Yontu 30
SIM1 Tɑfiiti yontu nti pɑ yoo Ɩsɔ təsɛɛlɛ tʋlʋɣʋ wɑɑtʋ tɔɣɔlɔ. 2 Hɑɩ, Tɑcɑɑ, mɑ sɑmɑ-ŋ. Mpi tɔ, nyɑ́ ləsənɑ-m lumɑŋ tɑɑ. N tɑ sɔɔlɩ sɩ mɑ kolontunɑɑ ɩ́ pɑɑnɑ-m. 3 Mɑ Ɩsɔ Tɑcɑɑ, mɑ wiinɑ-ŋ, ɩlɛnɑ ń wɑɑ-m. 4 Mɑ nɔɔhəlɛ kɑ wɛʋ pəlɑɑʋ tɑɑ tɔ, nyɑ́ ləsənɑ-m sətɑɑ tɛ́ nɑ ń hɑ-m weesuɣu. 5 Mpɑ mɛ ɩ́ sɔɔlɑ Tɑcɑɑ tɔ ɩ́ yoo-ɩ yontu. Ɩ́ sɛɛ-ɩ nɑ ɩ́ sɑmɩ-ɩ ɩ tənɑŋŋ wɛɛtʋ tɔɔ. 6 Ɩ pɑ́ɑ́nɑ́ wɛ lɑɑsɑɣɑ tɔɔ tike kɛ́. Ɩlɛnɑ ɩ kʋpɑntʋ kɛ yʋlʋ weesuɣu tənɑ. Tɑɑnɑɣɑ kɛ yʋlʋ wiiki nɑ kʋ fe tɑnɑŋ ɩlɛnɑ ɩ́ woŋ nɑ ɩ́ kpɑləsɩ. 7 Wɑɑtʋ wei mɑɑ cɑɣɑnɑ mɑ tɩ tɔ, mɑ hʋʋkɑɣɑ kɛ́ sɩ pʋlʋpʋ kɑɑ lɑ-m. 8 Tɑcɑɑ nyɑ́ kʋpɑntʋ tɔɔ kɛ́ n kɑ yelɑɑ nɑ mɑ́ səŋ teu təcɑ ɩsɩɩ pʋɣʋ. N kɔmɑ nɑ ń hɑ-m siɣile ɩlɛnɑ pə liɣiti-m. 9 Ḿpʋɣʋ mɑ mɑpɑ kɑpusi nɑ mɑ́ wiinɑ-ŋ nɑ mɑ́ pɔɔsɩ-ŋ sɩ 10 ye mɑ səpɑ nɑ mɑ́ tii pəlɑɑʋ tɑɑ weɣe n wɑɑkɩ? Yʋlʋ ɩ́ pəsɑ tɛtʋ ɩ tɑsəɣɩ-ŋ sɑm yɑɑ ɩ́ kpɑɑlɩ nyɑ́ kʋpɑntʋ tɔtɔɣɔ? 11 Tɑcɑɑ, ke ŋkpɑŋŋ nɑ ń wɑɑsɩ-m, Tɑcɑɑ kɔɔ nɑ ń yɑ-m. 12 Ḿpʋɣʋ n lɑɣɑsɑ mɑ lɑŋwɑkəllɛ kɛ lɑŋhʋlʋmlɛ, nɑ ń wɔɣɔsɩ mɑ ləyɑɣɑ wontu nɑ ń suu-m ɑcimɑ nyəntʋ. 13 Wɑɑtʋ ɩnəɣɩ mɑɑ yoo-ŋ yontu, mɑ kɑɑ su, Tɑcɑɑ, mɑ Ɩsɔ, mɑɑ sɑŋɩ-ŋ tɑm kɛ́.