlɛ tɛɛ-ŋ nɔɣɔ nɑ tǝ tɔɔkɩ mɑmɑcǝɣǝlɑsɩ. 14 Ɩsɔtɑɑ Ɩsɔ Sɔsɔ nɔɣɔ nɩɩ ɩsɔtɑɑ kɛ́ ɩsɩɩ tɛʋ holɑ. 15 N tɔ mɑ kolontunɑɑ kɛ nyǝmɑ́ nɑ ń yɑsɩ-wɛ. N tisɑ pɑ tɔɔ kɛ́ cɑlɑnɑɑ nɑ pɑ́ se yem yem. 16 Tɑcɑɑ ń mʋ pɑ́ɑ́nɑ́ nɑ ń woso nyɑ́ mɩɩnɑ tɛɛ, nɑ teŋku tɛtʋ nyɩɩ nɑ pǝ́ nɑ́ ɑntulinyɑ kite. 17 Ɩlɛnɑ ń tisi nyɑ́ niŋ nɑ ɩsɔtɑɑ nɑ ń lǝsɩ-m lʋm sɔsɔɔm tɑɑ. 18 Nɑ ń yɑ-m kolontunɑɑ toŋ nyǝ́mɑ mpɑ ɩnɩ pɑ tɛɛ-m tɔ pɑ niŋ tɑɑ. 19 Mɑ wɑhɑlɑ wule kɛ pɑ tutɑ-m. Ɩlɛnɑ Tɑcɑɑ wɑɑsɩ-m. 20 N sɔɔlɑ-m tɔɣɔ n wɑɑsɑ-m sɩ mɑ́ cɑɣɑnɑ mɑ tɩ. 21 Mɑ tǝŋɑ tɑmpɑnɑ tɔɣɔ n lɑpɑ-m mpʋ, mɑ kʋsiɣisim lɑpʋ kɑsǝyɑɣɑ ntɛ́. 22 Mɑ tǝŋɑ Tɑcɑɑ tɔm kɛ́, mɑ tɑ wɑkǝlǝnɑ-ŋ. 23 Mɑ tǝŋɑ nyɑ́ kʋsǝsɩɩtʋ tɔɣɔ. Mɑ tɑ yɔkɩ nyɑ́ kiiu nɑkʋlɩ. 24 Mɑ luɣu fɛɩ tɑɑlɩ nɔɣɔlʋ, tɔɣɔ mɑ kpɑ mɑ tǝɣɩ ɩsɑɣɑtʋ tǝlɑtɛ. 25 Ɩlɛnɑ Tɑcɑɑ fɛlɩ-m mɑ tɑmpɑnɑ tǝŋʋɣʋ tɔɔ. Mɑ kʋsiɣisim lɑpʋ kɑsǝyɑɣɑ ntɛ́. 26 Kʋpɑntʋ kɛ Tɑcɑɑ n fɛlǝɣɩ tǝ lɑtʋ, nɑ ń tǝŋ tɑmpɑnɑ nɑ ń lɑnɑ ɑ tǝŋlʋ. 27 Yʋlʋ ɩ́ wɛ tǝnɑŋŋ ḿpʋ́ɣʋ́ n lɑkɩ-ɩ, ɩlɛnɑ ń kisi ɩsɑɣɑʋ. 28 N wɑɑsǝɣɩ tǝpɑsǝlɑɑ, ɩlɛnɑ ń tisiɣi kɑlɑmpɑɑnɩ nyǝ́mɑ nɑ ɩsɛ cɩɩlʋɣʋ. 29 Tɑcɑɑ kɛlɛ mɑ nyɑɑlǝm, nɑ ń kɛɛlǝɣɩ mɑ sǝkpɛtʋɣʋ. 30 Nyɑ́ toŋ kɛ mɑ ŋmɑɑkǝnɑ kolontunɑɑ koloosi nɑ mɑ́ sʋʋkɩ. 31 Tɑcɑɑ nyɑ́ kʋlɑpʋtʋ wɛ kɛ́ tǝcʋŋŋ, nɑ nyɑ́ kʋyɔɣɔtʋtʋ fɛɩ sikɑ. N kentiɣi mpɑ pɑ cɔɔsǝɣǝnɑ-ŋ tɔ ɩsɩɩ kpɑ́lʋ́ɣʋ́. 32 Tɑcɑɑ nyɑ́ tike tǝkoŋ ntɛ́ Ɩsɔ. Tɑ Ɩsɔ tike tǝkoŋ ntɛ́ kʋkpɑmʋɣʋ ŋku kʋ kentiɣi-tʋ tɔ. 33 Nyɑɣɑlɛ mɑ koluŋɑ ɩcɑtɛ toŋ nyǝŋkɑ. Nɑ ń tiikiɣi-m mpɑɑʋ kʋsiɣisuɣu tɑɑ. 34 Nɑ ń yeki nɑ mɑ́ pǝsǝɣɩ sewɑ kɛ pulɑsɩ tɔɔ ɩsɩɩ nɑm nɑ nɑɑni. 