Yontu 63
SIM1 Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔ. Tə tɑɑ kɛ́ Tɑfiiti kɛɛsɑ ɩ cɑɣɑlɛ tɔm kɛ Yutɑ wulɑʋ tɛtʋ tɑɑ. 2 Hɑɩ, Ɩsɔ, nyɑɣɑlɛ mɑ Ɩsɔ, mɑ pɛɛkəɣɩ-ŋ kɛ́, mɑ ləsɑɣɑ nyɩɩləɣɩ-ŋ kɛ́, nɑ mɑ́ tɛŋ tɑɑsɩ kɛ nyɑ́ tɔɔ kɛ́ wʋlɑɣɑ tɛtʋ nti tə tɑɑ lʋm fɛɩ tɔ. 3 Nyɑ́ təyɑɣɑ tɑɑ kɛ́ mɑ nyənɑ-ŋ teu nɑ mɑ́ nɑ́ nyɑ́ toŋ nɑ nyɑ́ teeli. 4 Mpi tɔ, nyɑ́ kʋpɑntʋ kəlɑ weesuɣu kɛ teu. Mɑɑ kpɑɑlɩ nyɑ́ sɑmtʋ. 5 Nyɑɣɑ mɑɑ sɛɛ mɑ weesuɣu tənɑ, nɑ mɑ́ sələməɣənɑ nyɑ́ hətɛ. 6 Mɑɑ hɑɣɑ kɛ́ ɩsɩɩ mɑ tɔɣɔ nim tɔɣɔnɑɣɑ kʋpɑŋkɑ. Ɩlɛnɑ mɑ́ yoo-ŋ yontu nɑ lɑŋhʋlʋmlɛ. 7 Ye mɑ həntɑɑ, mɑ tɔɔsəɣɩ nyɑ́ tɔm kɛ́, nɑ mɑ mɑɣɑsəɣɩ-təɣɩ mɑ tɑɑ kɛ́ ɑhoo tənɑ. 8 Nyɑɣɑlɛ mɑ wɑɑsʋlʋ, mɑ lɑŋlɛ hɛɛnɑ nyɑ́ keŋ ɩsotom tɑɑ cɑɣɑlɛ. 9 Mɑ tɑmsənɑ-ŋ kɛ́ nɑ luɣu kʋlʋmʋɣʋ, nyɑ́ toŋ wɑɑsəɣənɑ-m. 10 Mpɑ pɑ lʋkɩ mɑ weesuɣu ləsʋɣʋ tɔ, pə́ wɑkəlɩ-wɛɣɛ lɔŋ nɑ pə́ sʋsɩ-wɛɣɛ tɛtʋ lumɑŋ tɑɑ. 11 Pə́ kʋ-wɛɣɛ ɩsɑɣɑkʋɣʋ nɑ pə́ wɑɑsɩ tɑɑlɛ hɑsɩ. 12 Ɩlɛnɑ wulɑʋ nɑ́ɑ́ yɔɔləɣənɑ Ɩsɔ. Wei ɩ kɑ tuunɑ Ɩsɔ hətɛ tɔ pʋntʋ kɑ́ sɑmɩ-ɩ kɛ́. Mpi tɔ, pɩɩ təkɩ pɔpɔtʋnɑɑ nɔɔsɩ.