Yontu 36
SIM1 Tɑcɑɑ təmlɛ tʋ Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 2 Mɑ cɛkənɑ Ɩsɔ tɔɔ kʋllʋ kʋyɔɣɔtʋtʋ, sɩ: Ɩsɔ sɔɣɔntʋ tɑ kɛ mɑɣɑ pʋlʋpʋ. 3 Pə puɣusiɣi-ɩ kɛ́ sɩ ɩ kɛ́ kʋpɑŋ ɩlɛ ɩɩ cɛkəɣənɑ ɩ ɩsɑɣɑtʋ sɩ ɩ́ kisi-tɩ. 4 Ɩ kʋyɔɣɔtʋtʋ tənɑ kɛ kɑloolɑɣɑ nɑ kʋtʋsʋtʋ kɛ́. Ɩ fɛɩ ləmɑɣɑsɛɛ, pə́cɔ ɩ tɑ nyɩ kʋpɑntʋ lɑpʋ. 5 Ɩ təhəntəlɛ kɛ ɩ mɑɣɑsəɣɩ mpi pə tɑ siɣisi tɔ pə tɔm, nɑ ɩ́ təŋəɣɩ mpɑɑʋ ŋku kʋ fɛɩ teu tɔ, ɩɩ lɔɔkɩ ɩsɑɣɑtʋ. 6 Tɑcɑɑ nyɑ́ kʋpɑntʋ wɑlɑɑ kɛ́ ɩsɩɩ ɩsɔtɔnʋɣʋ nɑ nyɑ́ teu nɑ́ɑ́ kɑləsənɑ ɩsɔŋmʋntʋ. 7 Nyɑ́ siɣisuɣu kɑɑwɑɣɑ ɩsɩɩ pulɑsɩ. Nɑ nyɑ́ kʋmɑɣɑsʋtʋ nɑ́ɑ́ lumɑɑ ɩsɩɩ teŋku. Nyɑ́ wɑɑsəɣənɑ yəlɑɑ nɑ tɔlɑ. 8 Hɑɩ, Ɩsɔ nyɑ́ kʋpɑntʋ tewɑɣɑ. Nɑ yəlɑɑ ŋmɛləɣɩ nyɑ́ tɛɛ. 9 Nyɑ́ təyɑɣɑ tɑɑ wɛnɑʋ kɛ n hɑɣɑsəɣɩ-wɛ, nɑ ń yeki nɑ pɑ́ nyɔɔkɩ nyɑ́ kʋpɑntʋ ɩsɩɩ lʋm. 10 Nyɑ́ kiŋ kɛ weesuɣu sɛɛlʋ wɛɛ. Nɑ tə nɑɑkənɑ nyɑ́ nyɑɑləm. 11 Tɑcɑɑ lɑ kʋpɑntʋ kɛ mpɑ pɑ nyəmɑ-ŋ tɔ nɑ mpɑ pɑ təŋəɣɩ tɑmpɑnɑ tɔ. 12 Kɑlɑmpɑɑnɩ tʋ ɩ́ tɑɑ fɛlɩ-m nɔɔhəlɛ. Pəyele ɩsɑɣɑʋ ɩ́ tɑɑ tɔɣɔnɩ-m. 13 Ɩɩ nɑɑkɩ yəlɑɑ ɑsɑɣɑɑ tɛmɑ hotuɣu nɑ pɑ́ pəsɩ kpɛntəlɑsɩ pɑɑ pəsəɣɩ kʋlʋɣʋ.