Yontu 12
SIM1 Tɑfiiti yontu nti pɑ yookinɑ ŋmɩɩsɩ pəlefɛɩ nɑɑnʋwɑ sɑŋkʋ nɑ tə́ wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ: 2 Hɑɩ, Tɑcɑɑ wɑɑsɩ, nyɑ́ yəlɑɑ tɔŋɑ sɑɑlʋɣʋ kɛ́. Mpɑ pɑ mʋnɑ pɑ́ lɑ-wɛɣɛ nɑɑni tɔ pɑ tɔŋnɑ pɑsʋɣʋ. 3 Yəlɑɑ cɑɣɑnɑʋ tike kɛ pɑɑ wei ɩ lɑkɩ, pɑ lotu wɛ nɑɑlɛ nɑɑlɛɣɛ nɑ pɑ́ looliɣinɑ pɑ ntompee. 4 Tɑcɑɑ kpiisi tʋsəlɑɑ nɑ kɑlɑmpɑɑnɩ nyə́mɑ tənɑ. 5 Nɑ mpɑ pɑ tɔŋ sɩ: Tɑ́ nsəmlɛ ntɛ́ tɑ́ toŋ, tɑ́ tənnɑ tɑ́ ntompee. Awe kɑ ŋmɑkəlɩ-tʋ? 6 Ḿpʋɣʋ Tɑcɑɑ tɔmɑ sɩ: Kʋnyɔntʋ wei pɑ lɛɛkəɣɩ tɔ nɑ wɑhɑlɑ tʋ wei ɩ mɔləɣɩ tɔ pɑ tɔɔ mɑɑ kʋlɩ nɑ mɑ́ yɑ mpɑ pɑ cɑɑ tɔ pɑ nyɔɔŋ. 7 Tɑcɑɑ kʋyɔɣɔtʋtʋ wɛ kɛ́ təcɛɩcɛɩ ɩsɩɩ liɣitee nyəɣəlʋɣʋ ŋku pɑ tʋ kɔkɔ tɑɑ nɑ pɑ́ nyɑɑlɩ tɔm nɑɑtosompɔɣɔlɑɣɑ tɔ. 8 Tɑcɑɑ, nyɑ́ɑ́ tɔkɩ nɔɔsɩ nsi n sɩɩwɑ sɩ n kɑ́ kenti-tʋɣʋ tɑm kɛ́ yəlɑɑ mpɛ tɔ. 9 Asɑɣɑɑ mpɛ pɑ cɔɔkɩ pɑɑ timpiɣi, nɑ ɩsɑɣɑtʋ tɔkɑ yəlɑɑ tənɑ.