35 N fɑlǝsɑ mɑ niŋ nɑ yoou, nɑ mɑ́ nyɩ tɔɔʋ toŋ nyǝŋkʋ tɔʋ. 36 N yɑpɑ mɑ nyʋɣʋ nɑ pǝ́ wɛɛ ɩsɩɩ kʋkentuɣu. Nɑ mɑ pǝsɩ sɔsɔ kɛ nyɑ́ kʋpɑntʋ tɔɔ. 37 Nyɑ́ hɑsǝɣǝnɑ mɑ nɔɔhɛɛ tɛɛ. Pʋlʋpʋ ɩɩ tuuliɣi-m. 38 Mɑ tɔɣɔnǝɣɩ mɑ kolontunɑɑ nɑ mɑ́ wɑkǝlǝɣɩ-wɛ. Ye mɑ tɑ kpiisi-wɛ mɑɑ mǝlǝɣɩ. 39 Mɑ wɑkǝlǝɣɩ-wɛɣɛ nɑ mɑ́ kpiisi-wɛ, nɑ pɑ́ wɛɛ mɑ nɔɔhɛɛ tɛɛ, pɑɑ tɑsǝɣɩ kʋlʋɣʋ. 40 Nyɑ́ hɑɑkǝnɑ-m yoou toŋ, nɑ ń yeki nɑ mɑ kolontunɑɑ hǝntǝɣɩ-m ɑtɛ. 41 N yeki nɑ pɑ́ seeki-m, nɑ mɑ́ wɑkǝlǝɣɩ-wɛ tǝnɑŋnɑŋ. 42 Pɑ cɑɑkɩ pɑ tɑɑ nɑ pɑ wɑɑlɩ pɑɑ nɑɑ wɑɑsʋlʋ. Ɩlɛnɑ pɑ wiinɑ Tɑcɑɑ nɑ ɩ́lɛ́ ɩ kisi cɔʋ. 43 Mɑ nuɣutiɣi-wɛ nɑ pɑ́ pǝsɩ mʋsʋɣʋ. Nɑ mɑ́ fɛlɩ-wɛ nɑ pɑ́ pǝsɩ ɩsɩɩ mpɑɑʋ ɑfǝlɑ. 44 N yɑpɑ-m mɑ yǝlɑɑ nɔɔhɔntɛ tɑɑ, nɑ ń sɩɩ-m kɑteŋɑsɩ yǝlɑɑ nyʋɣʋ tʋ. Yǝlɑɑ mpɑ mɑ tɑɑ nyɩ tɔ pɑ lɑpɑ-m tǝmlɛ. 45 Kpɑɩ nyǝ́mɑ piyɑ seekinɑ-m, nɑ mɑ́ nyǝnɑ-wɛɣɛ ɩsǝlɛ pɑ nɩɩkɩ kɛ́. 46 Pɑ nɑntʋ tiliɣi kɛ́, nɑ pɑ́ lɩɩkǝnɑ pɑ tǝŋmɛllɛ nɑ seluɣu. 47 Tɑcɑɑ wɛnnɑ. Nyɑɣɑlɛ mɑ kʋkpɑmʋɣʋ ŋku kʋ kentiɣi-m tɔ mɑɑ sɑ-ŋ. Mɑ tɑlɑ mɑ Ɩsɔ mɑ wɑɑsʋlʋ. 48 Nyɑ́ lɛɛtǝɣǝnɑ nɑ mɑ nɔɣɔ. Nɑ ń tisiɣi piitimnɑɑ kɛ mɑ tɛɛ. 49 Nyɑ́ fitiɣinɑ-m mɑ kolontunɑɑ niŋ tɑɑ, nɑ ń lɑkɩ nɑ mɑ́ kǝlǝɣɩ-wɛ, nɑ ń yɑkɩ-m mʋsʋŋtʋ niŋ tɑɑ. 50 Pǝ tɔɔ kɛ́ mɑɑ sɑ-ŋ piitimnɑɑ tɑɑ nɑ mɑ́ pʋɣʋlɩ nyɑ́ hǝtɛ. 51 N tʋɣɩ nyɑ́ wulɑʋ kɛ ɑkɑɩtʋ sɔsɔɔntʋ. Nɑ ń lɑ kʋpɑntʋ kɛ nyɑ́ kʋlǝsʋ nɑ Tɑfiiti, nɑ ɩ́lɛ́ ɩ piitim nyǝ́mɑ kɛ tɑm tɔɔ.