Yontu 44
SIM1 Kolee yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 2 Hɑɩ, Tɑcɑɑ, tɑ́ cɑɑnɑɑ kɛɛsɑ-tʋɣʋ mpi n lɑpɑ-wɛɣɛ too lɔŋtɑɑ tɔ nɑ tə́ nɩɩnɑ tɑ́ ŋkpɑŋŋ. 3 N tɔɣɔnɑ piitimnɑɑ yəlɑɑ nɑ ń sɩɩ-wɛ. N kʋwɑ yəlɑɑnɑɑ nɑ pə́ wɑlənɑ-wɛ. 4 Pə tɑɣɑ pɑ toŋ nɑ pɑ yoou wontu yɑpənɑ-wɛ, nɑ pə́ lɑ́ nɑ pɑ́ tɔɣɔ tɛtʋ. Amɑ nyɑ́ toŋ nɑ nyɑ́ wɛɛʋ kɛ pɑ wɑɑlɩ lɑpənɑ mpʋ. Mpi tɔ, n kɑ sɔɔlɑ-wɛɣɛ. 5 Hɑɩ, Ɩsɔ, nyɑɣɑlɛ mɑ wulɑʋ, nyɑ́ yekinɑ nɑ Yɑkɔpʋ kələɣɩ. 6 Nyɑ́ toŋ kɛ tə pəsəɣənɑ tɑ́ kolontunɑɑ kɛ kpɛntəlɑsɩ, nɑ tə́ fɛləɣɩ-wɛɣɛ nɔɔhɛɛ nɑ nyɑ́ hətɛ. 7 Tə tɑ tʋ tɑ́ tɔɔʋ kɛ nɑɑni. Pəyele tə tɑ tɑŋ tɑ́ lɑɣɑtɛ sɩ tə́ wɑɑsɩ-tʋɣʋ pʋlʋ. 8 Mpi tɔ, nyɑ́ yɑkənɑ-tʋɣʋ tɑ́ kolontunɑɑ niŋ tɑɑ nɑ ń tʋɣɩ mpɑ pɑɑ cɑɑkɩ-tʋ tɔɣɔ fɛɛlɛ. 9 Tɑcɑɑ tɩɩ tʋɣʋ-ŋ teeli kɛ pɑɑ kʋyɑkʋ ŋkuɣʋ. Tɩɩ sɛɛkɩ-ŋ tɑm kɛ́. 10 Pɑɑ nɑ mpʋ n lɔ-tʋ nɑ ń tʋ-tʋɣʋ fɛɛlɛ, nɑ ń kisi tɑ́ yoolɑɑ wɑɑlɩ kɛ wɛɛʋ. 11 N yelɑɑ nɑ tə́ se tɑ́ kolontunɑɑ, nɑ pɛlɛ pɑ́ kuu tɑ́ wontu. 12 N pɛtɑ-tʋɣʋ pɑ niŋ tɑɑ kɛ́ ɩsɩɩ tɔlɑ kɛ təkʋlɛ nɑ tə́ yɑ́ yem kɛ́ lɛlɑɑ tɛ́. 13 N lɔ nyɑ́ piyɑ tɑɣɑ ɑləhɑ kɛ́ yem kɛ́ n tɑ wɑɑ tɑ́ tɔɔ kɛ́ pʋlʋ. 14 N yelɑɑ nɑ tɑ́ cɔlɔ nyə́mɑ tʋʋkɩ-tʋ, nɑ pɑ́ pɑɑnɑ-tʋ nɑ pɑ́ woŋiɣi-tʋ. 15 Tɑɣɑ piitimnɑɑ yookinɑ yontu, nɑ yəlɑɑ nɑ́ɑ́ tuliɣi-tʋɣʋ ntompee. 16 Pɑɑ kʋyɑkʋ ŋkuɣu fɛɛlɛ kpɑɑkɩ-m nɑ pə́ lɑkɩ-m tokuɣu 17 kɛ wɑɑtʋ wei mɑ nɩɩkɩ kolontu kʋtʋɣʋ nɑ ɩ sɑɣɑtʋɣʋ tɔ. 18 Wɑhɑlɑnɑɑ pɑnɛ pɑ tənɑ pɑ mɑkənɑ-tʋɣʋ. Pəyele tə tɑ sɔɔ nyɑ́ tɔɔ. Pə́cɔ tə tɑ wɑkəlɩ tɑ́ nɑ-ŋ tɑ́ nɔɣɔ pɛɛlʋɣʋ. 19 Anɩ tə tɑ lɔ-ŋ yɑɑ tə́ hɑtələnɑ nyɑ́ mpɑɑʋ. 20 Pɑɑ nɑ mpʋ n nɑŋtɑ-tʋɣʋ lonte nte pɑ lɔwɑ tɔ tə tɑɑ kɛ́ tɑɑlɛ hɑsɩ təcɑɣɑlɛ. Nɑ ń yele nɑ səm səkpɛtʋɣʋ nyɑlɑ tɑ́ tɔɔ. 21 Ye tɩɩ sɔɔwɑ tɑ́ Ɩsɔ tɔɔ, yɑɑ tə sʋʋ tɩɩŋ kɛ lɑɑʋ, 22 n tɑɑ kpisi pə nyəm. Mpi tɔ, n nyəmɑ pə tənɑ mpi pə wɛ yʋlʋ lotu tɑɑ tɔɣɔ. 23 Nyɑ́ tɔɔ kɛ́ pɑ kʋɣɩ-tʋɣʋ pɑɑ kʋyɑkʋ ŋku, nɑ pɑ́ lɑkənɑ-tʋ ɩsɩɩ pɑ pukuɣunɑ heu kɛ təkʋlɛ tɔ. 24 Hɑɩ, Tɑcɑɑ n tooki suwe? Fe nɑ ń kʋlɩ, tɑɑ lɔ-tʋɣʋ tɑm tɔɔ. 25 Pepe tɔɔ kɛ́ n sɔɔ tɑ́ wɑhɑlɑ nɑ tɑ́ lɑŋwɑkəllɛ tɔɔ nɑ nn cɑɑkɩ tɑ́ nyənʋɣʋ? 26 Mpi tɔ tə hotɑ tɑ́ lotu tɔɔ kɛ́ mʋsʋɣʋ tɑɑ kɛ́. Hɑɩ, kʋlɩ nɑ ń wɑɑsɩ-tʋ. 27 Hɛtɩ-tʋɣʋ nyɑ́ kʋpɑntʋ tɔɔ.