Yontu 17
SIM1 Tɑfiiti sələmʋɣʋ kɛ Ɩsɔ. Hɑɩ, Tɑcɑɑ, ke ŋkpɑŋŋ nɑ ń nɩɩ mɑ sələmʋɣʋ, nɑ mɑ wiinɑʋ, nɑ ń yele nɑ pɑ́ təŋ tɑmpɑnɑ kɛ mɑ tɔm tɑɑ. Kɑloolɑɣɑ fɛɩ mɑ nɔɣɔ tɑɑ. 2 Nyɑɑ teesinɑ mɑ tɔm. Mpi tɔ, n təŋəɣɩ tɑmpɑnɑ kɛ pə tɑɑ kɛ́. 3 Ye n kɔmɑ mɑ kiŋ kɛ ɑhoo nɑ ń wiili too mɑ lotu tɑɑ, n kɑɑ nɑ ɩsɑɣɑtʋ. Mɑ tɑɑ tɔm nɑ mɑ kʋyɔɣɔtʋtʋ kɛ́ kʋlʋm kɛ́. 4 Nyɑ́ kʋyɔɣɔtʋtʋ kɛ mɑ tɔkɑ mɑ lɑkɑsɩ tɑɑ, mɑ tɑ təŋ mʋsʋŋtʋnɑɑ mpɑɑʋ. 5 Nyɑ́ nyəŋkʋ kɛ mɑ nyɔɔnɑɑ, mɑɑ hɛləɣɩ. 6 Hɑɩ, Ɩsɔ, nyɑɣɑ mɑ yɑɑkɩ. Mpi tɔ, n nɩɩkɩ. Ke ŋkpɑŋʋɣʋ nɑ mɑ tɔɔ nɑ ń nɩɩ mɑ kʋyɔɣɔtʋtʋ. 7 Wɑtɩ-m nyɑ́ kʋpɑntʋ. Nyɑ́ wɑɑsəɣənɑ mpɑ pɑ tʋɣʋ-ŋ kpʋlʋɣʋ tɔɣɔ pɑ kolontunɑɑ niŋ tɑɑ. 8 Kenti mɑ tɔɔ ɩsɩɩ ɩsəlɛ tɑɑ pəyɑɣɑ. Nɑ ń ŋmɛsɩ-m nyɑ́ keŋ tɛɛ. 9 Kɛ mɑ kolontunɑɑ ɑsɑɣɑɑ ŋmɑkəllɑɑ mpɑ pɑ tɑmɑ-m tɔ pɑ tɔɔ. 10 Pɑ fɛɩnɑ pətɔɔtəlɛ, pɑ yɔɣɔtəɣɩ kɑlɑmpɑɑnɩ tɔm. 11 Pɑ tɑmɑ-m kɛ́ nɑ pɑ́ wɛ mɑ wɑɑlɩ təkpɑm, nɑ pɑ́ feŋiɣi sɩ pɑ́ pɛtɩ-m ɑtɛ. 12 Ɩsɩɩ tɔɣɔlɑsɩ cɛŋʋɣʋ sɩ sɩ cələɣɩ sɩ tɔɣɔnɑɣɑ tɔ. 13 Tɑcɑɑ kʋlɩ pɑ tɔɔ nɑ ń pəsɩ-wɛɣɛ kpɛntəlɑsɩ. Yɑ-m ɩsɑɣɑtʋ niŋ tɑɑ nɑ nyɑ́ lɑɣɑtɛ. 14 Tɑcɑɑ kpiisi-wɛ nɑ nyɑ́ niŋ. Nɑ pə ləsɩ mpi pə kɛ́ pɑ tɑɑ nyəm tɔɣɔ weesuɣu nyəm tɑɑ. Nɑ ń nyɔɔsɩ-wɛɣɛ nyɑŋ lʋm mpi n sɩɩ-wɛ tɔ. Pɑ piyɑ ɩ́ nyɔɔ nɑ pə́ kʋ pɛlɛ nɑ pɑ́ kɑɑsɩ pɑ sɑɑlənɑɑ. 15 Ye mɑ ɩlɛ, mɑɑ nɑ́ nyɑ́ ɩsɛntɑɑ kɛ́ mɑ tɑmpɑnɑ təŋʋɣʋ tɔɔ. Nɑ mɑ́ femɑ mɑ nyənɩ-ŋ ɩsənɑ mɑ cɑɑ tɔ.